സ്വർണം വാങ്ങാനിരിക്കുന്നവർക്ക് ആശ്വാസിക്കാം; മനം മാറി സ്വര്‍ണ വില; രണ്ടാഴ്ചയ്ക്കിടയിലെ താഴ്ന്ന നിലവാരത്തിൽ

ഏത് ദിശയിലേക്ക് നീങ്ങണമെന്ന് ധാരണയില്ലാതെ ചാഞ്ചാടി കളിക്കുകയാണ് സ്വര്‍ണ വില. ആഗോള വിപണിയില്‍ യുഎസ് ഫെഡറല്‍ റിസര്‍വിന്റെ പലിശ നിരക്കുമായി ബന്ധപ്പെട്ട ചലനങ്ങളെ പിന്തുടരുകയാണ് സ്വര്‍ണം. ചൊവ്വാഴ്ച ഡോളര്‍ ശക്തമായതോടെ ആഗോള വിപണിയില്‍ സ്വര്‍ണ വില താഴേക്ക് വീണിരുന്നു.

കേരള വിപണിയിലും ചൊവ്വാഴ്ച സ്വർണ വിലയിൽ ഇടിവ് തുടരുകയാണ്. പവന് 80 രൂപ കുറഞ്ഞ് 45,000 രൂപയിലാണ് ചൊവ്വാഴ്ച സ്വർണം വ്യാപാരം നടക്കുന്നത്. ​ഗ്രാമിന് 10 രൂപ കുറഞ്ഞ് 5,625 രൂപയാണ് വില. തുടർച്ചയായ മൂന്നാം ദിവസവും സ്വർണ വില ഇടിഞ്ഞതോടെ മാസത്തിലെ താഴ്ന്ന നിലവാരത്തിലാണ് സ്വർണം.

ട്രെൻഡ് താഴേക്ക്

നവംബര്‍ മാസത്തില്‍ കേരള വിപണിയിലെ സ്വര്‍ണ വില ചാഞ്ചാട്ട സ്വഭാവം കാണിക്കുകയാണ്. നവംബറിൽ ആദ്യ ദിവസം 240 രൂപ കുറഞ്ഞ് 45,120 രൂപയിലായിരുന്നു സ്വര്‍ണ വില. തൊട്ടടുത്ത ദിവസം 80 രൂപ വര്‍ധിച്ച് 45,200 രൂപയിലേക്ക് എത്തി. തുടര്‍ച്ചയായ രണ്ടാം ദിവസവും 80 രൂപ വര്‍ധിച്ചതോടെ നവംബർ മൂന്നിന് സ്വർണ വില 45,280 രൂപയിലെത്തി. ഇതാണ് മാസത്തിലെ ഉയർന്ന നിലവാരം.

ഇവിടെ നിന്ന് തുടർച്ചയായ മൂന്ന് ദിവസമാണ് സ്വർണ വില ഇടിഞ്ഞത്. ശനിയാഴ്ച 80 രൂപയാണ് സ്വർണ വിലയിൽ കുറഞ്ഞത്. ശനിയാഴ്ച 45,200 രൂപയിലാണ് സ്വർണ വില വ്യാപാരം നടത്തിയത്. ഞായറാഴ്ച മാറ്റമില്ലതെ തുടർന്ന ശേഷം തിങ്കളാഴ്ച 120 രൂപയാണ് കുറഞ്ഞത്. 45,080 രൂപയാണ് തിങ്കളാഴ്ചയിലെ വില. ഇവിടെ നിന്ന് 80 രൂപ കൂടി കുറഞ്ഞാണ് ചൊവ്വാഴ്ച 45,000 രൂപയിലേക്ക് സ്വർണ വില എത്തിയത്. രണ്ടാഴ്ചയ്ക്കിടയിലെ ഏറ്റവും താഴ്ന്ന നിരക്കാണിത്.

ആ​ഗോള വിപണിയിൽ ഇടിവ്

ഡോളർ കുതിച്ചതിനാൽ ചൊവ്വാഴ്ച ആ​ഗോള വിപണിയിലും സ്വർണ വില ഇടിവിലാണ്. ചെയർ ജെറോം പവൽ ഉൾപ്പെടെയുള്ള ഫെഡറൽ റിസർവ് ഉദ്യോഗസ്ഥരുടെ അഭിപ്രായങ്ങൾക്ക് നിക്ഷേപകർ കാത്തിരിക്കുന്നതും സ്വർണ വിലയെ താഴേക്ക് എത്തിച്ചു. സ്‌പോട്ട് ഗോൾഡ് 0.1 ശതമാനം കുറഞ്ഞ് ഔൺസിന് 1,975.35 ഡോളറിന് സമീപമാണ് വ്യാപാരം നടക്കുന്നത്. തിങ്കളാഴ്ച ഔൺസിന് 1,990 ഡോളർ നിലവാരത്തിലായിരുന്നു സ്വർണം വ്യാപാരം നടത്തിയത്.

കഴിഞ്ഞ സെഷനിൽ ആറാഴ്ചത്തെ ഏറ്റവും താഴ്ന്ന നിലയിലെത്തിയ ശേഷമാണ് ഡോളർ സൂചിക ഉയർന്നത്. 0.1 ശതമാനം ഉയർന്ന് 105.37 നിലവാരത്തിലാണ് ഡോളർ സൂചികയുള്ളത്. ഇത് മറ്റ് കറൻസി ഉടമകൾക്ക് സ്വർണം കൂടുതൽ ചെലവേറിയതാക്കും. 10 വർഷത്തെ ട്രഷറി യീൽഡ് 4.6327 ശതമാനമായും ഉയർന്നു.

മറ്റു ന​ഗരങ്ങളിലെ സ്വർണ വില

വിവിധ ഇന്ത്യൻ ന​ഗരങ്ങളിൽ വ്യത്യസ്ത നിരക്കിലാണ് സ്വർണം വ്യാപാരം നടക്കുന്നത്. ചെന്നൈയില്‍ പവന് 240 രൂപ കുറഞ്ഞ് 45,360 രൂപയാണ് ചൊവ്വാഴ്ചയിലെ വില. ഡല്‍ഹിയില്‍ പവന് 80 രൂപ കുറഞ്ഞ് 45,120 രൂപയിലാണ് സ്വര്‍ണ വിലയുള്ളത്. വഡോദര, അഹമ്മദാബാദ് നഗരങ്ങളില്‍ 80 രൂപ കുറഞ്ഞ് 45,040 രൂപയിലാണ് സ്വര്‍ണം വ്യാപാരം നടത്തുന്നത്. കൊല്‍ക്കത്ത, ബംഗളൂരു, ഹൈദരാബാദ്, പൂനെ നഗരങ്ങളില്‍ 80 രൂപ കുറഞ്ഞ് 45,000 രൂപയാണ് പവന് വില.