സ്വര്‍ണ വില ഇന്നും കൂടി; മൂന്ന് ദിവസത്തിനിടെ വര്‍ധിച്ചത് 560 രൂപ; പ്രധാന നഗരങ്ങളിലെ വില അറിയാം

വര്‍ധനവ് തുടങ്ങിയാല്‍ പിന്നെ നിര്‍ത്താതെ വില ഉയരും. ഈ ശീലം തുടരുകയാണ് സ്വര്‍ണ വിലയില്‍. ജൂലായ് 13 മുതല്‍ അഞ്ച് ദിവസം സ്ഥിരത പുലര്‍ത്തിയ സ്വര്‍ണ വില തുടര്‍ച്ചയായ മൂന്ന് ദിവസങ്ങളിലായി ഉയരുകയാണ്. സ്വര്‍ണം വാങ്ങാനിരിക്കുന്നവരുടെ നെഞ്ചിടിപ്പ് കൂട്ടി വ്യാഴാഴ്ച ഗ്രാമിന് 10 രൂപയും പവന് 80 രൂപയും കേരള വിപണിയില്‍ വില വര്‍ധിച്ചു.

ഒരു ഗ്രാം സ്വര്‍ണത്തിന് 5,570 രൂപയും പവന് 44,560 രൂപയും നല്‍കണം. ജൂലായ് മാസത്തിലെ ഏറ്റവും ഉയര്‍ന്ന വിലയാണിത്. ഈ ആഴ്ചയില്‍ വില ഉയര്‍ന്ന മൂന്ന് ദിവസങ്ങളിലായി 560 രൂപ പവന് വര്‍ധിച്ചു. ഒന്നര മാസത്തെ ഉയര്‍ന്ന നിരക്കാണിത്.

ജൂലായ് 17 ന് വ്യാപാര ആഴ്ചയുടെ തുടക്കത്തിൽ 44,000 രൂപയിലായിരുന്നു സ്വർണ വില. 80 രൂപ, 400 രൂപ, 80 രൂപ തോതിലാണ് തൊട്ടടുത്ത ദിവസങ്ങളിൽ വില ഉയർന്നത്. ജൂലായ് 3 ന് രേഖപ്പെടുത്തിയ 43,240 രൂപയാണ് ഈ മാസത്തിലെ താഴ്ന്ന വില.

ആ​ഗോള വിപണിയിലും മുന്നേറ്റം

ആ​ഗോള സാഹചര്യങ്ങൾ മാറിയതാണ് വില ഉയരാൻ കാരണം. യുഎസ് ഫെഡറൽ റിസർവ് പലിശ നിരക്ക് വർധനവ് താൽക്കാലികമായി നിർത്തുമെന്ന പ്രതീക്ഷയിൽ ആ​ഗോള വിപണിയിൽ സ്വർണ വില കുതിപ്പിലാണ്. എട്ടാഴ്ചത്തെ ഏറ്റവും ഉയർന്ന നിലയിലേക്ക് വ്യാഴാഴ്ച സ്വർണ വില ഉയർന്നു. സ്പോട്ട് ​ഗോൾഡ് ഔൺസിന് 1,984.68 ഡോളറിലാണ്. ഡോളർ സൂചിക ഒരു വർഷത്തെ ഏറ്റവും താഴ്ന്ന നിലയിലേക്ക് എത്തി. 100.09 നിലവാരത്തിലാണ് ‌ഡോളർ ഇൻഡെക്സ് തുടരുന്നത്. 

ഇത് മറ്റ് കറൻസികൾ കൈവശമുള്ളവർക്ക് സ്വർണം വിലകുറഞ്ഞതാക്കി മാറ്റും. ഡോളർ ബലം വിടുന്നത് രൂപയെ ശക്തമാക്കുന്നുണ്ട്. ഡോളറിനെതിരെ 7 പൈസ നേട്ടത്തിൽ 82.02 നിലവാരത്തിലാണ് രൂപ വ്യപാരം തുടങ്ങിയത്. ബുധനാഴ്ച 82.09 നിലവാരത്തിലായിരുന്നു രൂപയുടെ ക്ലോസിം​ഗ്.

പ്രധാന ന​ഗരങ്ങളിലെ സ്വർണ വില

രാജ്യത്ത് കേരള വിപണിയിലെ സ്വർണ വില കുറഞ്ഞ നിരക്കാണ്. ചെന്നൈയിലാണ് ഏറ്റവും ഉയര്‍ന്ന സ്വര്‍ണ വില. 44,720 രൂപയാണ് ഒരു പവന് ചെന്നൈ വിപണിയില്‍ ഈടാക്കുന്നത്. വിവിധ വിപണികളിൽ 22 കാരറ്റ് പവന് എത്ര രൂപ ഈടാക്കുന്നു എന്ന് പരിശോധിക്കാം.

മുംബൈ- 44,560 രൂപ

ന്യൂഡല്‍ഹി- 44,600 രൂപ

കൊല്‍ക്കത്ത- 44,560 രൂപ

ബംഗളൂരു- 44,560 രൂപ

ഹൈദരാബാദ്- 44,560 രൂപ 

പൂനെ- 44,560 രൂപ

ബറോഡ- 44,480 രൂപ

അഹമ്മദാബാദ്- 44,480 രൂപ

ജയ്പൂര്‍- 44,560 രൂപ

ലഖ്‌നൗ- 44,560 രൂപ

കോയമ്പത്തൂര്‍- 44,720 രൂപ

മംഗളൂരു- 44,560 രൂപ