പ്രതിമാസം 12,500 നിക്ഷേപിക്കൂ... സർക്കാർ ഉറപ്പിൽ 15 വർഷം കൊണ്ട് 41 ലക്ഷം നേടാം

കേന്ദ്ര സർക്കാർ പിന്തുണയുള്ള സുരക്ഷിതവും ആദായ നികുതി ഇളവുകളുമുള്ള നിക്ഷേപ പദ്ധതിയാണ് പബ്ലിക് പ്രൊവിഡന്റ് ഫണ്ട് (പിപിഎഫ്). ദീർഘകാലാടിസ്ഥാനത്തിൽ ചെറിയ നിക്ഷേപ തുകയിലൂടെ നല്ലൊരു സമ്പാദ്യം നേടിയെടുക്കാൻ ഉതകുന്ന പദ്ധതിയാണിത്. നിലവിൽ 7.1 ശതമാനമാണ് പിപിഎഫ് പലിശ നിരക്ക്. 15 വർഷമാണ് പിപിഎഫ് പദ്ധതിയുടെ കാലാവധി എങ്കിലും, 5 വർഷത്തേക്ക് ഒന്നോ അതിലധികമോ ബ്ലോക്കുകളിലേക്ക് നീട്ടാവുന്നതാണ്. റിട്ടയർമെന്റ് ജീവിതം മുന്നിൽ കാണുന്നവർക്കുള്ള മികച്ചൊരു ഓപ്ഷനാണിത്.

ആദായനികുതി നിയമത്തിലെ സെക്ഷൻ 80 സി പ്രകാരം പിപിഎഫ് നിക്ഷേപങ്ങൾക്ക് നികുതിയിളവിന് അർഹതയുണ്ട്. പിപിഎഫ് നിക്ഷേപങ്ങളിൽ നിന്ന് ലഭിക്കുന്ന പലിശ പൂർണമായും നികുതി രഹിതമാണ്. നിക്ഷേപം തുടങ്ങി ഏഴാം വർഷം മുതൽ ചില നിബന്ധനകൾക്ക് വിധേയമായി ഭാഗിക പിൻവലിക്കലുകൾ പിപിഎഫ് അനുവദിക്കുന്നുണ്ട്. 3 മുതൽ 6 വർഷം കാലയളവിൽ പിപിഎഫ് അക്കൗണ്ടിൽ നിന്ന് ലോൺ എടുക്കാനുള്ള സൗകര്യവും ഉണ്ട്.

ഏതെങ്കിലും അംഗീകൃത ബാങ്കിന്റെയോ പോസ്റ്റ് ഓഫീസിന്റെയോ ശാഖയിൽ പിപിഎഫ് അക്കൗണ്ടുകൾ തുറക്കാം. അക്കൗണ്ട് തുറന്നു കഴിഞ്ഞാൽ ഏത് സമയത്തും പണം നിക്ഷേപിക്കാം. ഒന്നോ അതിലധികമോ വ്യക്തികളുടെ പേരിൽ നോമിനേഷൻ സൗകര്യം ലഭ്യമാണ്. പിപിഎഫ് എന്നത് ഗവൺമെന്റ് പിന്തുണയുള്ള ഒരു പദ്ധതിയായതിനാൽ നിങ്ങളുടെ നിക്ഷേപങ്ങൾ സുരക്ഷിതമാണ്.

യു.പി.ഐ ഇടപാടുകൾക്ക് പുതിയ മാർ​ഗനിർദ്ദേശങ്ങൾ: ആർക്കെല്ലാം ഈ സേവനങ്ങൾ ലഭിക്കും?

പ്രതിമാസം 12,500 രൂപ നിക്ഷേപിച്ച് 41 ലക്ഷം എങ്ങനെ സമ്പാദിക്കാം?

പിപിഎഫ് അക്കൗണ്ടിൽ പ്രതിമാസം 12,500 രൂപ നിക്ഷേപിച്ചാൽ പദ്ധതിയുടെ കാലാവധി പൂർത്തിയാകുന്ന സമയത്ത് 41 ലക്ഷം സമ്പാദിക്കാൻ കഴിയും. അതായത്, ഒരു വർഷം നിങ്ങളുടെ അക്കൗണ്ടിൽ 1.5 ലക്ഷം നിക്ഷേപിക്കപ്പെടും. 15 വർഷം കണക്കാക്കുമ്പോൾ ആകെ നിക്ഷേപം 22,50,000 ആണ്. നിലവിലെ പലിശ നിരക്കായ 7.1% ശതമാനം കണക്കാക്കുമ്പോൾ, പലിശ ഇനത്തിൽ 18,18,209 രൂപ അക്കൗണ്ടിൽ നിക്ഷേപിക്കപ്പെടും. കാലാവധി പൂർത്തിയാകുമ്പോഴത്തെ നിങ്ങളുടെ സമ്പാദ്യം 40,68,209 രൂപയാണ്.

റിട്ടയർമെന്റ് പ്ലാൻ ചെയ്യുന്നുണ്ടോ? പ്രതിമാസം 2.5 ലക്ഷം അക്കൗണ്ടിൽ എത്തും; ഇങ്ങനെ നിക്ഷേപം നടത്തൂ

പ്രതിമാസം 12,500 രൂപ നിക്ഷേപിച്ച് 1.5 കോടി എങ്ങനെ സമ്പാദിക്കാം?

പദ്ധതി കാലാവധി 15 വർഷം കൂടി കൂട്ടുകയാണെങ്കിൽ 30 വർഷം കൊണ്ട് നിങ്ങൾക്ക് കയ്യിൽ കിട്ടുക 1.5 കോടിയാണ്. അതായത്, നിങ്ങളുടെ ഒരു വർഷത്തെ നിക്ഷേപം 1.5 ലക്ഷമാണ്. 30 വർഷം പൂർത്തിയാകുമ്പോൾ 45,00,000 ആണ് നിക്ഷേപ തുക. പലിശ ഇനത്തിൽ കിട്ടുക 1,09,50,911 രൂപയാണ്. അങ്ങനെയെങ്കിൽ നിങ്ങളുടെ അക്കൗണ്ടിലെ നിക്ഷേപം 1,54,50911 രൂപയാണ്.