നേട്ടം കൈവിടാതെ സെന്‍സെക്‌സില്‍ മുന്നേറ്റം; ആര്‍ബിഐ തീരുമാനത്തില്‍ ആകാംക്ഷയോടെ വിപണി

തുടര്‍ച്ചയായ ആറാം ദിവസവും വിപണിയില്‍ മുന്നേറ്റം. വ്യാപാരത്തിന്റെ ഇടവേളയില്‍ ചാഞ്ചാട്ടം ശക്തമായിരുന്നെങ്കിലും ക്ലോസിങ് ഘട്ടത്തിലെ മുന്നേറ്റത്തില്‍ പ്രധാന സൂചികകള്‍ നേട്ടത്തിലേക്ക് മടങ്ങിയെത്തുകയായിരുന്നു. ഇതോടെ നിഫ്റ്റി 43 പോയിന്റ് വര്‍ധിച്ച് 17,388-ലും സെന്‍സെക്‌സ് 214 പോയിന്റ് നേട്ടത്തോടെ 58,351-ലും ബുധനാഴ്ചത്തെ വ്യാപാരം ആരംഭിച്ചു.

അതേസമയം ഹ്രസ്വകാലയളവിലെ അടിസ്ഥാന പലിശ നിരക്കുകളില്‍ മാറ്റം വരുത്തണമോയെന്ന് തീരുമാനിക്കുന്ന റിസര്‍വ് ബാങ്കിന്റെ ധന സമതി യോഗം ഇന്ന് ആരംഭിച്ചതിന്റെ പശ്ചാത്തലത്തില്‍ ബാങ്കിംഗ് ഓഹരികള്‍ സ്ഥിരതയാര്‍ജിക്കലിന്റെ വഴിയിലേക്ക് മാറിയത് വിപണിയിലെ മുന്നേറ്റത്തിനും തടയിട്ടു. നിലവിലെ രീതിയില്‍ 25 മുതല്‍ 35 അടിസ്ഥാന പോയിന്റ് വര്‍ധന പലിശ നിരക്കുകളില്‍ നടപ്പാക്കാന്‍ റിസര്‍വ് ബാങ്ക് മുതിര്‍ന്നേക്കുമെന്നാണ് വിലയിരുത്തല്‍.

ഇതിനിടെ വിദേശ നിക്ഷേപകര്‍ തുടര്‍ച്ചയായി വാങ്ങുന്ന പക്ഷത്തേക്ക് മാറിയതും വിപണിക്ക് കരുത്തേകുന്നു. അതേസമയം പ്രധാന സൂചികയായ നിഫ്റ്റിയുടെ തൊട്ടടുത്ത സപ്പോര്‍ട്ട് നിലവാരം 17,200/ 17,300 നിലവാരങ്ങളിലാണുള്ളത്. ഇതിനു മുകളില്‍ സൂചിക തുടരുന്നിടത്തോളം വിപണിയില്‍ കുതിപ്പ് പ്രകടമാകും. 17,500/ 17,550 നിലവാരങ്ങളിലാവും നിഫ്റ്റി സൂചികയ്ക്ക് ഇനി പ്രതിരോധനം നേരിടേണ്ടി വരിക. പൊസിഷണല്‍ ട്രേഡേര്‍സിന് നിഫ്റ്റിയില്‍ 17,200 നിലവാരമാകും നിര്‍ണായകം.

മാര്‍ക്കറ്റ് റിപ്പോര്‍ട്ട്

നാഷണല്‍ സ്റ്റോക്ക് എക്‌സ്‌ചേഞ്ചില്‍ ഇന്ന് ട്രേഡ് പൂര്‍ത്തിയാക്കിയ ആകെ 2,149 ഓഹരികളില്‍ 620 എണ്ണം മാത്രമാണ് നേട്ടത്തോടെ ക്ലോസ് ചെയ്തത്. ബാക്കി 1,224 ഓഹരികളും നഷ്ടത്തിലാണ് വ്യാപാരം പൂര്‍ത്തിയാക്കിയത്. ഇതോടെ ഓഹരികളിലെ മുന്നേറ്റവും ഇടിവും തമ്മിലുള്ള അനുപാതമായ എഡി റേഷ്യോ 0.55 ആയി താഴ്ന്നു. ഇന്നലെ എഡി അനുപാതം 1.23 നിലവാരത്തിലായിരുന്നു. അതേസമയം വിപണിയിലെ ചാഞ്ചാട്ടത്തിന്റെ തോത് വെളിവാക്കുന്ന വിക്സ് (VIX) നിരക്കുകളില്‍ കാര്യമായ മാറ്റമില്ലാതെ 18.50 നിലവാരത്തില്‍ തുടര്‍ന്നു.

എന്‍എസ്ഇയുടെ 15 ഓഹരി വിഭാഗം സൂചികകളില്‍ 4 എണ്ണം ഒഴികെ ബാക്കി 11 സൂചികകളും ബുധനാഴ്ച നഷ്ടത്തിലാണ് വ്യാപാരം അവസാനിപ്പിച്ചത്. 0.80 ശതമാനം ഇടിഞ്ഞ നിഫ്റ്റി ഓട്ടോ സൂചികയാണ് കൂടുതല്‍ നഷ്ടം നേരിട്ടത്. നിഫ്റ്റി എഫ്എംസിജി, മീഡിയ, മെറ്റല്‍, ഫാര്‍മ, പിഎസ്യു ബാങ്ക്, പ്രൈവറ്റ് ബാങ്ക്, റിയാല്‍റ്റി, ഹെല്‍ത്ത്കെയര്‍, കണ്‍സ്യൂമര്‍ ഡ്യൂറബിള്‍സ് സൂചികകളും നഷ്ടത്തിലാണ് ക്ലോസ് ചെയ്തത്.

അതേസമയം 1.35 ശതമാനം മുന്നേറിയ നിഫ്റ്റി ഐടി സൂചികയാണ് നേട്ടക്കണക്കില്‍ മുന്നിലെത്തിയത്. നിഫ്റ്റി ഓയില്‍ & ഗ്യാസ്, ഫിനാന്‍ഷ്യല്‍ സര്‍വീസസ് വിഭാഗം സൂചികകളും നേരിയ നേട്ടം രേഖപ്പെടുത്തി.

നിഫ്റ്റി50 സൂചികയിലെ 25 ഓഹരികള്‍ നേട്ടത്തോടെയും 25 എണ്ണം നഷ്ടത്തിലുമാണ് ബുധനാഴ്ചത്തെ വ്യാപാരം പൂര്‍ത്തിയാക്കിയത്.

• നേട്ടം-: ടെക് മഹീന്ദ്ര് 2.22 %, ഇന്‍ഫോസിസ് 1.70 %, ടൈറ്റന്‍ കമ്പനി 1.42 %, ടിസിഎസ് 1.37 %, ഏഷ്യന്‍ പെയിന്റ്‌സ് 1.36 %, ഹിറോ മോട്ടോ കോര്‍പ് 1.17 % വീതവും മുന്നേറ്റം രേഖപ്പെടുത്തി.
• നഷ്ടം-: സണ്‍ ഫാര്‍മ -2.22 %, ടാറ്റ മോട്ടോര്‍സ് -1.93 %, കൊട്ടക് മഹീന്ദ്ര ബാങ്ക് -1.84 %, മാരുതി സുസൂക്കി -1.74 %, കോള്‍ ഇന്ത്യ -1.51 %, യുപിഎല്‍ -0.96 % വീതവും നഷ്ടം കുറിച്ചു.