അടിസ്ഥാന ഇളവ് പരിധിയിൽ വർധനവ്? ബജറ്റ് എത്തുമ്പോൾ വ്യക്തി​ഗത നികുതിയിൽ പ്രതീക്ഷിക്കുന്ന മാറ്റങ്ങളെന്തെല്ലാം

നാളെയാണ് കേന്ദ്ര ബജറ്റ്. ഇടക്കാല ബജറ്റിൽ വലിയ പ്രഖ്യാപനങ്ങളുണ്ടാകില്ലെന്ന കേന്ദ്ര ധനമന്ത്രി നിർമലാ സീതാരാമന്റെ പ്രഖ്യാപനമുണ്ടെങ്കിലും പലരും പ്രതീക്ഷയോടെയാണ് ബജറ്റിനെ കാണുന്നത്. തുടർച്ചയായ ആറാം ബജറ്റാണ് നിർമലാ സീതാരാമന്റേത്. 2019 ജൂലൈ മുതൽ, രാജ്യത്തെ ആദ്യത്തെ മുഴുവൻ സമയ വനിതാ ധനമന്ത്രിയായ സീതാരാമൻ അഞ്ച് സമ്പൂർണ ബജറ്റുകൾ ഇതിനോടകം പൂർത്തിയാക്കി.

ഫെബ്രുവരി ഒന്നിന് ഇടക്കാല ബജറ്റ് അവതരണത്തോടെ മൻമോഹൻ സിംഗ്, അരുൺ ജെയ്റ്റ്‌ലി, പി ചിദംബരം, യശ്വന്ത് സിൻഹ എന്നിവരുൾപ്പെടെ അഞ്ച് ബജറ്റ് എന്ന റെക്കോർഡിനെയും നിർമലാ സീതാരാമൻ മറികടക്കും. ഇതോടെ മൊറാർജി ദേശായിയുടെ കണക്കിനൊപ്പമെത്തും.

നിർമലാ സീതാരാമന്റെ ബജറ്റിന്റെ ഉള്ളടക്കത്തിലേക്ക് പ്രതീക്ഷകളെ കൊണ്ടുപോയാൽ വ്യക്തി​ഗത നികുതിയിൽ കാര്യമായ മാറ്റം പ്രതീക്ഷിക്കുന്നുണ്ട്. കഴിഞ്ഞ സമ്പൂർണ ബജറ്റിൽ ആദായ നികുതിയുമായി ബന്ധപ്പെട്ട് വന്ന മാറ്റങ്ങളുടെ ചുവട് പിടിച്ച് വ്യക്തി​ഗത ആദായ നികുതിയിൽ പ്രതീക്ഷിക്കുന്ന ചില പ്രഖ്യാപനങ്ങൾ നോക്കാം.

അടിസ്ഥാന ഇളവ് പരിധി

2023 ലെ ബജറ്റിൽ കേന്ദ്ര സർക്കാർ നിരവധി പരിഷ്കാരങ്ങൾ കൊണ്ടുവന്നിരുന്നു. പുതിയ നികുതി വ്യവസ്ഥയെ ഡിഫോൾട്ട് വ്യവസ്ഥയായി മാറ്റുകയും നികുതി സ്ലാബുൾ പരിഷ്കരിക്കുകയും ചെയ്തിരുന്നു. അതേസമയം രണ്ട് നികുതി വ്യവസ്ഥയ്ക്ക് കീഴിലുള്ള അടിസ്ഥാന ഇളവ് പരിധി മാറ്റമില്ലാതെ തുടരുകയാണ്. ഇത് കുറഞ്ഞത് 50,000 രൂപയെങ്കിലും ഉയർത്തിയേക്കുമെന്നാണ് പ്രതീക്ഷിക്കുന്നത്. അടിസ്ഥാന ഇളവ് പരിധിയിലെ വർധനവ് എല്ലാ നികുതിദായകരുടെയും നികുതി ബാധ്യത കുറയ്ക്കും.

സ്റ്റാൻഡേർഡ് ഡിഡക്ഷൻ

നിലവിലെ ആദായനികുതി വ്യവസ്ഥ പ്രകാരം, പഴയതും ലളിതവുമായ നികുതി വ്യവസ്ഥയ്ക്ക് കീഴിൽ ശമ്പളമുള്ള നികുതിദായകന് 50,000 രൂപയുടെ സ്റ്റാൻഡേർഡ് കിഴിവ് അനുവദിച്ചിട്ടുണ്ട്. ജീവിതച്ചെലവ് വർധിക്കുന്ന സാഹചര്യത്തിൽ ശമ്പളം വാങ്ങുന്ന ജീവനക്കാരുടെ സ്റ്റാൻഡേർഡ് ഡിഡക്ഷൻ 50,000 രൂപയിൽ നിന്ന് 1,00,000 രൂപയായി വർധിപ്പിക്കുന്ന കാര്യം സർക്കാർ പരിഗണിക്കുമെന്ന് പ്രതീക്ഷിക്കുന്നു.

ആ​രോ​ഗ്യ ഇൻഷൂറൻസ്

സെക്ഷൻ 80ഡി പ്രകാരം ആരോ​ഗ്യ ഇൻഷുറൻസ് പ്രീമിയങ്ങളുടെ നികുതി ഇളവ്, വ്യക്തികൾക്ക് 25,000 രൂപയും മുതിർന്ന പൗരന്മാർക്ക് 50,000 രൂപയുമാണ്. വർധിച്ചു വരുന്ന ആരോ​ഗ്യ ചെലവുകളെ പരി​ഗണിച്ച് ഇവ യഥാക്രമം 50,000 രൂപയായും 75,000 രൂപയായും വർധിപ്പിക്കുമെന്നാണ് പ്രതീക്ഷ. അതോടൊപ്പം ആരോ​ഗ്യ സേവനങ്ങൾക്ക് തുല്യ പ്രാധാന്യം ലഭിക്കാൻ പുതിയ നികുതി വ്യവസ്ഥയിലും സെക്ഷൻ 80ഡി ആനുകൂല്യങ്ങൾ വിപുലീകരിക്കേണ്ടതുണ്ട്.

മൂലധന നേട്ട നികുതി

സെക്യൂരിറ്റികളിൽ നിന്നുള്ള ലാഭം മൂലധന നേട്ടത്തിന്റെ പരിധിയിലാണ് വരുന്നത്. മൂലധന ആസ്തിയുടെ കൈമാറ്റം വഴി നടക്കുന്ന ഈ വരുമാനത്തിന് നികുതി ബാധകമാണ്. മൂലധന നേട്ടത്തെ ഇതിന്റെ കാലയളവ് അടിസ്ഥാനമാക്കി ഹ്രസ്വകാല മൂലധന നേട്ടം, ദീർഘകാല മൂലധന നേട്ടം എന്നിങ്ങനെ തരം തിരിച്ചിട്ടുണ്ട്.

നിക്ഷേപ കാലയളവ്, നികുതി നിരക്ക്, റസിഡൻസി സ്റ്റാറ്റസ് എന്നിങ്ങനെ നിരവധി ഘടകങ്ങൾ കണക്കിലെടുത്താണ് നികുതി കണക്കാക്കുന്നത്. സർക്കാർ ഇക്വിറ്റി, ഡെറ്റ് സെക്യൂരിറ്റികളുടെ വർഗ്ഗീകരണം കാര്യക്ഷമമാക്കുകയും ലിസ്‌റ്റ് ചെയ്‌തതും ലിസ്‌റ്റ് ചെയ്യാത്തതുമായ സെക്യൂരിറ്റികൾക്കുള്ള നികുതി ഏകീകരിക്കുകയും ഇൻഡെക്‌സേഷൻ വ്യവസ്ഥകൾ ലളിതമാക്കുകയും ചെയ്യുമെന്നാണ് ഈ രം​ഗത്തുള്ളവരുടെ പ്രതീക്ഷ.

ബം​ഗളൂരുവിന് മെട്രോ സിറ്റി പദവി

ആദായ നികുതി ആവശ്യങ്ങൾക്ക് പരി​ഗണിക്കുമ്പോൾ ബാം​ഗളൂരു ഇന്നും നോൺ മെട്രോ ന​ഗരമാണ്. ആദായ നികുതി നിയമപ്രകാരം മെട്രോന​ഗരങ്ങളിൽ എച്ച്ആർഎ കിഴിവുകൾ 50 ശതമാനമാണ്. എന്നാൽ ബം​ഗളൂരുവിന് ഈ പദവി ലഭിക്കാത്തതിനാൽ 40 ശതമാനം ഇളവ് മാത്രമാണ് ലഭിക്കുന്നത്. എച്ചആർഎ ഇളവുകൾക്കായി നിലവിൽ ഡൽഹി, മുംബൈ, ചെന്നൈ, കൊൽക്കത്ത എന്നീ നഗരങ്ങളെ മാത്രമാണ് ആദായ നികുതി നിയമം മെട്രോ ​ന​ഗരങ്ങളായി കണക്കാക്കുന്നത്.