ജൂണിൽ സാധാരണക്കാരനെ സന്തോഷിപ്പിച്ച് സ്വർണ വില; രാജ്യത്തെ കുറഞ്ഞ വില കേരളത്തിൽ; വില നിലവാരം ഇങ്ങനെ

അന്താരഷ്ട്ര വിപണിയിൽ സ്വർണ വില ഇടിയുമ്പോഴും കൂടിയും കുറഞ്ഞും കേരളത്തിലെ സ്വർണ വില. കേരളത്തിലെ സ്വര്‍ണ വില ചാഞ്ചാട്ടത്തിലാണ്. വ്യാഴാഴ്ച (29 ജൂണ്‍) 43,080 രൂപയിലെത്തി ജൂണിലെ താഴ്ന്ന വിലയിലെത്തിയ സ്വര്‍ണം വെള്ളിയാഴ്ച വീണ്ടും ഉയര്‍ന്നു. പവന് 80 രൂപ കൂടി 43,160 രൂപയിലാണ് ഇന്നത്തെ വില. ഗ്രാമിന് 10 രൂപ കൂടി 5,395 രൂപയിലെത്തി.

അന്താരാഷ്ട്ര വിപണിയില്‍ സ്വര്‍ണ വില കുറയുമ്പോഴും ആഭ്യന്തര വിപണിയില്‍ സ്വര്‍ണ വില ഉയരാനുള്ള കാരണം ഡോളര്‍ ശക്തിപ്പെടുന്നതാണ്. ജൂൺ രണ്ടിന് രേഖപ്പെടുത്തിയ 44,800 രൂപയാണ് ജൂൺ മാസത്തിലെ ഏറ്റവും ഉയർന്ന സ്വർണ വില.

വില ഉയരാനുള്ള കാരണം

കഴിഞ്ഞ സെഷനില്‍ ഡോളര്‍ സൂചിക രണ്ടാഴ്ചത്തെ ഏറ്റവും ഉയര്‍ന്ന നിലവാരത്തിനടുത്ത്് സ്ഥിരത പുലര്‍ത്തിയിരുന്നു, ഇത് മറ്റ് കറന്‍സികള്‍ വഴി സ്വര്‍ണം വാങ്ങുന്നവര്‍ക്ക് സ്വര്‍ണം ചെലവേറിയതാക്കുകയാണ്. ഇന്നത്തെ വ്യാപാരത്തിലും ഡോളര്‍ സൂചിക 0.029 ശതമാനം ഉയര്‍ന്നു. ഇതാണ് ആഭ്യന്തര വിപണിയില്‍ വില ഉയരാനുള്ള കാരണം.

അന്താരാഷ്ട്ര വിപണിയിൽ സ്വർണ വില നാല് മാസത്തെ താഴ്ന്ന നിലയിലാണ്. അമേരിക്കയിലെ പണപ്പെരുപ്പ റിപ്പോർട്ടിന് വ്യാപാരികൾ കാത്തിരിക്കുകയാണ്. വെള്ളിയാഴ്ച സ്‌പോട്ട് ഗോൾഡ് ഔൺസിന് 1,907.78 ഡോളറിലാണ്. വ്യാഴാഴ്ച മാർച്ച് പകുതിക്ക് ശേഷമുള്ള ഏറ്റവും താഴ്ന്ന നിലവാരമായ 1,892.82 ഡോളറിലേക്ക് സ്വർണ വില എത്തിയിരുന്നു. ശക്തമായ ഡോളറും മാന്ദ്യ സാധ്യത കുറഞ്ഞതും സ്വർണ വില ഇടിക്കുന്നതായാണ് വി​ദ​ഗ്ധരുടെ നിരീക്ഷണം.

ഇന്ത്യയിലെ മറ്റു ന​ഗരങ്ങളിലെ വില

ചെന്നൈയില്‍ പവന് 43,440 രൂപയാണ് വില. മുംബൈ 43,160 രൂപയും ഡല്‍ഹിയില്‍ 43,280 രൂപയുമാണ് ഒരു പവന്‍ സ്വര്‍ണത്തിന് നല്‍കേണ്ടി വരുന്ന വില. വഡോദര, അഹമ്മദാബാദ് എന്നിവിടങ്ങളില്‍ 43,200 രൂപയും ജയ്പൂര്‍, ലഖ്‌നൗ എന്നിവിടങ്ങളില്‍ 43,280 രൂപയുമാണ് വില. 43,440 രൂപയാണ് കോയമ്പത്തൂര്‍, മധുരൈ നഗരങ്ങളിലെ പവന്റെ വില.

കൊല്‍ക്കത്ത, ബംഗളൂരു, ഹൈദരാബാദ്, പൂനെ എന്നിവിടങ്ങളില്‍ 43,160 രൂപയാണ് വില. രാജ്യത്തെ ഏറ്റവും കുറഞ്ഞ നിരക്ക് കേരളം ഉൾപ്പെടെ ഈ ന​ഗരളിലാണ്.

ജൂണിൽ സ്വർണ വിലയിൽ ഇടിവ്

ജൂൺ മാസം അവസാനിക്കുമ്പോൾ കഴിഞ്ഞ മാസങ്ങളെ അപേക്ഷിച്ച് സ്വർണ വില താഴ്ന്ന നിലവാരത്തിലാണ്. ജൂൺ 30നുള്ള പവന്റെ വിലയായ 43,160 രൂപ മാർച്ച് പകുതിയിലെ നിലവാരത്തിലാണെന്ന് കാണാം. ജൂൺ മാസാരംഭത്തിൽ 44,800 രൂപയിലേക്ക് കയറിയ സ്വർണ വില 1,720 രൂപയാണ് ഒരു മാസം കൊണ്ട് കുറഞ്ഞത്. അന്താരാഷ്ട്ര വിപണിയിൽ ഔൺസിന് 1,980 ഡോളറായിരുന്ന സ്വർണ വില ജൂൺ 28 ന് 1,904.76 ഡോളറിലാണ് ക്ലോസ് ചെയ്തത്.

വാങ്ങാൻ മികച്ച സമയം

കഴിഞ്ഞ മൂന്ന് മാസ കാലയളവിലെ ഉയർന്ന വില മേയ് മാസത്തിലാണ് രേഖപ്പെടുത്തിയത്. 45,760 രൂപയായിരുന്നു 22 കാരറ്റ് 8 ​ഗ്രാമിന്റെ വില. ഇത് സര്‍വകാല റെക്കോര്‍ഡായിരുന്നു. കുറഞ്ഞ വിലയിൽ സ്വർണം വാങ്ങാൻ ആ​ഗ്രഹിക്കുന്നവർക്ക് മുൻപ് സ്വർണം വാങ്ങാൻ ഉദ്യേശിക്കുന്നവരാണെങ്കിൽ ഇതൊരു മികച്ച സമയമാണ്.

സ്വർണം വാങ്ങാനോ കുറഞ്ഞ വിലയിൽ ലോക്ക് ചെയ്യാനോ ഈ സമയം ഉപയോ​ഗപ്പെടുത്താം. ​ഗോൾഡ് അഡ്വാൻസ് ബുക്കിം​ഗ് രീതികൾ ഉപയോ​ഗിച്ച് സ്വർണ വില ലോക്ക് ചെയ്യാൻ സാധിക്കും. ഇനിയും കുറയുകയാണെങ്കിൽ വാങ്ങുന്ന ദിവസത്തെ വിപണി വിലയിൽ സ്വർണം വാങ്ങാൻ അവസരം ഉപയോ​ഗിക്കാം. വില കൂടിയാൽ ലോക്ക് ചെയ്ത വിലയിൽ സ്വർണം ലഭിക്കുകയും ചെയ്യും.