മിഡ്, സ്മോൾ കാപ് സൂചികകൾ 1% നേട്ടത്തിൽ; നിഫ്റ്റി 20,103 ൽ; സെൻസെക്സിന് 50 പോയിന്റ് ഉയർന്നു

നേട്ടം തുടർന്ന് ഇന്ത്യൻ ആഭ്യന്തര സൂചികകൾ. സെൻസെക്സ് 52 പോയിന്റ് ഉയർന്ന് 67,519 ലും നിഫ്റ്റി 33 പോയിന്റ് നേട്ടത്തോടെ 20,103.10 ലും ക്ലോസ് ചെയ്തു. വ്യാപാരത്തിനിടെ സെൻസെക്സ് 67,711.05 ലും നിഫ്റ്റി 20,167.65 ലും ഇൻട്രാ ഡേ ഉയരം കണ്ടെത്തി.

യുപിഎൽ, ഹിൻഡാൽകോ ഇൻഡസ്ട്രീസ്, ഒഎൻജിസി, എം ആൻഡ് എം, ഐഷർ മോട്ടോഴ്‌സ് തുടങ്ങിയ ഓഹരികൾ നിഫ്റ്റിയിൽ നേട്ടമുണ്ടാക്കി. ഏഷ്യൻ പെയിന്റ്‌സ്, കോൾ ഇന്ത്യ, ഐടിസി, എൽടിഐഎംഡ്‌ട്രീ, ബ്രിട്ടാനിയ ഇൻഡസ്‌ട്രീസ് എന്നിവ നഷ്ടത്തിലുമാണ്.

സെക്ടറൽ സൂചികകളിൽ എഫ്എംസിജി സൂചിക നേരിയ നഷ്ടത്തിലാണ് വ്യാപാരം അവസാനിച്ചത്. ഓയിൽ ആൻഡ് ഗ്യാസ്, റിയൽറ്റി, മെറ്റൽ, പിഎസ്‌യു ബാങ്ക് എന്നിവ 1 ശതമാനം വീതം ഉയർന്നു. ബിഎസ്‌ഇ മിഡ്‌കാപ്, സ്‌മോൾകാപ് സൂചികകൾ 1 ശതമാനം വീതം നേട്ടമുണ്ടാക്കി. ഉത്സവ സീസണിനോട് അടുപ്പിച്ച് ബാങ്ക്, ഓട്ടോ, റിയൽറ്റി സ്റ്റോക്കുകളിലെ മുന്നേറ്റമാണ് വിപണിയെ നേട്ടത്തിലെത്തിച്ചത്.

വിപണിയിൽ നേട്ടമുണ്ടാക്കിയവർ

ബ്രോക്കറേജ് ഓഹരിയെ അപ്​ഗ്രേഡ് ചെയ്തതിന് പിന്നാലെ യുപിഎൽ നാല് ശതമാനം ഉയർന്നു. ഹിൻഡാൽകോ, ജെഎസ്പിഎൽ എന്നി ഓഹരികളും നേട്ടമുണ്ടാക്കി. ഓട്ടോ സെക്ടറിൽ മഹീന്ദ്ര ആൻഡ് മഹീന്ദ്ര, ഐഷർ എന്നിവ രണ്ട് ശതമാനം വീതം ഉയർന്നു. ഐടി ഓഹരികളായ നാസ്‌ഡാക്ക്, ടെക് മഹീന്ദ്ര എന്നിവ നേട്ടത്തോടെ 52 ആഴ്‌ചയിലെ ഉയർന്ന നിരക്കിലെത്തി. ക്രൂഡ് ഓയിൽ വില ഉയരുന്ന ഘട്ടത്തിൽ ഒഎൻജിസി 2 ശതമാനത്തിലധികം ഉയർന്ന് 52 ആഴ്ചയിലെ ഉയർന്ന നിരക്കിലെത്തി.

പഞ്ചസാര ഓഹരികൾ വൻതോതിൽ നേട്ടമുണ്ടാക്കി. ബൽറാംപൂർ ചിനി നാല് ശതമാനത്തിലധികം ഉയർന്നു. ക്യുഐപിക്ക് മുന്നോടിയായി നാല് ശതമാനം നേട്ടത്തോടെ ചോല ഇൻവെസ്റ്റ്‌മെന്റ്സ് 52 ആഴ്‌ചയിലെ ഏറ്റവും ഉയർന്ന നിലയിലെത്തി,

ആക്‌സിസ് ബാങ്ക്, ഭാരതി എയർടെൽ, ഇൻഡസ്ഇൻഡ് ബാങ്ക്, മാരുതി സുസുക്കി, ടാറ്റ സ്റ്റീൽ, ടിസിഎസ്, ടെക് മഹീന്ദ്ര, ടൈറ്റൻ, അൾട്രാടെക് സിമന്റ്, വിപ്രോ എന്നിവയുൾപ്പെടെ 200-ലധികം ഓഹരികളാണ് വ്യാഴാഴ്ച 52 ആഴ്‌ചയിലെ ഉയർന്ന നിലയിലെത്തിയത്.

രൂപ ഡോളറിനെതിരെ നേരിയ നഷ്ടത്തിൽ 83.03 നിലവാരത്തിൽ ക്ലോസ് ചെയ്തു. ബുധനാഴ്ചയിലെ ക്ലോസിം​ഗ് 82.99 രൂപയിലായിരുന്നു. വിതരണം കർശനമാക്കിയതോടെ ക്രൂഡ് ഓയിൽ വില ഒരു ശതമാനത്തോളം ഉയർന്നു. ബ്രെന്റ് ക്രൂഡ് ബാരലിന് 93 ഡോളറിനടുത്താണ് വ്യാപാരം നടക്കുന്നത്.