വിപണിയിൽ മുന്നേറ്റം; ഫാർമ ഒഴികെ സെക്ടറൽ സൂചികകൾ നേട്ടത്തിൽ; സെൻസെക്സ് 556 പോയിന്റ് ഉയർന്നു

ആ​ഗോള വിപണിയിലെ പോസ്റ്റീവ് സൂചനങ്ങളും ആഭ്യന്തര സാമ്പത്തിക ഡാറ്റകളും അനുകൂലമായതോടെ വിപണിയിൽ മുന്നേറ്റം. സെൻസെക്സ് 556 പോയിന്റ് നേട്ടത്തിൽ 65,387.16 ലും നിഫ്റ്റി 182 പോയിന്റ് ഉയർന്ന് 19,435.30 ലും ക്ലോസ് ചെയ്തു. ജൂൺ 30 തിന് ശേഷം ഒരു ദിവസം സെൻസെക്സിലുണ്ടാകുന്ന മികച്ച പ്രകടനമാണിത്.

സെൻസെക്‌സ് കഴിഞ്ഞ ദിവസത്തെ ക്ലോസിം​ഗായ 64,831.41 ൽ നിന്ന് 24 പോയിന്റിന്റെ നേരിയ നേട്ടത്തോടെ 64,855.51 ലാണ് വ്യാപാരം ആരംഭിച്ചത്. സൂചിക 642 പോയിന്റ് ഉയർന്ന് 65,473.27 എന്ന ഇൻട്രാഡേ ഉയർന്ന നിലയിലെത്തി. നിഫ്റ്റി 19,458.55 എന്ന ഇൻട്രാഡേ ഉയർന്ന നിലവാരത്തിലുമെത്തി.

എൻടിപിസി, ഒഎൻജിസി, ജെഎസ്ഡബ്ല്യു സ്റ്റീൽ, ടാറ്റ സ്റ്റീൽ, മാരുതി സുസുക്കി എന്നിവയാണ് നിഫ്റ്റിയിൽ നേട്ടമുണ്ടാക്കിയ ഓഹരികൾ. സിപ്ല, എച്ച്‌ഡിഎഫ്‌സി ലൈഫ്, ഡോ.റെഡ്ഡീസ് ലബോറട്ടറീസ്, അൾട്രാടെക് സിമന്റ്, നെസ്‌ലെ ഇന്ത്യ എന്നിവ നഷ്ടത്തിലാണ് വ്യാപാരം അവസാനിപ്പിച്ചത്. 

സെൻസെക്‌സിൽ അൾട്രാടെക് സിമന്റ്, സൺ ഫാർമ, നെസ്‌ലെ, , ലാർസൻ ആൻഡ് ടൂബ്രോ എന്നിവ മാത്രമാണ് നഷ്ടത്തിൽ ക്ലോസ് ചെയ്തത്. സെക്ടറൽ സൂചികകളിൽ ഫാർമ ഒഴികെയുള്ള മറ്റെല്ലാ സൂചികകളും നേട്ടത്തിലാണ്. പവർ, മെറ്റൽ, ഓട്ടോ, ഓയിൽ ആൻഡ് ഗ്യാസ്, ബാങ്ക് എന്നിവ 1-2.7 ശതമാനം നേട്ടത്തോടെ അവസാനിച്ചു. ബിഎസ്ഇ മിഡ്കാപ്, സ്മോൾ കാപ് സൂചികകൾ 0.7 ശതമാനം വീതം നേട്ടമുണ്ടാക്കി.

നേട്ടത്തിന് കാരണം

സെപ്റ്റംബറിൽ ഫെഡറൽ റിസർവ് നിരക്കുകൾ ഉയർത്തില്ല എന്ന പ്രതീക്ഷയ്‌ക്കിടയിൽ ആ​ഗോള തലത്തിൽ സൂചികകൾ അനുകൂലമായതാണ് മൊത്തതിലുള്ള വാങ്ങലുകൾക്ക് ഇടയാക്കിയത്. യുഎസ് ട്രഷറി യീൽഡും ഡോളറും താഴേക്ക് ഇറങ്ങിയതും ഇക്വിറ്റി മാർക്കറ്റിന് അനുകൂലമായി. വ്യാഴാഴ്ച പുറത്തിറങ്ങിയ ജൂൺ പാദത്തിലെ ജിഡിപി കണക്കുകളും ഓഗസ്റ്റ് ജിഎസ്ടി വരുമാന ഡാറ്റയും ഉൾപ്പെടെയുള്ള ആരോഗ്യകരമായ മാക്രോ ഇക്കണോമിക് ഡാറ്റകളും ആഭ്യന്തര വിപണിക്ക് അനുകൂലമായി.

ബിഎസ്ഇയിൽ ലിസ്റ്റ് ചെയ്ത കമ്പനികളുടെ മൊത്തത്തിലുള്ള വിപണി മൂല്യം കഴിഞ്ഞ സെഷനിലെ 309.6 ലക്ഷം കോടി രൂപയിൽ നിന്ന് ഏകദേശം 312.4 ലക്ഷം കോടി രൂപയായി ഉയർന്നു. ഒറ്റ ദിവസം കൊണ്ട് നിക്ഷേപകർ 2.8 ലക്ഷം കോടി രൂപ സമ്പന്നരാക്കി.