സ്വർണ വിലയിൽ വലിയൊരു ഇടിവ്; ബുക്ക് ചെയ്യുന്നവർക്കും വാങ്ങാനുള്ളവർക്കും അവസരം; ഇന്നത്തെ വില ഇങ്ങനെ

ആഘോഷ, വിവാഹ സീസൺ അടുത്തിരിക്കെ മലയാളിക്ക് സന്തോഷം നൽകി സ്വർണ വില. തുടർച്ചയായ ദിവസങ്ങളിൽ സ്വർണ വില ഇടിയാൻ തുടങ്ങിയതോടെ പവന്റെ വില 44,000 രൂപയ്ക്ക് താഴെയെത്തി. ഒരു മാസം മുന്നേ 44,560 രൂപ എന്ന വമ്പൻ കുതിപ്പിന് ശേഷം സ്വർണ വില താഴേക്ക് പതിക്കുന്നത് ആഭരണം വാങ്ങാൻ ആ​ഗ്രഹിക്കുന്നവർക്ക് ആശ്വാസമായി.

കേരള വിപണിയിൽ, ഗ്രാമിന് 25 രൂപയും പവന് 200 രൂപയുമാണ് വ്യാഴാഴ്ച കുറഞ്ഞത്. ഒരു ഗ്രാം സ്വര്‍ണത്തിന് 5,470 രൂപയും പവന് 43,760 രൂപയുമാണ് കേരള വിപണിയിലെ വില. തുടര്‍ച്ചയായ മൂന്നാം ദിവസമാണ് ആഭ്യന്തര വിപണിയില്‍ വില കുറയുന്നത്.

ഈ വാരം ഇതുവരെ സ്വര്‍ണം വാങ്ങാന്‍ ആഗ്രഹിക്കുന്നവര്‍ക്ക് ആശ്വാസം നല്‍കുന്നതരത്തിലായിരുന്നു സ്വര്‍ണവില. തിങ്കളാഴ്ച 44,120 രൂപയില്‍ മാറ്റമില്ലാതെ തുടര്‍ന്ന ശേഷം തുടര്‍ച്ചയായ മൂന്ന് ദിവസങ്ങളിലും വില കുറഞ്ഞു. ചൊവ്വാഴ്ച 80 രൂപ കുറഞ്ഞ് 440,40 രൂപയായിരുന്നു സ്വര്‍ണ വില. ബുധനാഴ്ച വീണ്ടും 80 രൂപ കുറഞ്ഞ് 43,960 രൂപയിലെത്തി. ഇവിടെ നിന്നാണ് വ്യാഴാഴ്ച 200 രൂപ പവന് കുറഞ്ഞത്. മൂന്ന് ദിവസത്തിനിടെ 360 രൂപയാണ് സ്വര്‍ണ വിലയിലുണ്ടായ വ്യത്യാസം.

ഓ​ഗസ്റ്റിലെ താഴ്ന്ന വില

വ്യാഴാഴ്ച വീണ്ടും വില കുറഞ്ഞതോടെ ഓ​ഗസ്റ്റ് മാസത്തിലെ ഏറ്റവും താഴ്ന്ന വിലയാണ് ഇന്ന് രേഖപ്പെടുത്തിയത്. ഓ​ഗസ്റ്റ് ഒന്നിന് രേഖപ്പെടുത്തിയ 44,320 രൂപയാണ് ഓ​ഗസ്റ്റ് മാസത്തിലെ ഏറ്റവും ഉയർന്ന വില. ഓ​ഗസ്റ്റ് മാസത്തിൽ നാലാം തവണയാണ് സ്വർണ വില 44,000 രൂപ നിലവാരത്തിന് താഴെ എത്തുന്നത്.

ഓ​ഗസ്റ്റ് 2,3 ദിവസങ്ങളിലും ഓ​ഗസ്റ്റ് 9 തിനും 44,000 രൂപയ്ക്ക് താഴെയായിരുന്നു സ്വർണ വില. ഇന്നത്തെ വില പരിശോധിച്ചാൽ സ്വര്‍ണ വില ഒരു മാസത്തിനിടെയിലെ ഏറ്റവും താഴ്ന്ന നിലവാരത്തിന് അടുത്തെത്തി. നേരത്തെ ജൂലായ് 12 നാണ് കേരളത്തില്‍ സ്വര്‍ണവില ഇതേ നിലവാരത്തിലെത്തിയത്. അന്ന് 43,720 രൂപയായിരുന്നു രേഖപ്പെടുത്തിയത്.

ആ​ഗോള വിപണിയിൽ

വ്യാഴാഴ്ച യുഎസിലെ പണപ്പെരുപ്പ ഡാറ്റ പുറത്തു വരാനിരിക്കെ സ്വർണ വില ഇടിവിൽ തന്നെയാണ്. ഫെഡറൽ റിസർവിന്റെ വരാനിരിക്കുന്ന പലിശ നിരക്ക് തീരുമാനങ്ങളെ സ്വാധീനിക്കുന്നതാണ് പണപ്പെരുപ്പ ഡാറ്റ. ഉപഭോക്തൃ പണപ്പെരുപ്പം വർധിക്കുകയാണെങ്കിൽ ഫെഡറൽ റിസർവ് പലിശ നിരക്ക് വർധിപ്പിക്കാൻ നിർബന്ധിതമാകും. ഇത് സ്വർണ വിലയെ വീണ്ടും ഇടിക്കും.

ഇക്കാരണങ്ങൽ, വ്യാഴാഴ്ച സ്വർണ വില ഒരു മാസത്തെ ഏറ്റവും താഴ്ന്ന നിലയിലാണ്. സ്‌പോട്ട് ഗോൾഡ് ഔൺസിന് 1,918.19 ഡോളർ എന്ന നിലയിലാണ്. ജൂലായ് 10 ശേഷമുള്ള ഏറ്റവും താഴന്ന നിലവാരമാണിത്.

ബുക്ക് ചെയ്യാൻ അവസരം

വ്യാഴാഴ്ച പണപ്പെരുപ്പ ഡാറ്റ പുറത്ത് വരുന്നതോടെ സ്വർണ വില മുന്നേറാനുള്ള സാധ്യത കാണുന്നുണ്ട്. ഇതിനാൽ കുറഞ്ഞ വിലയിൽ സ്വർണം ബുക്ക് ചെയ്യാനുള്ള അവസരമാണിത്. വരുന്ന വിവാഹ സീസണിലേക്ക് സ്വർണം ആവശ്യമുള്ളവർക്ക് അഡ്വാൻസ് ബുക്കിം​ഗ് നടത്താൻ ഈ വില ഉപയോ​ഗിക്കാം.

അതാത് ദിവസത്തെ വിലയിൽ സ്വർണം ബുക്ക് ചെയ്യാൻ ​ഗോൾഡ് അഡ്വാൻസ് പ്ലാൻ വഴി ജുവലറികൾ അനുവദിക്കുന്നുണ്ട്. നിശ്ചിത തുക അടച്ച് സ്വർണം ബുക്ക് ചെയ്താൽ വില ഉയർന്നാലും ബുക്ക് ചെയ്ത വിലയിൽ സ്വർണം ലഭിക്കും. സ്വർണ വില കുറയുകയാണെങ്കിൽ കുറഞ്ഞ വിലയിൽ സ്വർണം വാങ്ങാം.