2 വർഷ സ്ഥിര നിക്ഷേപത്തിന് 7% പലിശ; എസ്ബിഐയിൽ ഒരു ലക്ഷം രൂപ എഫ്ഡിയിട്ടാൽ റിട്ടേൺ എത്ര? കണക്കുകൾ ഇങ്ങനെ

ഉയർന്ന ലിക്വിഡിറ്റിയും ഉറപ്പുള്ള പലിശ വരുമാനവും വാഗ്ദാനം ചെയ്യുന്നതിനാൽ മിക്കവരുടെയും പോർട്ട്ഫോളിയോയിൽ സ്ഥിര നിക്ഷേപത്തിന് സാധ്യതയുണ്ട്. എമർജൻസി കോർപ്പസ് നിർമിക്കുന്നതിനും മറ്റും സ്ഥിര നിക്ഷേപങ്ങൾ അനുയോജ്യമായ മാർ​ഗങ്ങളാണ്. സമീപ കാലത്തേക്ക് ആവശ്യമായി വരുന്ന തുകകൾ സൂക്ഷിക്കാനും അനുയോജ്യം സ്ഥിര നിക്ഷേപങ്ങൾ തന്നെ. രണ്ട് വർഷത്തിന് ശേഷം ആവശ്യമായി വരുന്ന തുക ഇത്തരത്തിൽ നിക്ഷേപിക്കാവുന്നതാണ്.

രാജ്യത്തെ മുൻനിര ബാങ്കുകളിൽ നിന്നുള്ള പലിശ നിരക്ക് പരിശോധിച്ചാൽ രണ്ട് വർഷത്തേക്കുള്ള സ്ഥിര നിക്ഷേപങ്ങൾക്ക് റെ​ഗുലർ നിക്ഷേപകർക്ക് 7 ശതമാനത്തിന് മുകളിൽ നിരക്ക് ലഭിക്കുന്നുണ്ട്. 1 ലക്ഷം രൂപ സ്ഥിര നിക്ഷേപമിടുമ്പോൾ ഈ ബാങ്കുകളിലെ പലിശ നിരക്ക് പ്രാകാരം എത്ര രൂപ റിട്ടേൺ ലഭിക്കുമെന്ന് നോക്കാം.

7.25 ശതമാനം പലിശ

രണ്ട് വർഷത്തെ സ്ഥിര നിക്ഷേപത്തിന് ബാങ്ക് ഓഫ് ഇന്ത്യ 7.25 ശതമാനം വരെ പലിശ നൽകുന്നുണ്ട്. പൊതുമേഖലാ ബാങ്കുകളിൽ ഏറ്റവും ഉയർന്ന നിരക്ക് നൽകുന്നത് ബാങ്ക് ഓഫ് ഇന്ത്യയാണ്. ഒരു ലക്ഷം രൂപ രണ്ട് വർഷത്തേക്ക് 7.25 ശതമാനം പലിശയിൽ നിക്ഷേപിക്കുമ്പോൾ 1.15 ലക്ഷം രൂപയായി വളരും.

7.10 ശതമാനം പലിശ

ആക്‌സിസ് ബാങ്കും ഐസിഐസിഐ ബാങ്കും രണ്ട് വർഷ കാലയളവിൽ സ്ഥിര നിക്ഷേപങ്ങൾക്ക് 7.10 ശതമാനം പലിശ ലഭിക്കും. സ്വകാര്യ ബാങ്കുകളിൽ മികച്ച പലിശ നിരക്ക് നൽകുന്നത് ഈ രണ്ട് ബാങ്കുകളാണ്. ഒരു ലക്ഷം രൂപ രണ്ട് വർഷ കാലയളവിൽ 7.10 ശതമാനം പലിശ നിരക്കിൽ നിക്ഷേപിച്ചാൽ 1.15 ലക്ഷം രൂപയായി വളരും.

7 ശതമാനം പലിശ

എച്ച്‌ഡിഎഫ്‌സി ബാങ്കും സ്റ്റേറ്റ് ബാങ്ക് ഓഫ് ഇന്ത്യയും 2 വർഷ കാലയളവിലുള്ള സ്ഥിര നിക്ഷേപങ്ങൾക്ക് 7 ശതമാനം പലിശ നൽകുന്നുണ്ട്. എസ്ബിഐയിൽ നിക്ഷേപിക്കുന്ന ഒരു ലക്ഷം രൂപ രണ്ടു വർഷത്തിനുള്ളിൽ 1.15 ലക്ഷം രൂപയായി വളരും.

6.85 ശതമാനം പലിശ

കാനറ ബാങ്കും ബാങ്ക് ഓഫ് ബറോഡയും രണ്ട് വർഷ കാലയളവിലെ സ്ഥിര നിക്ഷേപങ്ങൾക്ക് 6.85 ശതമാനം വരെ പലിശ നൽകുന്നുണ്ട്. ആ ബാങ്കുകളിൽ നിക്ഷേപിച്ച ഒരു ലക്ഷം രൂപ രണ്ടു വർഷത്തിനുള്ളിൽ 1.15 ലക്ഷം രൂപയായി വളരും.

6.80 ശതമാനം പലിശ

പഞ്ചാബ് നാഷണൽ ബാങ്കിൽ 6.80 ശതമാനം പലിശ നിരക്കിൽ രണ്ട് വർഷത്തെ സ്ഥിര നിക്ഷേപം ആരംഭിക്കാം. ഇവിടെ നിക്ഷേപിച്ച ഒരു ലക്ഷം രൂപ രണ്ടു വർഷത്തിനുള്ളിൽ 1.14 ലക്ഷം രൂപയായി വളരും.

ഇന്ത്യൻ ബാങ്കും യൂണിയൻ ബാങ്ക് ഓഫ് ഇന്ത്യയും രണ്ട് വർഷത്തെ സ്ഥിര നിക്ഷേപങ്ങൾക്ക് 6.50 ശതമാനം പലിശ നൽകും. ഈ ബാങ്കുകളിൽ 6.50 ശതമാനം പലിശ നിരക്കിൽ ഒരു ലക്ഷം രൂപ നിക്ഷേപിച്ചാൽ രണ്ടു വർഷത്തിനുള്ളിൽ 1.14 ലക്ഷം രൂപയായി വളരും.

നിക്ഷേപം സുരക്ഷിതം

ആർബിഐയുടെ അനുബന്ധ സ്ഥാപനമായ ഡെപ്പോസിറ്റ് ഇൻഷുറൻസ് ആൻഡ് ക്രെഡിറ്റ് ഗ്യാരൻ്റി കോർപ്പറേഷൻ (ഡിഐസിജിസി) ബാങ്ക് നിക്ഷേപങ്ങൾക്ക് ഇൻഷൂറൻസ് പരിരക്ഷ നൽകുന്നുണ്ട്. 5 ലക്ഷം രൂപ വരെയുള്ള സ്ഥിരനിക്ഷേപങ്ങൾക്ക് ഗ്യാരണ്ടി ലഭിക്കും. സ്ഥിര നിക്ഷേപ തുകയും പലിശയും അടക്കമാണ് 5 ലക്ഷത്തിന്റെ പരിധി.