സ്വർണം വില കുതിക്കുന്നു; റെക്കോർഡ് വിലയിലേക്ക് 40 രൂപ അകലം മാത്രം; വില ഉയർന്ന് നിൽക്കുമ്പോൾ പ്ലാനെന്ത്?

ഉയര്‍ന്ന നിലവാരത്തില്‍ തുടര്‍ന്ന് ചൊവ്വാഴ്ചയിലെ സ്വര്‍ണ വില. കേരള വിപണിയില്‍ ചൊവ്വാഴ്ച സ്വര്‍ണ വിലയില്‍ മാറ്റമില്ല. തിങ്കളാഴ്ച രേഖപ്പെടുത്തിയ 45,880 രൂപയിലാണ് പവന്‍ വ്യാപാരം നടക്കുന്നത്. ഗ്രാമിന് 5,735 രൂപയാണ് ചെലവാക്കേണ്ടത്. മാസത്തിലെ ഉയര്‍ന്ന നിലവാരമാണിത്. തിങ്കളാഴ്ച പവന് 200 രൂപയും ഗ്രാമിന് 25 രൂപയുമാണ് വര്‍ധിച്ചത്. നിലവിലെ സ്വർണ വില ചരിത്രത്തിലെ ഉയർന്ന നിലവാരത്തിൽ നിന്ന് 40 രൂപ താഴെയാണ്.

ഒക്ടാേബര്‍ 28 നും 29നും രേഖപ്പെടുത്തിയ പവന് 45,920 രൂപയാണ് കേരള വിപണിയില്‍ ചരിത്രത്തില്‍ പവന് രേഖപ്പെടുത്തിയ ഏറ്റവും ഉയര്‍ന്ന നിരക്ക്. മേയ് 5 ന് രേഖപ്പെടുത്തിയ 45,760 രൂപയാണ് മറ്റൊരു സമീപകാല ഉയരം. തിങ്കളാഴ്ച നിരക്കുയർന്നപ്പോൾ തന്നെ രണ്ടാമത്തെ ഉയർന്ന നിരക്കായി പവന് 45,880 രൂപ മാറി.

സർവകാല റെക്കോർഡ് വിലയിൽ നിന്ന് 40 രൂപ മാത്രം താഴെയാണ് സ്വര്‍ണം ഇന്ന് വ്യാപാരം നടക്കുന്നത്. ആ​ഗോള വിപണിയിലെ മുന്നേറ്റം ഇതേ രീതിയിൽ തുടരുകയാണെങ്കിൽ ആഭ്യന്തര വിപണിയിലെ സ്വർണ വില ഉടൻ റെക്കോർഡ് വിലയിലെത്തുമെന്നാണ് പ്രതീക്ഷിക്കുന്നത്.

സ്വർണം 6 മാസത്തെ ഉയർന്ന നിലയിൽ

അനുകൂല സാഹചര്യങ്ങൾ മുതലാക്കുന്ന സ്വർണം 2,000 ഡോളറിന് മുകളിൽ സ്ഥിരത കൈവരിച്ചതിനൊപ്പം 6 മാസത്തെ ഏറ്റവും ഉയർന്ന നിലയിലെത്തി. ഫെഡറൽ റിസർവ് പലിശ നിരക്ക് വർധനവിൽ നിന്ന് പിന്നോട്ടേക്കെന്ന പ്രതീക്ഷയാണ് സ്വർണത്തിന് അനുകൂലമാകുന്നത്. ഡോളർ മൂന്ന് മാസത്തെ താഴ്ന്ന നിലയിലേക്ക് നീങ്ങിയതോടെ സ്വർണം ഉയരുകയാണ്. സ്പോട്ട് ഗോൾഡ് 0.06 ശതമാനം നേട്ടത്തിൽ ഔൺസിന് 2,015.65 ഡോളറിലാണ് വ്യാപാരം നടക്കുന്നത്. മെയ് 16 ന് ശേഷമുള്ള ഏറ്റവും ഉയർന്ന നിരക്കിലാണ് സ്വർണം.

ഡോളർ സൂചിക ഇടിവ് തുടരുകയാണ്. 103.17 നിലവാരത്തിലാണ് ഡോളർ വ്യാപാരം നടക്കുന്നത്. ഡോളർ ഇടിവ് തുടരുന്നത് സ്വർണത്തിന്റെ വില വർധനവിന് കാരണമാകും. പലിശ നിരക്കുകളെക്കുറിച്ച് ഫെഡറൽ റിസർവിൽ നിന്ന് കൂടുതൽ വിവരങ്ങൾ ലഭിക്കുന്നതുവരെ സ്വർണം 2,000 ഡോളറിന്റെ വ്യാപാരം നടക്കാൻ സാധ്യതയുണ്ടെന്നാണ് വിദ​ഗ്ധരുടെ നിരീക്ഷണം.

ഡിസംബറിൽ യുഎസ് സെൻട്രൽ ബാങ്ക് നിരക്കുകൾ നിലനിർത്തുമെന്ന് വ്യാപാരികൾ പ്രതീക്ഷിക്കുന്നത്. അതേസമയം അടുത്ത വർഷം മേയ് മാസത്തിൽ നിരക്ക് കുറയ്ക്കുന്നതിനുള്ള സാധ്യതയുണ്ടെന്നാണ് വിപണിയിലുള്ള പ്രതീക്ഷ. കുറഞ്ഞ പലിശനിരക്ക് സ്വർണത്തിലുള്ള താൽപര്യം വർധിപ്പിക്കും. ഇതാണ് സ്വർണ വില വർധിപ്പിക്കുന്നത്.

എങ്ങനെ സ്വർണം വാങ്ങാം

വില ഉയരുമ്പോൾ അത്യവശ്യമായി സ്വർണം വാങ്ങാനിരിക്കുന്നവർക്ക് വലിയ സാമ്പത്തിക ഭാരമുണ്ടാക്കും. വിവാഹ സീസണിലേക്ക് അടക്കം ഉടനെ സ്വർണം വാങ്ങാനുള്ളവരാണെങ്കിൽ ഉയർന്ന വില നൽകേണ്ടി വരും. വില ഉയരുന്നത് ചെറുകിട കച്ചവടക്കാർക്കും തിരിച്ചടിയാണ്. വില്പനയെ ബാധിക്കുമെന്ന ആശങ്ക സജീവമാണ്. അതേസമയം, മൂന്ന് മുതൽ 6 മാസത്തിന് ശേഷം സ്വർണം വാങ്ങാനുള്ളവരാണെങ്കിൽ ലാഭമുണ്ടാക്കാൻ വഴിയുണ്ട്.

ഇത്തരക്കാർക്ക് അഡ്വാൻസ് ​ഗോൾഡ് ബുക്കിം​ഗ് സ്കീം ഉപയോ​ഗപ്പെടുത്താം. നിലവിലുള്ള സ്വർണ വിലയിൽ നിശ്ചിത മാസത്തേക്ക് സ്വർണം ബുക്ക് ചെയ്തിടാം. വില ഉയരുകയാണെങ്കിൽ ബുക്ക് ചെയ്ത കുറഞ്ഞ വിലയ്ക്കും വില കുറയുകയാണെങ്കിൽ കുറഞ്ഞ വിലയ്ക്കും സ്വർണം വാങ്ങാമെന്ന നേട്ടമുണ്ട്. ഇതിന് ബുക്ക് ചെയ്യുന്ന അളവിന് അനുസരിച്ച് നിശ്ചിത തുക അഡ്വാൻസ് നൽകണം.

ഇതിന് പകരം സ്വർണം വാങ്ങാനുള്ള പ്രതിമാസ പേയ്‌മെന്റ് പദ്ധതികളിലേക്ക് തിരിയാം. സ്വർണ വില ഉയരുന്ന ഘട്ടത്തിൽ കമ്പനികളുടെ പ്രതിമാസ സ്കീമുകൾ വഴിയുള്ള വാങ്ങലുകളിൽ സാധാരണ ​ഗതിയിൽ വർധനവ് ഉണ്ടാകാറുണ്ട്.