മാസത്തിലെ താഴന്ന് നിലവാരത്തിൽ തുടർന്ന് സ്വർണം; വില ഇനി എങ്ങോട്ട്; വിപണി നൽകുന്ന സൂചനയെന്ത്

സ്വർണത്തിന്റെ നിൽപ്പ് കണ്ടാൽ വില കുറയാൻ മടിയാണോ എന്ന് തോന്നിപോകും. കഴിഞ്ഞ 6 ദിവസത്തെ വില നിലവാരം പരിശോധിച്ചാൽ ഒരൊറ്റ ദിവസം മാത്രമാണ് സ്വർണ വിലയിൽ മാറ്റമുണ്ടായത്. ബാക്കിയെല്ലാ ദിവസവും സ്വർണ വില മാറ്റമില്ലാതെ തുടർന്നു. വ്യാഴാഴ്ചയും ഇതിൽ മാറ്റമില്ല. കേരള വിപണിയിൽ ബുധനാഴ്ചയിലെ അതേ നിലവാരത്തിലാണ് സ്വർണം വ്യാപാരം നടക്കുന്നത്. പവന് 43,600 രൂപയും ​ഗ്രാമിന് 5,450 രൂപയുമാണ് വില.

കഴിഞ്ഞ ശനിയാഴ്ച തൊട്ട് മാറ്റമില്ലാതെ തുടരുന്ന വിലയിൽ ബുധനാഴ്ചയാണ് പവന് 280 രൂപയാണ് കുറഞ്ഞത്. ഇതോടെ സെപ്റ്റബര്‍ മാസത്തിലെ ഏറ്റവും കുറഞ്ഞ നിരക്കായ 43,600 രൂപയിലേക്ക് സ്വർണ വില എത്തിയത്. നാലാഴ്ചയ്ക്കിടയിലെ ഏറ്റവും താഴ്ന്ന നിരക്കിലേക്കും സ്വര്‍ണ വില എത്തി. ഓഗസ്റ്റ് 24 നാണ് സമീപ ഭാവിയില്‍ സ്വര്‍ണ വില 43,600 രൂപയിലേക്ക് എത്തിയത്.

മാറ്റമില്ലാത്ത വില

സെപ്റ്റംബർ 9 തിന് 120 രൂപ കുറഞ്ഞ് 43,880 രൂപയിലെത്തിയ സ്വർണ വില നാല് ദിവസമാണ് അതേ നിലവാരത്തിൽ തുടർന്നത്. ചൊവ്വാഴ്ച വരെ 43,880 രൂപയിൽ വിൽപ്പന നടത്തിയ സ്വർണം ബുധനാഴ്ചയാണ് വീണ്ടും കുറഞ്ഞത്. അതേ നിരക്കിൽ വ്യാഴാഴ്ചയും സ്വർണ വില തുടരുകയാണ്. ആ​ഗോള വിപണിയിൽ സ്വർണ വില താഴേക്ക് എത്തുന്നതാണ് കേരളമടക്കമുള്ള ആഭ്യന്തര വിപണിയിലും വില താഴേക്ക് പോകാനുള്ള കാരണം.

അതേസമയം ഡോളറിനെതിരെ രൂപ ദുർബലമാകുന്നത് ഒരു പരിധിക്കപ്പുറമുള്ള വില ഇടിവിനെ തടഞ്ഞു നിർത്തുകയാണ്. അതായത് ആ​ഗോള വിപണിയിലുണ്ടാകുന്ന വില ഇടിവിന്റെ പൂർണ ഫലം ലഭിക്കുന്നില്ലെന്ന് ചുരുക്കം.

മാസത്തിലെ ഉയർന്ന വില

സെപ്റ്റംബർ ആദ്യ വാരത്തിന് ശേഷം സ്വർണ വില ഇടിയുന്ന കാഴ്ചയാണ് കാണുന്നത്. സെപ്റ്റംബർ നാലിന് രേഖപ്പെടുത്തിയ 44,240 രൂപയാണ് മാസത്തിലെ ഏറ്റവും ഉയർന്ന വില. സെപ്റ്റംബർ 7 ന് 43,000 രൂപ നിലവാരത്തിലേക്ക് എത്തിയതിന് ശേഷം സ്വർണ വില കാര്യമായി മുന്നേറ്റം നടത്തിയിട്ടില്ല. തുടർച്ചയായ അഞ്ചാം ദിവസമാണ് സ്വർണ വില 43,000 രൂപ നിലവാരത്തിൽ തുടരുന്നത്.

ആ​ഗോള വിപണിയിൽ

യുഎസ് പണപ്പെരുപ്പ ഡാറ്റയ്ക്ക് പിന്നാലെ ഡോളറും ട്രഷറി യീൽഡും ദുർബലമായതോടെ സ്വർണ വില നേരിയ നേട്ടത്തിലാണ്. സ്‌പോട്ട് ഗോൾഡ് ഔൺസിന് 0.3 ശതമാനം നേട്ടത്തോെടെ 1,912.09 ഡോളറിലെത്തി. മൂന്നാഴ്ചത്തെ ഏറ്റവും താഴ്ന്ന നിരക്കിൽ നിന്ന് വലിയ മുന്നേറ്റം സ്വർണ വിലയിലില്ല. ഓഗസ്റ്റ് 25 ന് ശേഷമുള്ള ഏറ്റവും താഴ്ന്ന നിലവാരമായ 1,905.10 ഡോളറിലേക്ക് ബുധനാഴ്ച സ്വർണ വില എത്തിയിരുന്നു.

യുഎസ് ഉപഭോക്തൃ വില ഓ​ഗസ്റ്റിൽ വർധിച്ചതിന് പിന്നാലെയാണ് യുഎസ് ഡോളർ സൂചികയും 10 വർഷത്തെ ട്രഷറി യീൽഡും ഇടിഞ്ഞത്. അടിസ്ഥാന പണപ്പെരുപ്പത്തിലെ വാർഷിക വർദ്ധനവ് ഏകദേശം രണ്ട് വർഷത്തിനിടയിലെ കുറഞ്ഞ നിരക്കിലായിനാൽ പലിശ നിരക്ക് വർധനവ് ഫെഡറൽ റിസർവ്‌ താൽക്കാലികമായി നിർത്തുമെന്നാണ് സൂചന.