സ്വർണം ട്രാക്ക് മാറ്റുന്നു; വാങ്ങാനിരിക്കുന്നവർക്ക് ആശ്വാസം; ആ​ഗോള വിപണിയിൽ നിന്ന് ശുഭ വാർത്ത

സ്വര്‍ണം വാങ്ങാനിരിക്കുന്നവര്‍ക്ക് ആശ്വാസ വാര്‍ത്തയാണ് സ്വര്‍ണ വിപണിയില്‍ നിന്നുള്ളത്. ഒരാഴ്ച മുന്‍പ് റെക്കോര്‍ഡ് ഉയരം താണ്ടിയ സ്വര്‍ണ വില പതിയെ താഴേക്ക് ഇറങ്ങുകയാണ്. ആഗോള വിപണിയിലെ സാധ്യതകള്‍ പരിശോധിച്ചാല്‍ സ്വര്‍ണ വില ട്രാക്ക് മാറ്റിയതായി കാണാം. അന്താരാഷ്ട്ര മാര്‍ക്കറ്റിലും സ്വര്‍ണ വില ഇടിയുകയാണ്. തിങ്കളാഴ്ചയിലേക്കും ഇടിവ് തുടർന്ന സ്വർണ വില കേരള വിപണിയിൽ മാസത്തിലെ താഴ്ന്ന നിലയിലെത്തി.

തുടര്‍ച്ചയായ രണ്ടാം ദിവസവും കേരള വിപണിയില്‍ സ്വര്‍ണ വില ഇടിവിലാണ്. തിങ്കളാഴ്ച 160 രൂപയാണ് കേരള വിപണിയില്‍ പവന് കുറഞ്ഞത്. ഒരു പവന്‍ 45,560 രൂപയിലാണ് തിങ്കളാഴ്ച വ്യാപാരം നടക്കുന്നത്. ഗ്രാമിന് 20 രൂപ കുറഞ്ഞ് 5,695 രൂപയിലാണ് സ്വര്‍ണം വ്യാപാരം നടക്കുന്നത്. മാസത്തിലെ താഴ്ന്ന നിലവാരമാണിത്.

വില ഇടിവിനുള്ള കാരണം

വെള്ളിയാഴ്ച മുതൽ സ്വർണ വില ട്രാക്ക് മാറ്റിയതായി കാണാം. പ്രതീക്ഷിച്ചതിലും ശക്തമായ യുഎസ് തൊഴിൽ ഡാറ്റ വെള്ളിയാഴ്ച പുറത്തു വന്നതോടെ അടുത്ത വർഷം മാർച്ചോടെ യുഎസ് പലിശനിരക്ക് കുറയ്ക്കുന്നതിനുള്ള സാധ്യത കുറഞ്ഞതാണ് വില ഇടിച്ചത്. പലിശ നിരക്ക് കുറയ്ക്കുന്നതിനുള്ള സാധ്യത മങ്ങിയതോടെ ഡോളറും ട്രഷറി യീൽഡും ശക്തിപ്രാപിച്ചതിനാൽ വെള്ളിയാഴ്ച സ്വർണവില ഇടിഞ്ഞു.

വെള്ളിയാഴ്ചയിലെ കനത്ത ഇടിവിന് ശേഷമാണ് തിങ്കളാഴ്ചയും വില താഴേക്ക് പതിക്കുന്നത്. വെള്ളിയാഴ്ച 440 രൂപ കുറഞ്ഞ് 45,720 രൂപയിലേക്കാണ് സ്വര്‍ണ വില എത്തിയത്. ശനിയാഴ്ച മാറ്റമില്ലാതെ തുടര്‍ന്ന ശേഷമാണ് ഇന്ന് 160 രൂപ പവന് കുറഞ്ഞത്.

ആ​ഗോള വിപണിയിൽ

വെള്ളിയാഴ്ചയിലെ ഇടിവ് ശേഷം തിങ്കളാഴ്ച വ്യാപാരം ആരംഭിച്ചപ്പോഴും ആ​ഗോള വിപണിയിൽ സ്വർണ വില താഴേക്ക് തന്നെയാണ്. സ്പോട്ട് ​ഗോൾഡ് ഔൺസിന് 2,000 ഡോളറിന് താഴേക്ക് എത്തി. 0.25 ശതമാനം ഇടിവോടെ 1,998.72 ഡോളർ നിലവാരത്തിലാണ് സ്പോട്ട് ​ഗോൾഡ് വ്യാപാരം നടക്കുന്നത്.

ഈ ആഴ്ച അമേരിക്കയിൽ ഫെഡറൽ റിസർവ് യോ​ഗം നടക്കുന്നുണ്ട്. യുഎസ് പണപ്പെരുപ്പ ഡാറ്റയും ഈ വാരം പ്രതീക്ഷിക്കുന്നു. വിപണി വികാരം മാറുന്നതിനിടെ ഡോളർ 104 നിലവാരത്തിലേക്ക് തിരികെ കയറി. 0.06 ശതമാനം നേട്ടത്തോടെ 104.07 നിലവാരത്തിലാണ് സ്വർണം.

ഇനിയുള്ള സാധ്യത എന്ത്?

ശക്തമായ തൊഴിൽ ഡാറ്റ പുറത്ത് വന്നതോടെ മാർച്ചിൽ ഫെഡറൽ റിസർവ് പലിശ നിരക്ക് കുറയ്ക്കുമെന്ന പ്രതീക്ഷയ്ക്ക് മങ്ങലേൽപ്പിച്ചതോടെയാണ് സ്വർണം ഇടിഞ്ഞത്. കഴിഞ്ഞ ആഴ്‌ച 3.3 ശതമാനം ഇടിഞ്ഞാണ് സ്വർണം വ്യാപാരം അവസാനിപ്പിച്ചത്. വെള്ളിയാഴ്ച പുറത്തു വന്ന തൊഴിൽ ഡാറ്റ പ്രകാരം യു.എസിലെ നോൺ ഫാം ശമ്പളപ്പട്ടികയിൽ സാമ്പത്തിക വിദഗ്ധരുടെ പ്രതീക്ഷകൾക്ക് മുകളിലുള്ള വളർച്ചയാണുള്ളത്.

അതേസമയം ഇനി സ്വർണ വില കയറില്ലെന്ന് ഇതിന് അർഥമില്ല. പലിശ നിരക്ക് കുറയ്ക്കുന്നതുമായി ബന്ധപ്പെട്ട കൂടുതൽ വ്യക്തതയ്ക്കായി നവംബറിലെ യുഎസ് കൺസ്യൂമർ പ്രൈസ് റിപ്പോർട്ടിലേക്ക് വിപണി ഉറ്റുനോക്കുന്നത്. ചൊവ്വാഴ്ചയാണ് ഡാറ്റ പുറത്തു വരുന്നത്. അതോടൊപ്പം ഫെഡറൽ റിസർവ് യോ​ഗത്തിലെ തീരുമാനങ്ങളും സ്വർണത്തിന്റെ മുന്നോട്ടുള്ള പ്രയാണത്തിൽ നിർണായകമാണ്.

1,520 രൂപയുടെ ഇടിവ്

സ്വര്‍ണത്തെ സംബന്ധിച്ച് കഴിഞ്ഞാഴ്ച മുതല്‍ ഇടിവിന്റെ സമയമാണ്. ആഴ്ചയിലെ ആദ്യ ദിവസമായ ഡിസംബര്‍ നാല് തിങ്കളാഴ്ച 47,080 രൂപയിലായിരുന്നു സ്വര്‍ണം. സര്‍വകാല ഉയരമായിരുന്നു ഈ നിലവാരം. കൃത്യം ഒരാഴ്ചയ്ക്ക് ശേഷം 1,520 രൂപയാണ് സ്വര്‍ണ വിലയില്‍ ഉണ്ടായ ഇടിവ്.