ചാഞ്ചാട്ടം തുടർന്ന് സ്വർണ വില; കേരളത്തിൽ 44,000 രൂപ നിലവാരത്തിൽ തുടരുന്നു; ആ​ഗോള വിപണിയിൽ താഴേക്ക്

ഫെഡറൽ റിസർവിന്റെ പലിശ നിരക്ക് സംബന്ധിച്ച തീരുമാനത്തിന് പിന്നാലെ സ്വർണ വിലയിൽ ഇടിവ്. ആ​ഗോള വിപണിയിൽ ഡോളറും ബോണ്ട് യീൽഡും കരുത്താർജിച്ചതോടെ സ്വർണം താഴേക്കിറങ്ങി. ഇതിന്റെ ചുവട് പിടിച്ച് ആഭ്യന്തര വിപണിയിലും വില കുറഞ്ഞു. കേരളത്തിൽ വ്യാഴാഴ്ച 120 രൂപയാണ് പവന് കുറഞ്ഞത്. 44,040 രൂപയിലാണ് കേരളത്തിൽ വ്യാഴാഴ്ച ഒരു പവൻ വ്യാപാരം നടക്കുന്നത്. ​ഗ്രാമിന് 15 രൂപയാണ് ഇടിഞ്ഞത്. 5,505 രൂപയിലാണ് ഇന്നത്തെ വിലനിലവാരം.

കൂടിയും കുറഞ്ഞും ഈ വാരം

തിങ്കളാഴ്ച രേഖപ്പെടുത്തിയ അതേ നിരക്കിലാണ് സ്വര്‍ണ വില ഇന്നും വ്യാപാരം നടക്കുന്നത്. തിങ്കളാഴ്ച 120 രൂപ വര്‍ധിച്ചാണ് സ്വര്‍ണ വില 44,040 രൂപയിലേക്ക് എത്തിയത്. തൊട്ടടുത്ത ദിവസം വീണ്ടും 120 രൂപ വര്‍ധിച്ച് 44,160 രൂപയിലെത്തിയിരുന്നു. ബുധനാഴ്ച വിലയില്‍ മാറ്റമില്ലാത്ത ശേഷമാണ് സ്വര്‍ണ വില 120 രൂപ കുറഞ്ഞത്.

സെപ്റ്റംബര്‍ 15 മുതലാണ് കേരളത്തില്‍ സ്വര്‍ണ വില ഉയരാന്‍ തുടങ്ങിയത്. മാസത്തിലെ താഴ്ന്ന വിലയായ 43,600 രൂപയില്‍ നിന്ന് 160 രൂപ വര്‍ധിച്ച് 43,760 രൂപയിലാണ് സെപ്റ്റംബര്‍ 15 ന് സ്വര്‍ണം വ്യാപാരം തുടങ്ങിയത്. സെപ്റ്റംബര്‍ 16 ന് ശനിയാഴ്ച 160 രൂപ വര്‍ധിച്ച് 43,920 രൂപയിലാണ് സ്വര്‍ണ വിലയെത്തിയത്. സെപ്റ്റംബര്‍ നാലിന് രേഖപ്പെടുത്തിയ 44,240 രൂപയാണ് മാസത്തിലെ ഏറ്റവും ഉയര്‍ന്ന വില.

വില വർധിക്കാൻ കാരണം

ബുധനാഴ്ച ചേർന്ന ഫെഡറൽ റിസർവ് യോ​ഗം പലിശ നിരക്കുകൾ മാറ്റം വരുത്തിയില്ലെങ്കിലും ഈ വർഷം ഒരു നിരക്ക് വർധനവ് ഉണ്ടാകുമെന്നാണ് യോ​ഗം സൂചിപ്പിച്ചത്. ഇതോടൊപ്പം നേരത്തെ സൂചിപ്പിച്ചതിനേക്കാൾ കർശനമായ പണനയം സാമ്പത്തിക വർഷം നടപ്പാക്കാനുമാണ് ഫെഡിന്റെ തീരുമാനം. ഇതോടെ യുഎസ് ഡോളറും ബോണ്ട് യീൽഡും ഉയർന്നതിനാൽ വ്യാഴാഴ്ച സ്വർണ വില ഇടിയുകയാണ്.

സ്‌പോട്ട് ഗോൾഡ് ഔൺസിന് 0.3 ശതമാനം ഇടിഞ്ഞ് 1,924.68 ഡോളറിലെത്തി. യു‌എസ് ഡോളർ സൂചിക മാർച്ച് 9 ന് ശേഷമുള്ള ഏറ്റവും ഉയർന്ന നിലയിലേക്ക് എത്തി. ട്രഷറി യീൽഡ് 17 വർഷത്തെ ഉയർന്ന നിലയിലേക്കും ഉയർന്നു.

ഇനിയും ഇടിയുമോ?

രാജ്യത്ത് ആഘോഷ സീസൺ ആരംഭിക്കുന്നതോടെ സ്വർണത്തിന് ഡിമാന്റ് വർധിക്കും. ആഗോള വിപണിയില്‍ സ്വര്‍ണ വില ബെറിഷ് ട്രെന്‍ഡ് സമീപ ഭാവിയിലേക്ക് തുടരുമെങ്കിലും ആഭ്യന്തര വിപണിയില്‍ സ്വര്‍ണ വില കാര്യമായ ഇടിവ് പ്രതീക്ഷിക്കേണ്ടെന്നാണ് വിപണി വിദഗ്ധരുടെ അഭിപ്രായം. ഡിമാന്റിന് അനുസരിച്ചുള്ള വില വർധനവാണ് ആഭ്യന്തര വിപണിയിൽ സ്വാധീനിക്കുക.

ആഘോഷ സീസണിലെ വാങ്ങലുകള്‍ കാരണമുള്ള ഡിമാന്റും രൂപ ഇടിയുന്നതും സ്വര്‍ണത്തിന്റെ വില ആഭ്യന്തര വിപണിയില്‍ വലിയ വര്‍ധനവ് നല്‍കില്ലെന്നാണ് അനുമാനം. ഡോളറിനെ ശക്തമാക്കുന്ന തീരുമാനങ്ങളാണ് ആഭ്യന്തര വിപണിയില്‍ സ്വര്‍ണ വില ഇടിക്കുന്നത്. മൂന്ന് മാസത്തിനിടെ ഡോളര്‍ ഇന്‍ഡെക്‌സ് 3 ശതമാനം ഉയര്‍ന്നു. ഇതിന് പിന്നാലെ സ്വര്‍ണ വിലയില്‍ 4.61 ശതമാനം ഇടിവ് രേഖപ്പെടുത്തി.