വിപണിയിൽ ഉ​ഗ്രൻ തിരിച്ചു വരവ്; നേട്ടത്തിൽ ക്ലോസ് ചെയ്ത് സൂചികകൾ; മെറ്റൽ, ഫാർമ ഓഹരികൾ മുന്നേറി

സാഹചര്യം അനുകൂലമായതോടെ വാരന്ത്യത്തിൽ നേട്ടത്തിൽ ക്ലോസ് ചെയ്ത് വിപണി. അടുത്ത ആഴ്‌ച വാരനിരിക്കുന്ന ആർബിഐയുടെ ധനനയ യോ​ഗ റിസൾട്ടിനും വരാനിരിക്കുന്ന ത്രൈമാസ ഫലങ്ങളിലേക്കും നിക്ഷേപകർ ശ്രദ്ധ കേന്ദ്രീകരിച്ചതോടെ സെൻസെക്സും നിഫ്റ്റിയും നേട്ടമുണ്ടാക്കി. ആഗോള സൂചനകളും അനുകൂലമായതോടെ സെൻസെക്സ് 320.09 പോയിന്റ് ഉയർന്ന് 65,828.41ലും നിഫ്റ്റി 114.80 പോയിന്റ് നേട്ടത്തിൽ 19,638.30 ലുമാണ് വ്യാപാരം അവസാനിപ്പിച്ചത്. 

നിഫ്റ്റിയിൽ ഹിൻഡാൽകോ ഇൻഡസ്ട്രീസ്, എൻടിപിസി, ഹീറോ മോട്ടോകോർപ്പ്, ഡോ.റെഡ്ഡീസ് ലബോറട്ടറീസ്, ദിവിസ് ലാബ് തുടങ്ങിയ ഓഹരികൾ നേട്ടമുണ്ടാക്കി. അദാനി എന്റർപ്രൈസസ്, എച്ച്സിഎൽ ടെക്നോളജീസ്, ടെക് മഹീന്ദ്ര, പവർ ഗ്രിഡ് എന്നിവ നഷ്ടത്തിലാണ്.

ഐടി ഒഴികെ മറ്റെല്ലാ സെക്ടറൽ സൂചികകളും നേട്ടത്തിലാണ്. മെറ്റൽ, പവർ, ഓയിൽ ആൻഡ് ഗ്യാസ്, പിഎസ്‌യു ബാങ്ക്, ഹെൽത്ത് കെയർ സൂചികകൾ 1-2.7 ശതമാനം വരെ ഉയർന്നു. ബിഎസ്ഇ മിഡ്കാപ് സൂചിക 1.3 ശതമാനവും ബിഎസ്ഇ സ്മോൾകാപ് സൂചിക 0.6 ശതമാനവും ഉയർന്നു.

യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്ഡിഎ)യിൽ നിന്നുള്ള അനുകൂല പ്രസ്താവനകൾ ഫാർമ ഓഹരികളിൽ മുന്നേറ്റമുണ്ടാക്കി. ഡോളർ സൂചികയിലെ ഇടിവ് കാരണം മെറ്റൽ ഓഹരികൾ നേട്ടമുണ്ടാക്കി. ഹിൻഡാൽകോ 5.53 ശതമാനം ഉയർന്നു. ഓട്ടോ ഓഹരികളിൽ ഹീറോ മോട്ടോക്രോപ്പ് 3 ശതമാനം ഉയർന്നു. ഐടി ഓഹരികളിൽ വെള്ളിയാഴ്ചയും ഇടിവാണ്. എൽടിഐഎം, ടെക് മഹീന്ദ്ര, എച്ച്സിഎൽ എന്നിവ നഷ്ടത്തിലാണ് ക്ലോസ് ചെയ്തത്.

രൂപ ഡോളറിനെതിരെ 15 പൈസ നേട്ടത്തിൽ 83.04 നിലവാരത്തിൽ ക്ലോസ് ചെയ്തു.

തുടർച്ചയായ രണ്ടാം വാരത്തിലും നഷ്ടം, സെപ്റ്റംബറിൽ നേട്ടം

സെൻസെക്‌സ്, നിഫ്റ്റി, നിഫ്റ്റി ബാങ്ക് രണ്ടാം വാരത്തിലും നഷ്ടത്തിലാണ് ക്ലോസ് ചെയ്യുന്നത്. സെൻസെക്സ് 0.27 ശതമാനവും നിഫ്റ്റി 0.18 ശതമാനവും ഇടിവിലാണ്. ഈ ആഴ്‌ചയിലെ നഷ്ടം രേഖപ്പെടുത്തിയ പ്രധാന 10 നിഫ്റ്റി ഓഹരികളിൽ 6 എണ്ണവും ഐടി ഓഹരികളാണ്.

ടെക് മാഹീന്ദ്ര, ഇൻഫോസിസ്, എൽടിഐഎം, വിപ്രോ, എച്ച്‌സിഎൽ എന്നിവരാണ് മുന്നിൽ. ബജാജ് ഫിനാൻസ്, കോൾ ഇന്ത്യ, ഒഎൻജിസി, എൽ ആൻഡ് ടി, എൻടിപിസി, അപ്പോളോ ഹോസ്‌പിറ്റൽ എന്നിവ ഈ ആഴ്‌ച മികച്ച നേട്ടമുണ്ടാക്കി.

ഉയർന്ന പലിശ നിരക്ക് ആശങ്ക, വിദേശ നിക്ഷേപകരുടെ പിന്മാറ്റം, ആ​ഗോള സാമ്പത്തിക മാന്ദ്യ ഭീതി എന്നിവ സെപ്റ്റംബറിൽ വിപണിയെ ബാധിച്ച ആശങ്കകളാണ്. എന്നാൽ നിഫ്റ്റി 2 ശതമാനം നേട്ടത്തിലാണ് മാസം അവസാനിപ്പിക്കുന്നത്. സെൻസെക്സ് സെപ്റ്റംബറിൽ 1.50 ശതമാനം നേട്ടമുണ്ടാക്കി. ബിഎസ്ഇ സ്മോൾകാപ് സൂചിക 1 ശതമാനവും മിഡ്കാപ് സൂചിക 3.7 ശതമാനവും സെപ്റ്റംബറിൽ ഉയർന്നു.