വാങ്ങാം അല്ലെങ്കിൽ ബുക്ക് ചെയ്യാം; സ്വർണ വില താഴ്ന്നിരിക്കുമ്പോൾ അവസരം നഷ്ടപ്പെടുത്തല്ലേ

ആഘോഷത്തിന്റെ തിരക്ക് തുടങ്ങിയപ്പോഴും സ്വർണ വാങ്ങാനുള്ളവർക്ക് ആശ്വാസമായി സ്വർണ വില. കേരള വിപണിയിൽ തിങ്കളാഴ്ച സ്വർണ വിലയിൽ മാറ്റമില്ല. തുടർച്ചയായ അഞ്ചാം ദിവസവും ഒരേ നിലവാരത്തിൽ വില തുടരുകയാണ്. ഓ​ഗസ്റ്റ് 17 വ്യാഴാഴ്ച രേഖപ്പെടുത്തിയ 43,280 രൂപയിലാണ് പവന്റെ വില. ​ഗ്രാമിന് 5,410 രൂപ നൽകണം.

ഓ​ഗസ്റ്റ് മാസത്തിലെ ഏറ്റവും കുറഞ്ഞ വിലയാണിത്. വ്യാഴാഴ്ച 280 രൂപ കുറഞ്ഞാണ് സ്വർണം ഈ നിലവാരത്തിലെത്തിയത്. കഴിഞ്ഞ ഒരാഴ്ച മാത്രം, 440 രൂപയാണ് സ്വര്‍ണ വിലയില്‍ കുറഞ്ഞത്. അതേസമയം ഓ​ഗസ്റ്റ് മാസത്തിൽ 1,040 രൂപയാണ് സ്വർണ വിലയിൽ കുറഞ്ഞത്. ഓഗസ്റ്റ് മാസത്തില്‍ സ്വര്‍ണ വില താഴേക്കുള്ള ട്രെന്‍ഡാണ് സൂചിപ്പിക്കുന്നത്. മാസത്തിലെ ആദ്യ ദിവസത്തില്‍ രേഖപ്പെടുത്തിയ 44,320 രൂപയാണ് ഓഗസ്റ്റിലെ ഏറ്റവും ഉയര്‍ന്ന വില.

21 ദിവസം പിന്നിടുമ്പോൾ ഓ​ഗസ്റ്റ് മാസത്തിൽ 1,040 രൂപ സ്വർണ വിലയിൽ കുറവ് വന്നു. ഓഗസ്റ്റ് 9 തിന് 44,000 രൂപയ്ക്ക് താഴെ എത്തിയ ശേഷം സ്വര്‍ണവില 43,000 നിലവാരത്തിലാണ് വ്യാപാരം നടക്കുന്നത്. തിങ്കളാഴ്ച രേഖപ്പെടുത്തിയ പവന് 43,280 രൂപ ജൂലായ് മാസം ആദ്യ വാരത്തിലേതിന് സമാനമായ നിരക്കാണ്.

ആ​ഗോള വിപണിയിൽ കുറയുന്നു

പലിശ നിരക്ക് വർധനവിന്റെ സാധ്യത ഉയരുന്നതിനാൽ ഡോളരും ബോണ്ട് യീൽഡും ശക്തമാകുന്ന ഘട്ടത്തിൽ ആ​ഗോള വിപണിയിൽ സ്വർണ വില ഇടിയുകയാണ്. കഴിഞ്ഞ അഞ്ച് സെഷനുകളിലെ ഇടിവിന് ശേഷം തിങ്കളാഴ്ച സ്വർണ വില 5 മാസത്തെ ഏറ്റവും താഴ്ന്ന നിലയ്ക്ക് മുകളിലേക്ക് കയറി. കഴിഞ്ഞ ആഴ്‌ച മാർച്ച് പകുതിയിലെ നിലവാരമായ 1,883.70 ഡോളറിലേക്ക് ഔൺസ് ​ഗോൾഡിന്റെ വില എത്തിയിരുന്നു.

തിങ്കളാഴ്ച 0.21 ശതമാനം നേട്ടത്തിൽ 1,893.34 ഡോളറിലാണ് സ്വർണ വില. ആ​ഗോള വിപണിയിൽ സ്വർണം 5 മാസത്തെ നിലവാരത്തിലെത്തുമ്പോഴും രൂപ ഇടിയുന്നതിനാലാണ് ആനുപാതികമായ വില കുറവ് ഇന്ത്യൻ വിപണിയിൽ ലഭിക്കാത്തത്.

സ്വർണ വില കുറവ് പ്രയോജനപ്പെടുത്താം

ആ​ഗോള വിപണിയിൽ കനത്ത ഇടിവ് കുറഞ്ഞ തോതിലാണെങ്കിലും ആഭ്യന്തര വിപണിയിൽ പ്രതിഫലിച്ചിട്ടുണ്ട്. അതിനാൽ കുറഞ്ഞ സ്വർണ വില പ്രയോജനപ്പെടുത്താൻ പരമാവധി ശ്രദ്ധിക്കേണ്ടതുണ്ട്. സ്വർണ വില ഇനിയും കുറയുമോ എന്ന കാര്യം ആ​ഗോള സംഭവ വികാസങ്ങളെ അടിസ്ഥാനമാക്കിയാകും നിശ്ചയിക്കുന്നത്.

സെൻട്രൽ ബാങ്ക് ​ഗവർണർമാരുടെ വാർഷിക സമ്മേളനത്തിൽ യുഎസ് ഫെഡറൽ റിസർവ് ചെയർമാൻ ജെറോം പവലിന്റെ പ്രസംഗത്തിനാണ് ആ​ഗോള വിപണിയിൽ നിക്ഷേപകർ കാത്തിരിക്കുന്നത്. വെള്ളിയാഴ്ച നടക്കുന്ന പ്രസം​ഗത്തിന്റെ സൂചന അടിസ്ഥാനമാക്കി സ്വർണ വിലയിൽ മാറ്റങ്ങളുണ്ടാകാം.

ഭൂരിഭാഗം സാമ്പത്തിക വിദഗ്ധരുടെ അഭിപ്രായത്തിൽ ഫെഡറൽ പലിശ നിരക്ക് ഉയർത്താൻ സാധ്യതയുണ്ട്. ഇത് സ്വർണ വിലയെ ഇടിക്കും. ഈ സാ​ഹചര്യത്തിൽ സ്വർണം വാങ്ങാനിരിക്കുന്നവരും അടുത്ത മാസങ്ങളിൽ ആവശ്യമുള്ളവർക്കും കുറഞ്ഞ വിലയിൽ വാങ്ങുകയോ അഡ്വാൻസ് ബുക്കിം​ഗ് ചെയ്തിടുകയോ ചെയ്യാം. കുറഞ്ഞ വിലയിൽ അഡ്വാൻസ് ബുക്ക് ചെയ്യുന്നവർക്ക് ഇനിയും വില കുറയുകയാണെങ്കിൽ വാങ്ങുന്ന സമയത്തെ വിലയിൽ സ്വർണം ലഭിക്കും. കേരളത്തിലെ പ്രധാന ജുവലറികളെല്ലാം ഇത്തരം പദ്ധതികൾ അവതരിപ്പിച്ചിട്ടുണ്ട്.