സ്വർണം വാങ്ങാനിരിക്കുന്നവന്റെ കണ്ണ് തള്ളിപോകും; പതിയെ സ്വർണം കയറുന്നു; ഉടനെ വരുമോ റെക്കോർഡ് വില!

ഈയിടെയായി മാറ്റമില്ലാത്തത് സ്വർണ വിലയ്ക്ക് മാത്രമാണ്. ഈ വ്യാപാര ആഴ്ചയിൽ വെള്ളിയാഴ്ച വരെ അഞ്ചിൽ നാല് ദിവസവും സ്വർണ വില മാറ്റമില്ലാതെ തുടരുകയാണ്. വെള്ളിയാഴ്ചയും സ്വർണ വിലയിൽ മാറ്റമില്ല.

ചൊവ്വാഴ്ച രേഖപ്പെടുത്തിയ പവന് 45,480 രൂപയിലാണ് സ്വർണം ഇന്നും വ്യാപാരം നടക്കുന്നത്. ഗ്രാമിന് 5,685 രൂപയാണ് വെള്ളിയാഴ്ചയിലെ സ്വര്‍ണ വില. ചൊവ്വാഴ്ച പവന് 240 രൂപയും ​ഗ്രാമിന് 30 രൂപയും വർധിച്ചാണ് സ്വർണ വില ഈ നിലവാരത്തിലെത്തിയത്. മാസത്തിലെ ഉയര്‍ന്ന നിലവാരമാണിത്.

നവംബര്‍ 20 തിന് ആഴ്ചയിലെ ആദ്യ വ്യാപാര ദിനത്തില്‍ സ്വര്‍ണ വിലയില്‍ മാറ്റമുണ്ടായിരുന്നില്ല. 45,240 രൂപയിലാണ് സ്വര്‍ണം വ്യാപാരം തുടങ്ങിയത്. ചൊവ്വാഴ്ച 240 രൂപ സ്വര്‍ണ വിലയില്‍ വര്‍ധിച്ചതോടെയാണ് 45,480 രൂപയിലേക്ക് സ്വര്‍ണ വില എത്തിയത്. പിന്നീട് ബുധന്‍, വ്യാഴം ദിവസങ്ങളിലും മാറ്റമില്ലാതെ വെള്ളിയാഴ്ചയിലും ഇതേ നിലവാരത്തില്‍ സ്വര്‍ണം വ്യാപാരം നടക്കുകയാണ്.

കേരളത്തിലെ സ്വർണ വില പരിശോധിച്ചാൽ ഒക്ടോബർ 28,29 തീയതികളിൽ രേഖപ്പെടുത്തിയ 45,920 രൂപയാണ് പവന്റെ വിലയിലുള്ള സർവകാല റെക്കോർഡ്. മേയ് 5 ന് രേഖപ്പെടുത്തിയ 45,760 രൂപയാണ് മറ്റൊരു സമീപകാല ഉയരം. ഇതിന് സമീപത്താണ് നിലവിൽ സ്വർണം വ്യാപാരം നടക്കുന്നത്. 440- 280 രൂപ വ്യത്യാസം മാത്രമാണ് ഉയർന്ന നിലവാരത്തിൽ നിന്നുള്ളത്. ഇത് സമീപ ഭാവിയിൽ പുതിയ റെക്കോർഡ് വില കുറിക്കാനുള്ള സാധ്യത കാണിക്കുന്നു.

ആ​ഗോള വിപണിയിൽ

ദുർബലമായ യുഎസ് ഡോളറിന്റെ പിന്തുണയോടെ സ്വർണ വില വെള്ളിയാഴ്ച ഉയർന്നു. സ്പോട്ട് ഗോൾഡ് 0.1 ശതമാനം ഉയർന്ന് ഔൺസിന് 1,993.96 ഡോളർ നിലവാരത്തിലാണ് വ്യാപാരം നടക്കുന്നത്. തുടർച്ചയായ രണ്ടാം പ്രതിവാര നേട്ടത്തിന്റെ പാതയിലാണ് സ്വർണം. ഈ ആഴ്ച ഇതുവരെ 0.7 ശതമാനമാണ് ബുള്ളിയൻ ഉയർന്നത്.

ഡോളർ ഇടിവ് തുടരുകയാണ്. ഡോളർ സൂചിക 0.2 ശതമാനം ഇടിഞ്ഞു. തുടർച്ചയായ രണ്ടാമത്തെ ആഴ്‌ചയിലെ ഇടിവിന്റെ പാതയിലാണ് ഡോളർ. തൊഴിലില്ലായ്മ ആനുകൂല്യങ്ങൾക്കായി പുതിയ ക്ലെയിമുകൾ ഫയൽ ചെയ്യുന്ന അമേരിക്കക്കാരുടെ എണ്ണം പ്രതീക്ഷിച്ചതിലും കൂടുതൽ ഇടിഞ്ഞത് അടക്കമുള്ള കാര്യങ്ങളാണ് സ്വർണ വിലയിൽ കാര്യമായ മുന്നേറ്റത്തിന് തടയിടുന്നത്.

സ്വർണം മുന്നേറുമോ? വില എങ്ങോട്ട്

പുതിയ സ്വാധീനങ്ങളൊന്നും ഇല്ലെങ്കിൽ ഈ വർഷം മുഴുവൻ സ്വർണം 2,000 ഡോളറിന് മുകളിൽ വില നിലനിർത്താനുള്ള സാധ്യത സ്വർണത്തിനില്ലെന്നാണ് വിദ​ഗ്ധരുടെ നി​ഗമനം. മിഡിൽ ഈസ്റ്റിലെ സംഘർഷങ്ങൾ, കൂടുതൽ ബാങ്കിംഗ് സമ്മർദ്ദങ്ങൾ ഉണ്ടാകാനുള്ള സാധ്യത എന്നിവ പോലുള്ള ശക്തമായ കാരണങ്ങളില്ലെങ്കിൽ സ്വർണത്തിന് വിലയിടിവ് കാണാനുള്ള സാധ്യതയുണ്ടെന്നാണ് വിദ​ഗ്ധരുടെ നി​ഗമനം.

അതേസമയം സ്വർണ വിലയെ സ്വാധീനിക്കുന്ന ഡോളർ ഇടിയുകയാണ്. 10 വർഷത്തെ ട്രഷറി ബോണ്ട് യീൽഡ് രണ്ട് മാസത്തെ ഏറ്റവും താഴ്ന്ന നിലയിലാണ് ബുധനാഴ്ച അവസാനിച്ചത്. ഇത് ഹ്രസ്വകാലത്ത് സ്വർണ വിലയെ ഉയർത്താൻ സാധിക്കുന്ന ഘടകങ്ങളാണ്.