മലയാളിക്ക് ഇത് നേട്ടമാകും; താഴേക്കുള്ള ട്രെൻഡ് തുടർന്ന് സ്വർണ വില; ഇന്ന് കുറഞ്ഞത് 80 രൂപ

ആഘോഷ നാളുകൾ അടുത്തിരിക്കെ മലയാളിക്ക് ആശ്വാസം പകർന്ന് സ്വർണ വില. താഴേക്കുള്ള ട്രെൻഡിൽ പോകുന്ന സ്വർണ വില ചൊവ്വാഴ്ച കുറഞ്ഞ് മാസത്തിലെ ഏറ്റവും കുറഞ്ഞ നിലയിലെത്തി. ഓണം ആഘോഷങ്ങൾ തുടങ്ങുന്നതും ശേഷം ആരംഭിക്കുന്ന വിവാഹ സീസണിലേക്കും സ്വർണം വാങ്ങാനിരിക്കുന്ന മലയാളിയെ സംബന്ധിച്ച് വില കുറയുന്നത് ആശ്വാസമാണ്. ആ​ഗോള വിപണിയിലെ ചലനങ്ങളാണ് ആഭ്യന്തര വിപണിയിലും പ്രതിഫലിക്കുന്നത്.

കേരളത്തിലെ സ്വർണ വില

ചൊവ്വാഴ്ച കേരളത്തില്‍ സ്വര്‍ണ വില കുറഞ്ഞു. ഗ്രാമിന് 10 രൂപ കുറഞ്ഞ് 5,455 രൂപയും പവന് 80 രൂപ കുറഞ്ഞ് 43,640 രൂപയുമാണ് ചൊവ്വാഴ്ചയിലെ സ്വര്‍ണ വില. ഇതോടെ മാസത്തിലെ ഏറ്റവും കുറഞ്ഞ നിരക്കിലേക്ക് സ്വര്‍ണ വില എത്തി.

ഓഗസ്റ്റ് 11 ന് ഇതേ നിലവാരത്തില്‍ സ്വര്‍ണ വില എത്തിയിരുന്നു. ശേഷം 80 രൂപ ഉയര്‍ന്ന് 43,720 രൂപയിലാണ് കഴിഞ്ഞ ആഴ്ച സ്വര്‍ണ വില വ്യാപാരം അവസാനിപ്പിച്ചത്. ഞായര്‍ തിങ്കള്‍ ദിവസങ്ങളില്‍ മാറ്റമില്ലാതെ തുടര്‍ന്ന ശേഷമാണ് സ്വര്‍ണ വില ചൊവ്വാഴ്ച കുറഞ്ഞത്.

ഓ​ഗസ്റ്റ് മാസത്തിൽ ട്രെൻഡ് താഴേക്ക്

ഓഗസ്റ്റ് മാസത്തില്‍ സ്വര്‍ണ വില താഴേക്കുള്ള ട്രെന്‍ഡാണ് സൂചിപ്പിക്കുന്നത്. മാസത്തിലെ ആദ്യ ദിവസത്തില്‍ രേഖപ്പെടുത്തിയ 44,320 രൂപയാണ് ഓഗസ്റ്റിലെ ഏറ്റവും ഉയര്‍ന്ന വില. 15 ദിവസം പിന്നിടുമ്പോൾ ഓ​ഗസ്റ്റ് മാസത്തിൽ 860 രൂപയാണ് സ്വർണ വിലയിൽ കുറവ് വന്നത്. നേരത്തെ ജൂൺ മാസത്തിലാണ് സമാനമായി സ്വർണ വില ഇടിഞ്ഞത്. ഓഗസ്റ്റ് 9 തിന് 44,000 രൂപയ്ക്ക് താഴെ എത്തിയ സ്വര്‍ണവില 43,000 നിലവാരത്തിലാണ് വ്യാപാരം നടക്കുന്നത്.

ഓഗസ്റ്റ് 8 ന് 80 രൂപ കുറഞ്ഞ് 44,040 രൂപയിലെത്തിയ സ്വർണ വില ഓഗസ്റ്റ് 9 തിന് വീണ്ടും 80 രൂപ കുറഞ്ഞിരുന്നു. 43,960 രൂപയായിരുന്നു ഓ​ഗസ്റ്റ് 9 തിലെ വില. പത്താം തീയതി പവന് 200 രൂപ കുറഞ്ഞ് 43,760 രൂപിലെത്തി. 11 ന് വെള്ളിയാഴ്ച 120 രൂപ കുറഞ്ഞ് 43,640 രൂപയിലേക്കും തുടർന്ന് 80 രൂപ വർധിച്ച് 43,720 രൂപയിലേക്കുമായിരുന്നു സമീപ ദിവസങ്ങളിൽ സ്വർണത്തിന്റെ യാത്ര.

ആ​ഗോള വിപണിയിൽ വില കുറയുന്നു

യു.എസ് ബോണ്ട് യീൽഡുകളും ഡോളറും ഉയർന്ന നിലയിൽ തുടരുന്നതിനാൽ ആ​ഗോള വിപണിയിൽ സ്വർണ വില ഇടിയുകയാണ്. ചൊവ്വാഴ്ച സ്വർണ വിലയിൽ 1,900 ഡോളർ നിലവാരത്തിന് തൊട്ടരികിലാണ്. സ്‌പോട്ട് ഗോൾഡ് ഔൺസിന് 0.60 ശതമാനം ഇടിഞ്ഞ് 1,907.05 ഡോളറിലെത്തി. തിങ്കാളാഴ്ച ഒന്നര മാസത്തെ താഴ്ന്ന നിലയിൽ സ്വർണം എത്തിയിരുന്നു.

ചൈനയുടെ സമ്പദ്‌വ്യവസ്ഥയെക്കുറിച്ചുള്ള ആശങ്കകൾക്കിടയിൽ യുഎസ് ഡോളർ തിങ്കളാഴ്ച ഒരു മാസത്തിലെ അതിന്റെ ഏറ്റവും ഉയർന്ന നിലയിലെത്തിയിരുന്നു. 10 വർഷ ട്രഷറി ബോണ്ട് യീൽഡ് നവംബർ മുതലുള്ള ഏറ്റവും ഉയർന്ന നിലവാരത്തിനടുത്താണ്. ഇതാണ് ആ​ഗോള വിപണിയിൽ സ്വർണ വില ഇടിയാൻ കാരണം.