ഓഹരി വിപണിക്ക് നേട്ടത്തോടെ തുടക്കം, 7 ലക്ഷം കോടി രൂപ തിരിച്ച് പിടിച്ച് നിക്ഷേപകർ, കുതിപ്പിന്‍റെ കാരണം അറിയാം

ഓഗസ്റ്റ് 6-തിങ്കളാഴ്ച വലിയ നഷ്ടമാണ് ഇന്ത്യൻ ഓഹരി വിപണി നേരിട്ടത്. സൂചികകൾ ഏകദേശം 3 ശതമാനത്തോളം ഇടിഞ്ഞു. 10 ലക്ഷം കോടി രൂപയ്ക്ക് മുകളിലാണ് നിക്ഷേപകർക്കുണ്ടായ നഷ്ടം. അതുകൊണ്ടു തന്നെ ചൊവ്വാഴ്ച വിപണിയുടെ വികാരം എന്തായിരിക്കും എന്ന ആശങ്ക നിക്ഷേപകരിലുണ്ടായിരുന്നു. എന്നാൽ ആശ്വാസം പകർന്ന് ഇന്ന് സൂചികകൾ നേട്ടത്തോടെയാണ് ആരംഭിച്ചത്.

7 ലക്ഷം കോടി നേട്ടം

തിങ്കളാഴ്ച 78,981.97-ൽ ക്ലോസ് ചെയ്ത സെൻസെക്സ് ഇന്ന് ഒരു ശതമാനം ഉയർന്ന് 79,852.08 ലെവലിലെത്തി. മറുവശത്ത്, നിഫ്റ്റി 50 അതിൻ്റെ മുൻ ക്ലോസായ 24,055.60 ന് എതിരെ 24,189.85 -ൽ ആരംഭിച്ചു. ബിഎസ്ഇ മിഡ്‌ക്യാപ്, സ്‌മോൾക്യാപ് സൂചികകൾ 2 ശതമാനം വീതം ഉയർന്നതോടെ വിപണിയിലെ മിഡ്, സ്‌മോൾക്യാപ് വിഭാഗങ്ങൾ ശക്തമായ നേട്ടം കൈവരിച്ചു.

ബിഎസ്ഇയിൽ ലിസ്റ്റ് ചെയ്തിട്ടുള്ള സ്ഥാപനങ്ങളുടെ മൊത്തത്തിലുള്ള മാർക്കറ്റ് ക്യാപിറ്റലൈസേഷൻ കഴിഞ്ഞ സെഷനിലെ ഏകദേശം 442 ലക്ഷം കോടി രൂപയിൽ നിന്ന് ഏകദേശം 449 ലക്ഷം കോടി രൂപയായി ഉയർന്നു. ആദ്യ അരമണിക്കൂറിലാണ് ഈ കുതിപ്പ് സൂചിക നടത്തിയത്. ഏകദേശം 7 ലക്ഷം കോടി രൂപയുടെ നേട്ടം.

ചാഞ്ചാട്ട സൂചികയായ ഇന്ത്യ വിക്സ് കഴിഞ്ഞ സെഷനിലെ 43 ശതമാനം കുതിച്ചുചാട്ടത്തെത്തുടർന്ന് ഏകദേശം 14 ശതമാനത്തിൻ്റെ കുത്തനെ ഇടിവ് രേഖപ്പെടുത്തി.

എന്തുകൊണ്ടാണ് ഇന്ത്യൻ ഓഹരി വിപണി ഇന്ന് ഉയരുന്നത്?

ആഗോള വിപണികളിൽ കണ്ട വീണ്ടെടുക്കൽ പ്രവണതയെ പ്രതിഫലിപ്പിച്ചുകൊണ്ട് ഇന്ത്യൻ ഓഹരി വിപണിയിൽ ശക്തമായ തിരിച്ചുവരവ് അനുഭവപ്പെട്ടു. ജപ്പാനിലെ നിക്കി 10 ശതമാനത്തിലധികം ഉയർന്നു, അതേസമയം യുഎസ് സ്റ്റോക്ക് ഫ്യൂച്ചറുകൾ ഏകദേശം 1% വർദ്ധിച്ചു, പ്രധാന സെൻട്രൽ ബാങ്കുകൾ സമ്പദ്‌വ്യവസ്ഥയെയും സാമ്പത്തിക വിപണിയെയും പിന്തുണയ്ക്കാൻ ദ്രുത നടപടി സ്വീകരിക്കാൻ തയ്യാറാണെന്ന സൂചനയാണ് ഫ്യൂച്ചറിന് നേട്ടമായത്.

പരിഭ്രാന്തി വേണ്ട

"അമേരിക്കയിലെ മാന്ദ്യത്തെക്കുറിച്ചുള്ള ഭയം അൽപ്പം അകാലവും അതിരുകടന്നതുമാണെന്ന് തോന്നുന്നു. നിക്ഷേപകർ പരിഭ്രാന്തരാകേണ്ടതില്ല. ഗുണമേന്മയുള്ള ലാർജ് ക്യാപ്‌സ് സാവധാനത്തിൽ ശേഖരിക്കാനാകും," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെൻ്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു.

ഇക്വിനോമിക്‌സ് റിസർച്ച് പ്രൈവറ്റ് ലിമിറ്റഡിൻ്റെ സ്ഥാപകനും ഗവേഷണ മേധാവിയുമായ ജി. ചൊക്കലിംഗം, യുഎസ് സമ്പദ്‌വ്യവസ്ഥ മാന്ദ്യത്തിലേക്ക് വഴുതിവീഴുമെന്ന് ഭയപ്പെടേണ്ട സാഹചര്യമില്ലെന്നാണ് പറഞ്ഞത്. അമേരിക്കൻ സമ്പദ്‌വ്യവസ്ഥ പെട്ടെന്ന് വലിയ തകർച്ച കാണാൻ പോകുന്നുവെന്നതിന് വ്യക്തമായ സൂചനകളൊന്നുമില്ലെന്നും അദ്ദേഹം കൂട്ടിച്ചേർത്തു.

നേട്ടവും നഷ്ടവും

മാരുതി സുസുക്കി, അദാനി പോർട്ട്‌സ്, എൻടിപിസി, എം ആൻഡ് എം, ഹിൻഡാൽകോ എന്നിവയാണ് നിഫ്റ്റിയിലെ പ്രധാന നേട്ടങ്ങൾ. അപ്പോളോ ഹോസ്പിറ്റൽസ്, എസ്‌ബിഐ ലൈഫ് ഇൻഷുറൻസ്, നെസ്‌ലെ, സിപ്ല തുടങ്ങിയ ഓഹരികൾ നേരത്തെ നഷ്ടത്തിലായി.

തിങ്കഴാഴ്ചത്തെ വീഴ്ച

തിങ്കളാഴ്ച സെന്‍സെക്‌സ് 2222.55 പോയിന്റ് (2.74%) തകര്‍ച്ചയോടെ 78,759.40ല്‍ ക്ലോസ് ചെയ്തു. നിഫ്റ്റി 662.10 പോയിന്റ് (2.68%) ഇടിഞ്ഞ് 24,055.60ല്‍ വ്യാപാരം അവസാനിപ്പിച്ചു. ബാങ്ക് നിഫ്റ്റി 2.45% (1258.05 പോയിന്റ്) താഴ്ന്ന് 50,092.10ല്‍ അവസാനിച്ചു. മിഡ് ക്യാപ് സൂചിക 3.55 ശതമാനം ഇടിഞ്ഞ് 55,857.25ലും സ്‌മോള്‍ ക്യാപ് സൂചിക 4.57% താഴ്ന്ന് 17,942.00ലും വ്യാപാരം അവസാനിപ്പിച്ചു.

വിദേശനിക്ഷേപകര്‍ തിങ്കളാഴ്ച ക്യാഷ് വിപണിയില്‍ 10,073.75 കോടി രൂപയുടെ ഓഹരികള്‍ വിറ്റു. സ്വദേശി ഫണ്ടുകളും സ്ഥാപനങ്ങളും കൂടി 9155.55 കോടി രൂപയുടെ ഓഹരികള്‍ വാങ്ങി.