മലയാളികൾക്ക് ബംബറടിച്ചു; സ്വർണ വിലയിൽ ഇന്ന് വമ്പൻ ഇടിവ്; ഓണക്കാലത്ത് സ്വർണം കൊണ്ട് പൂക്കളം

ആശ്വാസ നിരക്ക് എന്നല്ലാതെ എന്ത് വിളിക്കാൻ. ആഘോഷ സീസൺ അടുത്തിരിക്കെ മലയാളിക്ക് സ്വർണം വാങ്ങാൻ സൗകര്യമമൊരുക്കുന്ന നിലയിലാണ് കുറച്ചു ദിവസങ്ങളിലായി കേരളത്തിലെ സ്വർണ വില. ആ​ഗോള തലത്തിൽ ഇടിയുന്നതിന് അനുസരിച്ച് കേരളത്തിലും വില ഇടിയാൻ തുടങ്ങിയതോടെ സ്വർണം വാങ്ങാനിരുന്നവർക്ക് ആശ്വാസമാകുന്ന നിരക്കിലേക്ക് വില എത്തി. കേരള വിപണിയില്‍ വ്യാഴാഴ്ച സ്വര്‍ണ വില കുത്തനെ ഇടിഞ്ഞതാണ് വാർത്ത. പവന് 280 രൂപയയും ഗ്രാമിന് 35 രൂപയുമാണ് ഓഗസ്റ്റ് 17 ന് കുറഞ്ഞത്.

കേരള വിപണിയില്‍ വ്യാഴാഴ്ച 43,280 രൂപയാണ് ഒരു പവന്റെ വില. 5,410 രൂപ ഒരു ഗ്രാം സ്വര്‍ണം വാങ്ങാന്‍ ചെലവാക്കണം. ഇതോടെ സ്വര്‍ണവില ഒന്നരമാസത്തെ താഴ്ന്ന നിലയിലേക്ക് എത്തി. ജൂലായ് മാസം മൂന്നാം തീയതിയാണ് നേരത്തെ ഇതേ നിലയിലേക്ക് സ്വര്‍ണ വില എത്തിയത്. ഓഗസ്റ്റ് മാസത്തില്‍ മാത്രം ഇതുവരെ സ്വര്‍ണ വില 1,040 രൂപ കുറഞ്ഞു.

മാസം ആദ്യം രേഖപ്പെടുത്തിയ 44,320 രൂപയാണ് ഓഗസ്റ്റിലെ ഏറ്റവും ഉയര്‍ന്ന വില. വ്യാഴാഴ്ചയിലെ 43,280 രൂപയാണ് മാസത്തിലെ താഴ്ന്ന നിരക്കും. ഓണം, വിവാഹ സീസണുകളില്‍ സ്വര്‍ണ വില കുറയുന്നത് സ്വര്‍ണം വാങ്ങാനിരിക്കുന്നവര്‍ക്ക് ആശ്വാസമാണ്.

വില കുറഞ്ഞത് ഇങ്ങനെ

ഓഗസ്റ്റ് 9 തിന് 44,000 രൂപയ്ക്ക് താഴെ എത്തിയ സ്വര്‍ണവില 43,000 രൂപ നിലവാരത്തിലാണ് വ്യാപാരം നടക്കുന്നത്. ഓഗസ്റ്റ് 8 ന് 80 രൂപ കുറഞ്ഞ് 44,040 രൂപയിലെത്തിയ സ്വർണ വില ഓഗസ്റ്റ് 9 തിന് വീണ്ടും 80 രൂപ കുറഞ്ഞിരുന്നു.

43,960 രൂപയായിരുന്നു ഓ​ഗസ്റ്റ് 9 തിലെ വില. പത്താം തീയതി പവന് 200 രൂപ കുറഞ്ഞ് 43,760 രൂപയിലെത്തി. 11 ന് വെള്ളിയാഴ്ച 120 രൂപ കുറഞ്ഞ് 43,640 രൂപയിലേക്കും തുടർന്ന് 80 രൂപ വർധിച്ച് 43,720 രൂപയിലേക്കുമായിരുന്നു സമീപ ദിവസങ്ങളിൽ സ്വർണത്തിന്റെ യാത്ര.

ഓ​ഗസ്റ്റ് 14 തിങ്കളാഴ്ച 43.720 രൂപയിൽ തുടങ്ങിയ സ്വർണവില ഈ ആഴ്ച മാത്രം 440 രൂപ കുറഞ്ഞു. ഓ​ഗസ്റ്റ് 15 ന് 80 രൂപ കുറഞ്ഞ് 43,640ലും ഓ​ഗസ്റ്റ് 16 ന് വീണ്ടും 80 രൂപ കുറഞ്ഞ് 43,560 രൂപയിലും സ്വർണ വില എത്തിയിരുന്നു.

ആ​ഗോള വിപണിയിൽ

ആ​ഗോള വിപണിയിൽ സ്വർണ വില 6 മാസത്തെ താഴ്ന്ന നിലയിലാണ്. ഫെഡറൽ റിസർവ് പലിശ നിരക്ക് നയം കടുപ്പിക്കുമെന്ന പ്രതീക്ഷക ഡോളർ സൂചികയെയും ബോണ്ട് യീൽഡിനെയും ശക്തമാക്കിയതാണ് സ്വർണം ഇടിയാൻ കാരണമായത്. ഫെഡറൽ റിസർവിന്റെ ജൂലായ് മീറ്റിം​ഗ് മിനുറ്റ്സ് പ്രകാരം പണപ്പെരുപ്പത്തിനെതിരായ പോരാട്ടത്തിന് മുൻഗണന നൽകുന്നത് തുടരാനാണ് ഭൂരിഭാ​ഗം പേരും നിർദ്ദേശിക്കുന്നത്. ഇത് കൂടുതൽ പലിശ നിരക്ക് വർധവിനെ കാരണമാകുമെന്നതിനാലാണ് ഡോളർ സൂചിക ഉയർന്നത്.

103.54 എന്ന നിലവാരത്തിലാണ് ഡോളർ സൂചിക. ജൂൺ പകുതിക്ക് ശേഷമുള്ള ഏറ്റവും ഉയർന്ന നിലയിലാണ് ഡോളർ. 10 വർഷത്തെ യു.എസ് ട്രഷറി യീൽ‍ഡ് 10 ​​മാസത്തെ ഏറ്റവും ഉയർന്ന നിലയിലെത്തി. ഇത് സ്വർണത്തെ ഇടിച്ചു. 0.06 ശതമാനം നേട്ടത്തിൽ 1,893.35 ഡോളറിലാണ് ഒരു ഔൺസ് സ്വർണം വ്യാപാരം നടക്കുന്നത്.