ലാഭത്തിൽ വർധനവ്; പ്രതിയോഹരി 9 രൂപ ലാഭവിഹിതവും ഓഹരി ബൈബാക്കും പ്രഖ്യാപിച്ച് ടിസിഎസ്; ബൈബാക്ക് വില അറിയാം

ജൂലായ്- സെപ്റ്റംബർ പാദത്തിലെ പ്രവർത്തന ഫലം പുറത്ത് വിട്ട് ഐടി കമ്പനിയായ ടാറ്റ കൺസൾട്ടൻസി സർവീസ്. 2024 സാമ്പത്തിക വർഷത്തിന്റെ രണ്ടാം പാദത്തിൽ കമ്പനി 11,342 കോടിയുടെ അറ്റാദായം റിപ്പോര്‍ട്ട് ചെയ്തു. അറ്റാദായം വാര്‍ഷികാടിസ്ഥാനത്തില്‍ 9 ശതമാനം വര്‍ധിച്ചു. 59,692 കോടി രൂപയാണ് സെപ്റ്റംബർ പാദത്തിലെ വരുമാനം. വാര്‍ഷികാടിസ്ഥാനത്തില്‍ 8 ശതമാനത്തിന്റെ വര്‍ധനവുണ്ട്.

ഇബിഐടി 14,438 കോടി രൂപയും ഇബിഐടി മാര്‍ജിന്‍ 24.3 ശതമാനവുമാണ്. അതേസമയം മുന്‍പാദത്തെ അപേക്ഷിച്ച് വരുമാനത്തിലും ലാഭത്തിലും വളര്‍ച്ച കുറവാണ്. ജൂണ്‍പാദത്തെ അപേക്ഷിച്ച് അറ്റാദായത്തില്‍ 2.40 ശതമാനത്തിന്റെ വര്‍ധനവും വരുമാനം മുന്‍പാദത്തെ അപേക്ഷിച്ച് 0.5 ശതമാനം വര്‍ധനവും മാത്രമാണുള്ളത്.

ഓഹരിയൊന്നിന് 9 രൂപ എന്ന നിരക്കിൽ ഇടക്കാല ലാഭവിഹിതത്തിനും ഓഹരി ബൈബാക്കും ടിസിഎസ് ബോർഡ് ശുപാർശ ചെയ്തിട്ടുണ്ട്. 17,000 കോടി രൂപയുടെ ഓഹരികൾ 4,150 രൂപ നിരക്കിലാണ് തിരികെ വാങ്ങുന്നത്. രണ്ടാം പാദഫലത്തിന് മുന്നോടിയായി ബുധനാഴ്ച ടിസിഎസ് ഓഹരികള്‍ 0.52 ശതമാനം ഇടിവോടെയാണ് ക്ലോസ് ചെയ്തത്. 3,609.90 രൂപയിലാണ് ബുധനാഴ്ചയിലെ ക്ലോസിംഗ് നിലവാരം. ഒരാഴ്ചയ്ക്കിടെ 2.04 ശതമാനവും 2023 ല്‍ ഇതുവരെ 10.85 ശതമാനവും ഓഹരി മുന്നേറി.

ബാങ്കിംഗ് ധനകാര്യ സേവനങ്ങൾ, ഇൻഷുറൻസ് (ബിഎഫ്‌എസ്‌ഐ) വിഭാ​ഗത്തിൽ നിന്നുള്ള വരുമാനത്തിൽ ഒരു ശതമാനത്തിൽ താഴെ വളർച്ചയാണുള്ളത്. വരുമാനം 22,840 കോടി രൂപയായി. രണ്ടാം പാദത്തിൽ 11.2 ബില്യൺ ഡോളറിന്റെ ഓർഡർ ടിസിഎസ് നേടി.

നേരത്തെ നാല് തവണയാണ് ടാറ്റ കണ്‍സള്‍ട്ടന്‍സി സര്‍വീസ് ഓഹരി തിരികെ വാങ്ങിയത്. 2017 മേയില്‍ ഓഹരിക്ക് 2,850 രൂപ നിരക്കിലാണ് ബൈ ബാക്ക് നടന്നത്. 2018 സെപ്റ്റംബറില്‍ 2100 രൂപ നിരക്കിലും 2020 ഡിസംബറില്‍ 3000 രൂപ നിരക്കിലുമാണ് ഓഹരികള്‍ തിരികെ വാങ്ങിയത്.

അവസാനമായി 2022 മാര്‍ച്ചില്‍ 4,500 രൂപ നിരക്കിലാണ് ടിസിഎസ് ബൈ ബാക്ക് നടത്തിയത്. കഴിഞ്ഞ് 6 വർഷത്തിനിടെ നാല് തവണകളിലായി 66,000 കോടി രൂപ മൂല്യമുള്ള ഓഹരികളാണ് ടിസിഎസ് തിരികെ വാങ്ങിയത്.

കമ്പനി ഓഹരി ഉടമകളിൽ നിന്ന് ഓഹരികൾ തിരികെ വാങ്ങുന്ന പ്രക്രിയയാണ് ഓഹരി ബൈബാക്ക്. സാധാരണയായി നിലവിലുള്ള വിലയുടെ പ്രീമിയത്തിലാണ് ഓഹരി ബൈബാക്ക് നടത്തുക. ഓഹരി ഉടമകൾക്ക് ലാഭത്തോടെ ഓഹരികൾ ഒഴിവാക്കാൻ അതുവഴി സാധിക്കും. ഓഹരി തിരികെ വാങ്ങുന്നത് മാനേജ്‌മെന്റിന് ബിസിനസിലുള്ള വിശ്വാസത്തിന്റെ സൂചനയായി കണക്കാക്കും.

തുടര്‍ച്ചയായി ഡിവിഡന്റ് നല്‍കുന്ന കമ്പനികളിലൊന്നാണ് ടിസിഎസ്. 2004 ഒക്ടോബര്‍ 28 മുതല്‍ 81 തവണ കമ്പനി ലാഭവിഹിതം നല്‍കിയിട്ടുണ്ട്. ത്രൈമാസത്തില്‍ ലാഭവിഹിതം നല്‍കുന്ന ചുരുക്കം കമ്പനികളിലൊന്നാണിത്. കഴിഞ്ഞ 12 മാസത്തിനിടെ ഓഹരി 116 രൂപ ലാഭവിഹിതം നല്‍കിയിട്ടുണ്ട്.