വായ്പ തിരിച്ചടവ് മുടങ്ങിയാല്‍ എന്തു സംഭവിക്കും?

ബാങ്കുകളില്‍ നിന്നും ധനകാര്യസ്ഥാപനങ്ങളില്‍ നിന്നും വായ്പയെടുത്ത് തിരിച്ചടയ്ക്കാത്തവരുടെ എണ്ണം കൂടി വരികയാണ്. പ്രത്യേകിച്ചും വിദ്യാഭ്യാസ വായ്പയും കാര്‍ഷിക വായ്പയുമെടുത്തവര്‍. സര്‍ക്കാര്‍ എന്നെങ്കിലും ഇതെല്ലാം എഴുതി തള്ളുമെന്നാണ്. എന്നാല്‍ ഇനിയുള്ള കാലം ഇതിനുള്ള സാധ്യത വളരെ കുറവാണെന്ന് മനസ്സിലാക്കണം.

വായ്പ അടക്കാതിരുന്നാല്‍ പലിശയും കൂട്ടുപലിശയും പിഴ പലിശയും ചേര്‍ന്ന് വലിയൊരു കടക്കെണിയിലേക്കാണ് നമ്മളെ കൊണ്ടു ചെന്നെത്തിക്കുയെന്ന കാര്യത്തില്‍ സംശയം വേണ്ട.

സിബിലിന്റെ ക്രെഡിറ്റ് റേറ്റിങിനെ കുറിച്ച് നിങ്ങള്‍ക്കറിയാമോ? വായ്പ തിരിച്ചടവ് തെറ്റിയാല്‍ റേറ്റിങ് കുത്തനെ താഴും. വിദ്യാഭ്യാസ വായ്പയുടെ തിരിച്ചടവ് തെറ്റിയ ഒരാള്‍ക്ക് മറ്റു ലോണുകള്‍ കിട്ടാനുള്ള സാധ്യത വളരെ കുറവായിരിക്കും. ഭാവിയില്‍ ഭവന വായ്പയും വാഹനവായ്പയും വ്യക്തിഗത വായ്പയും ലഭിക്കാത്ത അവസ്ഥ വരുമെന്ന് ചുരുക്കം.

ആദ്യകാലത്ത് ലോണുകള്‍ക്കു വേണ്ടി മാത്രമാണ് ക്രെഡിറ്റ് സ്‌കോറുകള്‍ പരിഗണിച്ചിരുന്നതെങ്കില്‍ ഇപ്പോള്‍ ജോലിക്കും വീട് വാടകയ്ക്കും മൊബൈല്‍ കണക്ഷനും ക്രെഡിറ്റ് കാര്‍ഡിനും ഇത് നോക്കുന്നുണ്ട്. ബാങ്ക് ലോണ്‍ എടുത്ത് വിദ്യാഭ്യാസം നേടുന്നവരുടെ സര്‍ട്ടിഫിക്കറ്റില്‍ പോലും വളരെ ഗോപ്യമായ രീതിയില്‍ ഇക്കാര്യം രേഖപ്പെടുത്തുന്നതിനെ കുറിച്ച് സര്‍ക്കാര്‍ ആലോചിക്കുന്നുണ്ടെന്നാണ് വിവരം.