പിടിച്ചു കെട്ടാനാകുന്നില്ല; സ്വർണത്തിന് ഇത് നല്ല കാലം; റെക്കോർഡ് നിലവാരത്തിലേക്ക് അടുത്ത് സ്വർണ വില

താഴേക്കുള്ള വഴിയറിയാതെ കഴിഞ്ഞ ഒരാഴ്ചയിലധിമായി സ്വര്‍ണ വില മുന്നോട്ടുള്ള കുതിപ്പിലാണ് സ്വര്‍ണ വില. ആഗോള വിപണിയില്‍ സ്വര്‍ണ വില ഉയരുന്നതും ഡോളറിനെതിരെ രൂപ താഴേക്ക് പതിക്കുന്നതും ആഭ്യന്തര വിപണിയില്‍ സ്വര്‍ണത്തെ ചെലവേറിയതാക്കുന്നു. കഴിഞ്ഞ തിങ്കളാഴ്ച, ഡിസംബര്‍ 18 ന് ആരംഭിച്ച വില വര്‍ധനവ് ഡിസംബര്‍ 27 നും തുടരുകയാണ്.

കേരള വിപണിയില്‍ ബുധനാഴ്ച പവന് 80രൂപ വര്‍ധിച്ച് 46,800 രൂപയിലാണ് സ്വര്‍ണം വ്യാപാരം ചെയ്യുന്നത്. ഗ്രാമിന് 10 രൂപ വര്‍ധിച്ചതോടെ സ്വര്‍ണ വില 5,850 രൂപയിലേക്ക് സ്വര്‍ണ വില എത്തി. മാസാവസാനത്തിലേക്ക് എത്തുമ്പോഴേക്കും ഡിസംബര്‍ ആദ്യ വാരത്തിന് സമാനമായ വില നിലവാരത്തിലേക്ക് സ്വര്‍ണം പോകുന്നത്.

റെക്കോര്‍ഡ് ഉയരത്തിലേക്ക് അടുക്കുന്നു

സ്വര്‍ണ വില റെക്കോര്‍ഡ് ഉയരം തൊട്ട മാസമായിരുന്നു ഡിസംബര്‍. നാലാം തീയതി രേഖപ്പെടുത്തിയ 47,080 രൂപയാണ് മാസത്തിലെ ഉയര്‍ന്ന നിലവാരം. ബുധനാഴ്ചയിലെ സ്വര്‍ണ വില പരിശോധിക്കുമ്പോള്‍ വെറും 280 രൂപ മാത്രം അകലെയാണിത്.

ഡിസംബര്‍ നാലിന് സര്‍വകാല ഉയരത്തിലെത്തിയ ശേഷം താഴേക്ക് വന്ന സ്വര്‍ണ വില ഡിസംബര്‍ 13 ന് 45,320 രൂപയില്‍ മാസത്തിലെ താഴ്ന്ന നിലവാരം കുറിച്ചിരുന്നു. ഈ നിലവാരത്തില്‍ നിന്ന് 1,480 രൂപയുടെ വര്‍ധനവ് സ്വര്‍ണ വിലയില്‍ ഉണ്ടായതായി കാണാം.

ആ​ഗോള വിപണിയിൽ

2024 ന്റെ ആദ്യ പാദത്തിൽ യുഎസ് ഫെഡറൽ റിസർവ് പലിശ നിരക്ക് കുറയ്ക്കുമെന്ന പ്രതീക്ഷയ്‌ക്കിടയിൽ ബുധനാഴ്ച നേരിയ നേട്ടത്തിലാണ് സ്വർണ വിലയുള്ളത്. സ്പോട്ട് ​ഗോൾഡ് 0.40 ശതമാനം ഉയർന്ന് ഔൺസിന് 2,064.20 ഡോളർ നിലവാരത്തിലാണ് വ്യാപാരം നടക്കുന്നത്. കഴിഞ്ഞ ആഴ്ചയിലെ തണുത്ത പണപ്പെരുപ്പ ഡാറ്റ അടുത്ത മാർച്ചിൽ ഫെഡറൽ റിസർവ് പലിശ നിരക്ക് കുറയ്ക്കുന്നതിനുള്ള പ്രതീക്ഷകൾ ഉയർത്തുകയാണ്. പലിശ നിരക്ക് കുറയുന്നത് സ്വർണം കൈവശം വയ്ക്കുന്നതിനുള്ള ചെലവ് കുറയ്ക്കും.

സ്വർണം 2020തിന് ശേഷമുള്ള ഏറ്റവും മികച്ച നേട്ടത്തിലേക്കാണ് പോകുന്നത്. ഇന്നത്തെ വില പ്രകാരം ഒരു വർഷത്തിനിടെ 13 ശതമാനത്തോളം നേട്ടം സ്വർണ വിലയിലുണ്ട്. ഇത് തുടരാനുള്ള ശ്രമത്തിലാണ് സ്വർണം. യുക്രെയിനിലെയും മിഡിൽ ഈസ്റ്റിലെയും യുദ്ധങ്ങളെ തുടർന്ന് സുരക്ഷിത നിക്ഷേപമായി കണ്ട് വില ഉയർന്നകും യു.എസ് പലിശനിരക്കുകൾ കുറയ്ക്കുന്നതിനുള്ള സാധ്യതകളുമാണ് സ്വർണ വിലയിൽ മുന്നേറ്റത്തിന് കാരണമാകുന്നത്.

ഡോളർ സൂചിക 0.1 ശതമാനം ഉയർന്നെങ്കിലും 5 മാസത്തെ ഏറ്റവും താഴ്ന്ന നിലയിലാണ്. 2020 ന് ശേഷമുള്ള ഏറ്റവും മോശം വാർഷിക പ്രകടനമാണ് ഡോളറിന്റേത്. ദുർബലമായ ഡോളർ മറ്റ് കറൻസി ഉടമകൾക്ക് സ്വർണം കൂടുതൽ ആകർഷകമാക്കും. എന്നാൽ ഇന്ത്യൻ രൂപ ഇടിവ് തുടരുന്നതിനാൽ ഈ രീതിയിൽ നേട്ടമുണ്ടാക്കാനും ആഭ്യന്തര വിപണിയിൽ സാധിക്കുന്നില്ല.