ഇന്നലെ കുറഞ്ഞത് ഇന്ന് കൂടി; വില വര്‍ധനവിന്റെ ട്രെന്‍ഡ് തുടങ്ങിയോ? കേരളത്തിലെ സ്വര്‍ണ വില അറിയാം

സംസ്ഥാനത്ത് സ്വര്‍ണ വില കൂടി. ഗ്രാമിന് 15 രൂപയും പവന് 120 രൂപയും വര്‍ധിച്ചു. ഒരു ഗ്രാം സ്വര്‍ണത്തിന് 5,515 രൂപയാണ് ബുധനാഴ്ച കേരള വിപണിയിലെ വില. 44,120 രൂപയാണ് പവന്റെ വില. മൂന്ന് ദിവസം മാറ്റമില്ലാതെ തുടര്‍ന്നതിന് ശേഷമാണ് ചൊവ്വാഴ്ച കേരള വിപണിയില്‍ പവന് 120 രൂപ കുറഞ്ഞത്. ഈ തുകയാണ് ഇന്ന് വര്‍ധിച്ചത്.

ജൂലായ് മാസം അവസാനത്തോട് അടുക്കുമ്പോള്‍ സ്വര്‍ണ വിലയില്‍ ചാഞ്ചാട്ടമാണ് കാണുന്നത്. ജൂലായ് 20 തിന് 44,560 രൂപ എന്ന മാസത്തിലെ ഉയര്‍ന്ന വിലയിലേക്ക് എത്തിയ സ്വര്‍ണ വില പിന്നീട് ഇടിയുകയായിരുന്നു. 5 ദിവസത്തിനിടെ 560 രൂപയോളം സ്വര്‍ണ വിലയില്‍ ഇടിവുണ്ടായി. രാജ്യാന്തര വിപണിയിലെ ചലനങ്ങള്‍ സ്വര്‍ണ വിലയെ കാര്യമായി ബാധിക്കുന്നുണ്ട്.

ആ​ഗോള വിപണിയിൽ

ഡോളറും യു.എസ്. ട്രഷറി യീൽഡും രണ്ടാഴ്‌ചത്തെ ഏറ്റവും ഉയർന്ന നിരക്കിന് സമീപമാണ് ചൊവ്വാഴ്ച വ്യാപാരം അവസാനിപ്പിച്ചത്. ഇത് മറ്റ് കറൻസികൾ കൈവശം വയ്ക്കുന്നവർക്ക് സ്വർണം കൂടുതൽ ചെലവേറിയതാക്കി. യുഎസ് ഫെഡറൽ റിസർവിന്റെ യോ​ഗ തീരുമാനം പുറത്തു വരാനിരിക്കെ പലിശ നിരക്ക് വർധനവ് അവസാനിപ്പിക്കുന്നതിനായി വ്യാപാരികൾ കാത്തിരിക്കുന്നതിനാൽ ബുധനാഴ്ച ഏഷ്യൻ വിപണി സമയത്ത് സ്വർണ വിലയിൽ കാര്യമായ ചലനങ്ങളില്ല. സ്‌പോട്ട് ഗോൾഡ് ഔൺസിന് 1,964.14 എന്ന നിലയിലാണ്.

വിവിധ നഗരങ്ങളില്‍ ഒരു ഗ്രാം (22 കാരറ്റ്) സ്വര്‍ണത്തിന്റെ വില നോക്കാം

ചെന്നൈ- 5,530 രൂപ

മുംബൈ- 5,515 രൂപ

ഡല്‍ഹി- 5,530 രൂപ

കൊല്‍ക്കത്ത- 5,510 രൂപ

ബംഗളൂരു- 5,510 രൂപ

ഹൈദരാബാദ്- 5,510 രൂപ

പൂനെ- 5,510 രൂപ

വഡോദര- 5,520 രൂപ

അഹമ്മദാബാദ്- 5,520 രൂപ

പലിശ നിരക്കുകളിൽ പ്രഖ്യാപനം

ബുധനാഴ്ച ഇന്ത്യൻ സമയം രാത്രിയോടെ ഫെഡറൽ റിസർവ് നയം പുറത്തുവരും. വ്യാഴാഴ്ച യൂറോപ്യൻ സെൻട്രൽ ബാങ്കും തൊട്ടടുത്ത ദിവസം ബാങ്ക് ഓഫ് ജപ്പാനും പലിശ നിരക്കുകൾ സംബന്ധിച്ച് തീരുമാനമെടുക്കുന്നുണ്ട്. പലിശ നിരക്കുകൾ ഉയർന്നാൽ സ്വർണത്തിന് വില ഇടിയും. ഡോളർ ശക്തമാകുന്നതോടെ നിക്ഷേപം ബോണ്ടിലേക്ക് കേന്ദ്രീകരിക്കുന്നതിനാലാണ് സ്വർണ വില ഇടിയുന്നത്.

പോളിസി നിരക്കുകളിൽ 25 അടിസ്ഥാന നിരക്ക് വർധനവാണ് വിപണികൾ പ്രതീക്ഷിക്കുന്നത്. ഈ സാഹചര്യത്തിൽ, പോളിസി തീരുമാനം പ്രതീക്ഷിച്ചതു പോലെയാണെങ്കിൽ സ്വർണ വിലയിൽ കാര്യമായ ചലനം ഉണ്ടാകില്ലെന്ന് സ്റ്റോക്സ്ബോക്സ് റിസർച്ച് ഹെഡ് മനീഷ് ചൗധരി പറഞ്ഞു. സ്വർണത്തിന്റെ പ്രതികരണം പണപ്പെരുപ്പത്തിലെയും വളർച്ചയിലെയും എന്തെങ്കിലും മാറ്റങ്ങളെ ആശ്രയിച്ചിരിക്കുമെന്നും അദ്ദേഹം പറഞ്ഞു.

മറ്റൊരു അഭിപ്രായത്തിൽ യുഎസ് സിപിഐ ഡാറ്റ കഴിഞ്ഞ മാസം 3 ശതമാനമായി കുറഞ്ഞതിനാൽ പലിശ നിരക്ക് വർധനവ് വരും മാസങ്ങളിൽ താൽക്കാലികമായി നിർത്താനുള്ള തീരുമാനം ഉണ്ടാകുമെന്ന് റിദ്ദിസിദ്ധി ബുള്ളിയൻസ് (ആർഎസ്ബിഎൽ) മാനേജിംഗ് ഡയറക്ടർ പൃഥ്വിരാജ് കോത്താരി പറഞ്ഞു. ഈ തീരുമാനം സ്വർണ വിലയെ ഉയർത്തും.