ശമ്പളം 60,000 രൂപ; 4 ലക്ഷം വായ്പയുള്ള വ്യക്തിക്ക് എത്ര രൂപയുടെ ഭവന വായ്പ അനുയോജ്യം; സാമ്പത്തിക പ്ലാനിതാ

വലിയ തുക ശമ്പളമുണ്ടെങ്കിലും പലരും സാമ്പത്തികമായ പ്രതിസന്ധിയിലെത്തുന്നത് കൃത്യമായി വിനയോ​ഗിക്കുന്നതിന്റെ അഭാവം കൊണ്ടാണ്. പരിധിയില്ലാതെ ചെലവാക്കുകയും തിരിച്ചടവ് പ്ലാനിം​ഗ് നടത്താതെ വായ്പകളെടുക്കുന്നതും സമ്പാദ്യത്തെ ഇല്ലാതാക്കുകയും വലിയ സാമ്പത്തിക ബുദ്ധിമുട്ട് ഉണ്ടാക്കുകയും ചെയ്യും. വീട് വെയ്ക്കുന്നതിന് മുന്നോടിയായി വലിയൊരു വായ്പയിലേക്ക് കടക്കുമ്പോൾ നിലവിലെ ചെലവുകളെ കണക്കാക്കി ഇനി എത്ര രൂപയുടെ തിരിച്ചടവ് സാധിക്കുമെന്നും എത്ര രൂപ വായ്പയെടുക്കണമെന്നും കണക്കാക്കേണ്ടതുണ്ട്. ഇതിന് അനുയോജ്യമാകുന്നൊരു സാമ്പത്തിക പ്ലാൻ നോക്കാം.

60,000 രൂപ ശമ്പളക്കാരന്റെ ചെലവ് ഇങ്ങനെ

60,000 രൂപ മാസ ശമ്പളമുള്ള സ്വകാര്യ കമ്പനി ജീവനക്കാരനെ ഇവിടെ ഉദാഹരണമായെടുക്കാം. വാടക വീട്ടിൽ താമസിക്കുന്ന വിവാഹം കഴിഞ്ഞ വ്യക്തി അടുത്ത് തന്നെ വീട് നിർമാണത്തിന് പദ്ധതിയിടുന്നു. നിലവില്‍ നാല് ലക്ഷത്തിന് മുകളിലുള്ള 2 വ്യക്തിഗത വായ്പകളുള്ള അദ്ദേഹം മാസത്തില്‍ 15,000 രൂപ ഈ വായ്പകളുടെ ഇഎംഐ ആയി ചെലവാക്കുന്നു. വാടക വീട്ടില്‍ 11,000 മാസ വാടക വരുന്നത്.

ഈ ശമ്പളത്തിൽ നിന്ന് വ്യക്തി​ഗത വായ്പകൾ അടച്ചു തീർക്കുകയും വീട് നിർമാണവും കുടുംബ ചെലവും ചെറിയ നിക്ഷേപവും അടങ്ങുന്ന നാല് പ്ലാനുകളാണുള്ളത്. ഈ ലക്ഷ്യങ്ങളെ പൂർത്തിയാക്കുന്നതിനൊപ്പം ഭവന വായ്പയിലേക്ക് പോകുമ്പോള്‍ എത്ര രൂപയുടെ വായ്പയ്ക്ക് ശ്രമിക്കുന്നതാണ് സാമ്പത്തികമായി ക്രമീകരിക്കാന്‍ സാധിക്കുന്നതെന്ന് നോക്കാം.

വായ്പ ബാധ്യത കുറയ്ക്കാം

വ്യക്തി​ഗത വായ്പകളുടെ ഇഎംഐയും വാടകയും അടച്ചുകഴിഞ്ഞാൽ ഏകദേശം 34,000 രൂപയാണ് ബാക്കി വരുന്നത്. ഈ തുകയിൽ എത്രത്തോളം വ്യക്തി​ഗത വായ്പയുടെ മുൻകൂർ തിരിച്ചടവിന് ഉപയോ​ഗിക്കാനാകുമെന്ന് ആദ്യം പരിശോധിക്കണം. ഭവന വായ്പയിലേക്ക് കടക്കുന്നതിന് മുൻപ് വ്യക്തി​ഗത വായ്പ ഒഴിവാക്കുന്നത് സാമ്പത്തിക ഭാരം കുറയ്ക്കും.

നിലവിലുള്ള വായ്പകൾ കാലവധി കുറഞ്ഞ, ചെലവ് കുറഞ്ഞ വായ്പയായി ഏകീകരിക്കുക എന്നതാണ്. അതുവഴി വ്യക്തി​ഗത വായ്പയുടെ ബാധ്യതയിൽ നിന്ന് വേ​ഗത്തിൽ ഒഴിയാം.

എമർജൻസി ഫണ്ട് തയ്യാറാക്കുക

സമ്പാദ്യത്തിലേക്കുള്ള ആദ്യപടിയെന്ന നിലയ്ക്ക് ചെറിയ എമർജൻസി ഫണ്ട് തയ്യാറാക്കുന്നതിൽ ശ്രദ്ധ കേന്ദ്രീകരിക്കണം. പെട്ടന്നുണ്ടാകുന്ന സാമ്പത്തിക ആവശ്യങ്ങൾക്ക് ഉപകാരപ്പെടുന്ന തരത്തിലുള്ള ലിക്വിഡ് നിക്ഷേപത്തിലേക്ക് ഈ പണം മാറ്റണം. ശമ്പളം വന്നതിന് ശേഷമുള്ള ആദ്യ കുറച്ച് ദിവസങ്ങൾക്കുള്ളിൽ നിക്ഷേപത്തിനായി ഡെബിറ്റ് ചെയ്യുന്ന ആവർത്തന നിക്ഷേപം ഇതിനായി ആരംഭിക്കാം. മികച്ചൊരു എമർജൻസി ഫണ്ട് ഉണ്ടായാൽ മ്യൂച്വൽ ഫണ്ടുകൾ പോലുള്ള നിക്ഷേപങ്ങൾ തുടങ്ങാം.

ഭവന വായ്പ എത്ര രൂപ ലഭിക്കും

ബാങ്കുകളുടെ നിയമവലി പ്രകാരം വരുമാനത്തിന്റെ 35-40 ശതമാനം വരെ പ്രതിമാസ ഇഎംഐ വരുന്ന തരത്തിലാണ് ഭവന വായ്പ അനുവദിക്കുക. മുകളിൽ നൽകിയ ഉദാഹരണം പ്രകാരം ഏകദേശം 25-28 ലക്ഷം രൂപയുടെ ഭവന വായ്പ ലഭിക്കും. പ്രതിമാസം ഏകദേശം 23,000 രൂപയായിരിക്കും ഇഎംഐ വരുന്നത്. അതേസമയം മറ്റു കുടുംബ ചെലവുകൾ കണക്കാക്കി എത്രമാത്രം തുക ഇഎംഐയിലേക്ക് മാറ്റാൻ സാധിക്കുമോ എന്ന് പരിശോധിക്കണം.

ഈ ചെലവുകൾ ശ്രദ്ധിക്കുക

വീട് വാങ്ങുന്നതിനിറങ്ങുമ്പോൾ വായ്പയോടൊപ്പം ചില ചെലവുകൾ സ്വയം വഹിക്കേണ്ടതായി വരും. ഭവന വായ്പ എന്നത് വീടിന്റെ വിലയുടെ 80-90 ശതമാനം വരെയായിരിക്കും. കൂടാതെ രജിസ്ട്രേഷനും സ്റ്റാമ്പ് ഡ്യൂട്ടി ചാർജുകളും വീട് വാങ്ങുന്നയാൾ കരുതണം. വീടിന്റെ ചെലവിന്റെ ഏകദേശം 20-30 ശതമാനം സ്വന്തം സമ്പാദ്യത്തിൽ നിന്ന് കണ്ടെത്താനാകണം. ഈ തുക സമാഹരിക്കുന്നതിനുള്ള വഴി കണ്ടെത്തുക എന്നതും പ്രധാനമാണ്.

നിലവിലുള്ള വായ്പകൾ അടുത്ത രണ്ട് വർഷത്തിനുള്ളിൽ ഏകീകരിക്കുകയും അടച്ചു തീർക്കുകയും ചെയ്താൽ നല്ലൊരു തുക ലാഭിക്കാനാകും. ഇത് നിക്ഷേപത്തിലേക്ക് മാറ്റിയതിന് ശേഷം ഒരു വീടിനായി ചെലവാക്കുക എന്നതാണ് ഏറ്റവും നല്ല നടപടി. ഇത് സാമ്പത്തിക ഭാരമില്ലാതെ എല്ലാ ചെലവുകളെയും കൈകാര്യം ചെയ്യാൻ സഹായിക്കുന്നു.