വാരാന്ത്യത്തില്‍ ട്രാക്ക് മാറ്റി സ്വര്‍ണ വില; ശനിയാഴ്ച സ്വര്‍ണ വില ഉയര്‍ന്നു; ഇന്നത്തെ നിരക്കറിയാം

ആ​ഗോള വിപണയിലെ സാഹചര്യങ്ങൾ, ആഘോഷ സീസണിൽ ഉയരുന്ന ഡിമാന്റ്, സ്വർണ വില കനത്ത ചാഞ്ചാട്ടം നേരിട്ടൊരു ആഴ്ചയാണ് അവസാനിക്കുന്നത്. മാസത്തിലെ ഉയർന്ന നിലവാരത്തിലേക്ക് കുതിക്കുകയും താഴ്ന്ന നിലവാരത്തിന് അടുത്തെത്തുകയും ചെയ്ത സ്വർണ വില കാര്യമായ ഇടിവോ നേട്ടമോ ഉണ്ടാക്കാതെയാണ് ശനിയാഴ്ച വ്യാപാരം നടക്കുന്നത്.

വെള്ളിയാഴ്ചയിൽ നിന്ന് വ്യത്യസ്തമായി ശനിയാഴ്ച സ്വര്‍ണ വില പവന് 80 രൂപ വര്‍ധിച്ചു. കേരള വിപണിയില്‍ 43,960 രൂപയാണ് പവന്റെ വില. ഗ്രാമിന് 10 രൂപ വര്‍ധിച്ച് 5,495 രൂപയിലാണ് വ്യാപാരം നടക്കുന്നത്.

ചാഞ്ചാട്ടം തുടരുന്ന സ്വര്‍ണ വില രണ്ട് ദിവസമായി ഇടിഞ്ഞ ശേഷമാണ് കയറാന്‍ തുടങ്ങിയത്. സെപ്റ്റംബര്‍ 18 ന് തിങ്കളാഴ്ച 120 രൂപ വര്‍ധിച്ചാണ് സ്വര്‍ണ വില വ്യാപാരം തുടങ്ങിയത്. ചൊവ്വാഴ്ചയും 120 രൂപ വര്‍ധിച്ച് 44,160 രൂപയിലേക്ക് സ്വര്‍ണ വിലയെത്തി. ബുധനാഴ്ച സ്വര്‍ണ വില ഇടിയാന്‍ തുടങ്ങിയത്. 120 രൂപ ഇടിഞ്ഞ് 44,040 രൂപയിലേക്കും സെപ്റ്റംബര്‍ 22 ന് 160 രൂപ ഇടിഞ്ഞ് 43,880 രൂപയിലേക്കും സ്വര്‍ണ വില എത്തി.

ശനിയാഴ്ച 80 രൂപ വര്‍ധിച്ചെങ്കിലും ഈ വാരത്തില്‍ നേരിയ നേട്ടത്തിലാണ് സ്വര്‍ണ വില ക്ലോസ് ചെയ്യുന്നത്. ഞായറാഴ്ച രേഖപ്പെടുത്തിയ 43,920 രൂപയേക്കാള്‍ 40 രൂപയാണ് സ്വര്‍ണവില വാരാന്ത്യത്തില്‍ ഉയര്‍ന്നത്.

ആ​ഗോള വിപണിയിൽ

ഈ വാരം സ്വർണ വിലയെ ചാഞ്ചാട്ടത്തിലാക്കിയത് ഫെഡറൽ റിസർവിന്റെ പലിശ നിരക്കുമായി ബന്ധപ്പെട്ട തീരുമാനങ്ങളാണ്. 2024 ൽ പലിശ നിരക്ക് വർധനവ് വേണ്ടി വരുമെന്ന പ്രഖ്യാപനം സ്വർണ വിലയെ താഴ്ത്തി. ഡോളറും ബോണ്ട് യീൽഡും കരുത്താർജിച്ചതോടെയാണ് സ്വർണത്തിന് ​ഗ്ലാമർ നഷ്ടപ്പെട്ടത്. നിക്ഷേപകർ പലിശ നിരക്ക് വീക്ഷണത്തെക്കുറിച്ചുള്ള സൂചനകൾക്കായി കാത്തിരിക്കുന്നതിനാൽ ഡോളറിലെ നേരിയ പിൻവാങ്ങലും ബോണ്ട് യീൽഡ് താഴ്ന്നതും കാരണം വെള്ളിയാഴ്ച സ്വർണ വില ഉയർന്നാണ് ക്ലോസ് ചെയ്തത്.

മൂന്ന് സെഷനുകളിലെ നഷ്ടത്തിന് ശേഷം സ്‌പോട്ട് ഗോൾഡ് 0.3% ഉയർന്ന് ഔൺസിന് 1,925.52 ഡോളറിലെത്തി. ഡോളർ ആറ് മാസത്തെ ഏറ്റവും ഉയർന്ന നിരക്കിൽ നിന്ന് താഴോട്ടിറങ്ങി. അതേസമയം 10 വർഷത്തെ ബെഞ്ച്മാർക്ക് ട്രഷറി യീൽഡ് 16 വർഷത്തെ ഏറ്റവും ഉയർന്ന നിരക്കിൽ നിന്നും ഇടിഞ്ഞു. ഇതാണ് സ്വർണ വിലയ്ക്ക് നേട്ടമുണ്ടാക്കിയത്.

മറ്റു ന​ഗരങ്ങളിലെ വില

ചെന്നൈയിൽ ശനിയാഴ്ച പവന് 88 രൂപ വർധിച്ച് 44,168 രൂപയിലാണ് സ്വർണം വ്യാപാരം നടക്കുന്നത്. രാജ്യ തലസ്ഥാനത്ത് പവന് 8 രൂപ ഇടിഞ്ഞ് 43,992 രൂപയിലാണ് ഇന്നത്തെ സ്വർണ വില. മുംബൈ, കൊൽക്കത്ത, ബം​ഗളൂരു, മം​ഗളൂരു, ഹൈദരാബാദ്, വിജയവാഡ പൂനെ എന്നി ന​ഗരങ്ങളിൽ സ്വർണ വില 80 രൂപ വർധിച്ച് 43,960 രൂപയിലാണ് സ്വർണം ശനിയാഴ്ച വ്യാപാരം നടക്കുന്നത്.

വഡോദര, അഹമ്മദാബാദ് എന്നിവിടങ്ങളിൽ 8 രൂപ ഇടിഞ്ഞ് പവന് 43,912 രൂപയാണ് വില.