ആ​ഗോള വിപണിയിൽ വില ഉയരുന്നു; കേരളത്തിൽ മാസത്തിലെ ഉയർന്ന നിരക്കിനടുത്ത് സ്വർണം; നിരക്കിങ്ങനെ

ആ​ഗോള സാഹചര്യങ്ങൾ മാറിയതിന് പിന്നാലെ ആഭ്യന്തര വിപണിയിലും സ്വർണ വില മുന്നേറ്റം ശക്തമാക്കി. കഴിഞ്ഞ വെള്ളിയാഴ്ച ആരംഭിച്ച സ്വർണ വിലയിലെ വർധനവ് ചൊവ്വാഴ്ചയും തുടർന്നു. ഇന്ന് ആരംഭിക്കുന്ന രണ്ട് ദിവസത്തെ യുഎസ് ഫെഡറൽ റിസർവ് യോ​ഗത്തിന് മുന്നോടിയായി ഡോളർ ഇടിഞ്ഞതാണ് ആ​ഗോളി വിപണിയെ ബാധിച്ചത്. ഇതോടൊപ്പം ആഭ്യന്തര വിപണിയിലെ ഡിമാന്റും സ്വർണ വില വർധിപ്പിച്ചു.

ചൊവ്വാഴ്ചയും കേരള വിപണിയില്‍ സ്വര്‍ണ വില വര്‍ധിച്ചു. പവന് 120 രൂപ വര്‍ധിച്ച് 44,160 രൂപയിലാണ് സ്വര്‍ണ വില. ഗ്രാമിന് 15 രൂപ വര്‍ധിച്ച് 5,520 രൂപയിലാണ് കേരളത്തിലെ വില. സെപ്റ്റംബർ നാലിന് ശേഷം രേഖപ്പെടുത്തിയ ഏറ്റവും ഉയർന്ന നിരക്കാണിത്. ഈ ആഴ്ചയിലെ രണ്ട് ദിവസങ്ങളിലായി മാത്രം 240 രൂപ സ്വര്‍ണ വിലയില്‍ വര്‍ധനവുണ്ടായി. രണ്ട് ദിവസങ്ങളിലായി 120 രൂപ വീതമാണ് സ്വര്‍ണ വില ഉയര്‍ന്നത്.

സ്വർണ വില എങ്ങോട്ട്

സെപ്റ്റംബര്‍ 15 മുതലാണ് കേരളത്തില്‍ സ്വര്‍ണ വില ഉയരാന്‍ തുടങ്ങിയത്. മാസത്തിലെ താഴ്ന്ന വിലയായ 43,600 രൂപയില്‍ നിന്ന് 160 രൂപ വര്‍ധിച്ച് 43,760 രൂപയിലാണ് സെപ്റ്റംബര്‍ 15 ന് സ്വര്‍ണം വ്യാപാരം തുടങ്ങിയത്. സെപ്റ്റംബര്‍ 16 ന് ശനിയാഴ്ച 160 രൂപയാണ് സ്വര്‍ണ വിലയില്‍ വര്‍ധിച്ചത്. 43,920 രൂപയിലെത്തി. തിങ്കളാഴ്ച 120 രൂപ കൂടി വര്‍ധിച്ചതോടെ 40,000 രൂപ നിലവാരം ഭേദിച്ച് 44,160 രൂപയിലേക്ക് സ്വര്‍ണ വില എത്തി.

അഞ്ച് ദിവസം കൊണ്ട് 560 രൂപയാണ് സ്വര്‍ണ വിലയില്‍ വര്‍ധിച്ചത്. അതേസമയം വില വര്‍ധനവ് തുടങ്ങിയതോടെ മാസത്തിലെ ഉയര്‍ന്ന വിലയില്‍ നിന്ന് 80 രൂപ അകലെയാണ് സ്വര്‍ണ വില. സെപ്റ്റംബര്‍ നാലിന് രേഖപ്പെടുത്തിയ 44,240 രൂപയാണ് മാസത്തിലെ ഏറ്റവും ഉയര്‍ന്ന വില.

ആ​ഗോള വിപണിയിൽ മുന്നോട്ട്

ചൊവ്വാഴ്ച ആഗോള വിപണിയില്‍ സ്വര്‍ണ വില രണ്ടാഴ്ചയിലെ ഉയര്‍ന്ന വിലയിലെത്തി. ഡോളര്‍ ദുര്‍ബലമാകുന്നതാണ് സ്വര്‍ണ വിലയെ നയിക്കുന്നത്. സ്‌പോട്ട് ഗോള്‍ഡ് ഔണ്‍സിന് 1,932.79 ഡോളറിലാണ്. സെപ്റ്റംബര്‍ 5 ന് ശേഷമുള്ള ഏറ്റവും ഉയര്‍ന്ന നിലവാരമാണിത്.

രണ്ട് ദിവസത്തെ യുഎസ് ഫെഡറല്‍ റിസര്‍വിന്റെ പോളിസി യോഗത്തിന് മുന്നോടിയായി ഡോളര്‍ ഇടിവിലാണ്. കഴിഞ്ഞാഴ്ച എത്തിയ 6 മാസത്തെ ഉയര്‍ന്ന നിലയില്‍ നിന്ന് ഡോളര്‍ താഴ്ന്നു. 0.06 ശതമാനം താഴ്ന്ന് 105.14 നിലവാരത്തിലാണ് ഡോളര്‍ സൂചിക.

മറ്റു നഗരങ്ങളിലെ വില

ചെന്നൈയില്‍ പവന് 80 രൂപ വര്‍ധിച്ച് 44,400 രൂപയിലെത്തി. ഡല്‍ഹിയില്‍ പവന് 8 രൂപ വര്‍ധിച്ച് 44,168 രരൂപയിലാണ് വ്യാപാരം നടക്കുന്നത്. മുംബൈ, കൊല്‍ക്കത്ത, ബംഗളൂരു, ഹൈദരാബാദ്, പൂനെ, മംഗളുരു എന്നീ നഗരങ്ങളില്‍ 120 രൂപ വര്‍ധിച്ച് 44,160 രൂപയിലാണ് സ്വര്‍ണ വില. വഡോദരയില്‍ 120 രൂപ വര്‍ധിച്ച് 44,200 രൂപയിലാണ് സ്വര്‍ണം വ്യാപാരം നടക്കുന്നത്.

24 കാരറ്റ് സ്വര്‍ണ വില

കേരള വിപണിയില്‍ 24 കാരറ്റ് പവന് 112 രൂപ വര്‍ധിച്ച് 48,176 രൂപയിലെത്തി. ഗ്രാമിന് 14 രൂപ വര്‍ധിച്ച് 6,022 രൂപയിലാണ് വ്യാപാരം നടക്കുന്നത്.