മൂന്നാം ദിവസവും റാലി തുടർന്നു; സെൻസെക്സ് 152 പോയിന്റ് ഉയർന്നു; നിഫ്റ്റി മി‍ഡ്കാപ് എക്കാലത്തെയും ഉയരത്തിൽ

തുടർച്ചയായ മൂന്നാം സെഷനിലും നേട്ടത്തിൽ ക്ലോസ് ചെയ്ത് ഇന്ത്യൻ ആഭ്യന്തര സൂചികകൾ. സെൻസെക്സ് 152.12 പോയിന്റ് ഉയർന്ന് 65,780.26ലും നിഫ്റ്റി 46.10 പോയിന്റ് നേട്ടത്തോടെ 19,574.90ലുമാണ് വ്യാപാരം അവസാനിപ്പിച്ചത്. നിഫ്റ്റിയിൽ അപ്പോളോ ഹോസ്പിറ്റൽസ്, കോൾ ഇന്ത്യ, സൺ ഫാർമ, ബിപിസിഎൽ, ബജാജ് ഓട്ടോ എന്നിവ മികച്ച നേട്ടമുണ്ടാക്കി. അൾട്രാടെക് സിമന്റ്, എസ്ബിഐ ലൈഫ് ഇൻഷുറൻസ്, ഡോ.റെഡ്ഡീസ് ലബോറട്ടറീസ്, മാരുതി സുസുക്കി, ഐഷർ മോട്ടോഴ്‌സ് തുടങ്ങിയവ നഷ്ടത്തിലുമാണ്.

സെക്ടറൽ സൂചികകളിൽ ബാങ്ക് നേരിയ തോതിൽ ഇടിഞ്ഞു. ഹെൽത്ത് കെയർ സൂചിക ഒരു ശതമാനവും റിയൽറ്റി സൂചിക 1.50 ശതമാനവും നേട്ടമുണ്ടാക്കി. മറ്റ് സെക്ടറൽ സൂചികകളും നേട്ടത്തിലാണ്. ബിഎസ്ഇ മിഡ്കാപ് സൂചിക ഒരു ശതമാനവും സ്മോൾകാപ് സൂചിക 0.6 ശതമാനവും ഉയർന്നു. നിഫ്റ്റി മിഡ്‌ക്യാപ് 100 സൂചിക ഒരു ശതമാനം ഉയർന്ന് എക്കാലത്തെയും ഉയർന്ന നിലയിലെത്തി. 423.25 പോയിന്റ് നേട്ടത്തോടെ 40,253.60 ലാണ് സൂചിക ക്ലോസ് ചെയ്തത്.

പൊതുചിത്രം

പ്രോപ്പർട്ടി രജിസ്ട്രേഷനിലെ വർധനവ് റിയാലിറ്റി ഓഹരികളിൽ നേട്ടമുണ്ടാക്കി. ജി20, ലോകകപ്പ് എന്നിവയിൽ വലിയ നേട്ടമുണ്ടാക്കാൻ സാധ്യതയുള്ള റീട്ടെയിൽ, ക്വിക്ക് സർവീസ് റസ്റ്റോറന്റ് ഓഹരികളിൽ വാങ്ങൽ കാണാം. ജൂബിലന്റ് ഫുഡ്‍വർക്ക് 6.23 ശതമാനം നേട്ടത്തോടെ ക്ലോസ് ചെയ്തു. ഫാർമ ഓഹരികൾ ആരോഗ്യകരമായ അരബിന്ദോ, ലോറസ്, സൺ ഫാർമ എന്നിവ 3 ശതമാനം വീതം ഉയർന്നു.

അപ്പോളോ ഹോസ്പിറ്റൽസ് 3 ശതമാനം ഉയർന്നു. സോണി ലയനവുമായി ബന്ധപ്പെട്ട കോടതി നടപടികൾക്കിടെ സീ എൻർടെയിൻമെന്റ് നേട്ടത്തിലാണ് ക്ലോസ് ചെയ്തത്. മെറ്റൽ ഓഹരികളിൽ ഭേദപ്പെട്ട പ്രകടനമാണെങ്കിലും നിഫ്റ്റി മെറ്റൽ റെക്കോർഡ് ഉയരത്തിലണ് ക്ലോസ് ചെയ്തത്.  വില വർധനവിനെ തുടർന്ന് കുതിപ്പുണ്ടായ സിമന്റ് ഓഹരികളിൽ ചിലതിൽ ലാഭം ബുക്കിംഗ് നടന്നു. 2 ബ്രോക്കറേജുകളിൽ വാങ്ങാൻ നിർദ്ദേശിച്ചതോടെ റെയ്മണ്ട് ഓഹരികൾ 9 ശതമാനം ഉയർന്നു.

നിഫ്റ്റിയിൽ അപ്പോളോ ഹോസ്പിറ്റൽസ് എന്റർപ്രൈസ് ലിമിറ്റഡ് (3.22 ശതമാനം), കോൾ ഇന്ത്യ (3.07 ശതമാനം), സൺ ഫാർമസ്യൂട്ടിക്കൽ ഇൻഡസ്ട്രീസ് ലിമിറ്റഡ് (2.08 ശതമാനം) എന്നി ഓഹരികളാണ് പ്രധാനമായും നേട്ടമുണ്ടാക്കിയത്.