കേന്ദ്ര ബജറ്റ് 2026: മധ്യവർഗത്തിന് ലോട്ടറി അടിക്കുമോ? ആദായനികുതി ഇളവുകളിൽ വലിയ പ്രതീക്ഷയുമായി നികുതിദായകർ

പുതുവർഷം ആരംഭിച്ചതോടെ 2026-27 സാമ്പത്തിക വർഷത്തേക്കുള്ള കേന്ദ്ര ബജറ്റ് എപ്പോൾ അവതരിപ്പിക്കുമെന്ന ചർച്ചകൾ നിരന്തരമായി നടന്നു കൊണ്ടിരിക്കുകയായിരുന്നു. എല്ലാ വർഷത്തെയും പോലെ ഇത്തവണയും ഫെബ്രുവരി 1ന് തന്നെ കേന്ദ്ര ബജറ്റ് അവതരിപ്പിക്കും. ഇത്തവണ ശമ്പളക്കാരായ നികുതിദായകർ വലിയ പ്രതീക്ഷയിലാണ്. വർദ്ധിച്ചുവരുന്ന ജീവിതച്ചെലവുകൾക്കിടയിൽ ആദായനികുതി ഇളവുകളിലൂടെ കൂടുതൽ തുക കൈയ്യിൽ കരുതാമെന്ന പ്രതീക്ഷയിലാണ് മധ്യവർഗ കുടുംബങ്ങൾ.

നികുതി നിയമങ്ങൾ ലളിതമാക്കുന്നതിനൊപ്പം ആദായനികുതി റിട്ടേൺ ഫയലിംഗ് നടപടികൾ കൂടുതൽ സുഗമമാക്കണമെന്ന ആവശ്യവും ശക്തമാണ്. 2025-ലെ ബജറ്റിൽ പുതിയ നികുതി വ്യവസ്ഥയ്ക്ക് വൻ സ്വീകാര്യത ലഭിച്ചു. 12 ലക്ഷം വരെയുള്ള വരുമാനം പൂർണ്ണമായും നികുതി രഹിതമായതും നികുതിദായകർക്ക് ആശ്വാസകരമായ വാർത്തയായി.

പതിറ്റാണ്ടുകൾ പഴക്കമുള്ള 1961 ലെ നിയമത്തിന് പകരമായിട്ടാണ് പുതിയ ആദായനികുതി നിയമം, 2025 നിലവിൽ വന്നിരിക്കുന്നത്. ഇത് ഇന്ത്യയിലെ ആദായനികുതി വ്യവസ്ഥയിലെ ഏറ്റവും വലിയ പരിഷ്കാരങ്ങളിലൊന്നായി മാറിയിരിക്കുന്നു. ഈ വർഷത്തെ കേന്ദ്ര ബജറ്റിൽ അപ്രതീക്ഷിതമായ സംഭവ വികാസങ്ങൾ പ്രതീക്ഷിക്കേണ്ടെന്ന വാദങ്ങളും ഉയരുന്നുണ്ട്. എങ്കിലും നികുതിദായകർക്ക് നേട്ടം ഉറപ്പാക്കുന്ന മാറ്റങ്ങൾ പ്രഖ്യാപിച്ചേക്കാം.

കേന്ദ്ര ബജറ്റ് 2026: നികുതിദായകർ പ്രതീക്ഷിക്കുന്ന പ്രധാന 5 കാര്യങ്ങൾ

• 2026 ലെ കേന്ദ്ര ബജറ്റിൽ നികുതിദായകർ കൂടുതൽ ആദായനികുതി ഇളവ് പ്രതീക്ഷിക്കുന്നുണ്ട്.
• മധ്യവർഗത്തിന് പ്രയോജനപ്പെടുന്ന തരത്തിൽ ഉയർന്ന ഇളവ് പരിധികൾക്കും, കുറഞ്ഞ നികുതി നിരക്കുകൾക്കും വേണ്ടിയുള്ള ശക്തമായ ആവശ്യം ഉയർന്നു വന്നിട്ടുണ്ട്.
• നികുതി നിയമങ്ങളിലെ അവ്യക്തതകൾ ഒഴിവാക്കി, ഐടിആർ ഫയലിംഗ് നടപടികൾ കൂടുതൽ എളുപ്പമാക്കാനും നികുതി നോട്ടീസുകളുടെ എണ്ണം കുറയ്ക്കാനും സർക്കാർ ശ്രദ്ധിക്കണം.
• ഉയർന്ന അടിസ്ഥാന ഇളവ് പരിധികൾ, പെൻഷൻ, പലിശ വരുമാനം എന്നിവ ഉൾപ്പെടെയുള്ള അധിക ആശ്വാസം മുതിർന്ന പൗരന്മാർ പ്രതീക്ഷിക്കുന്നു.
• നികുതി ഭാരം കുറച്ചു കൊണ്ട്, വരുമാന വളർച്ചയെയും തൊഴിൽ സൃഷ്ടിയെയും പിന്തുണയ്ക്കുന്നതുമായ ഒരു ബജറ്റാണ് നികുതിദായകർ ആഗ്രഹിക്കുന്നത്.

Union Budget 2026: ചരിത്രം തിരുത്തി നിർമല സീതാരാമൻ; ഇത്തവണത്തെ കേന്ദ്ര ബജറ്റ് ഞായറാഴ്ച അവതരിപ്പിക്കും

2026 ലെ കേന്ദ്ര ബജറ്റ്: തീയതിയും സമയവും

2026 ഫെബ്രുവരി 1നാണ് ഈ വർഷത്തെ ബജറ്റ് അവതരണം നടക്കുന്നതെങ്കിലും ഇത്തവണ മറ്റൊരു പ്രത്യേകത കൂടിയുണ്ട്. ആദ്യമായി ഞായറാഴ്ച ഒരു ബജറ്റ് അവതരണം നടത്താൻ സർക്കാർ തീരുമാനിച്ചിരിക്കുന്നു എന്നതാണ് ആ പ്രത്യേകത. 2017-ൽ അരുൺ ജെയ്റ്റ്‌ലിയാണ് ബജറ്റ് അവതരണം ഫെബ്രുവരി 1ലേക്ക് മാറ്റിയത്. ഈ രീതി പിന്നീട് തുടർന്നു വരികയാണ്. കേന്ദ്ര ധനമന്ത്രി നിർമല സീതാരാമൻ തുടർച്ചയായ ഒൻപതാമത് ബജറ്റാണ് അവതരിപ്പിക്കാൻ ഒരുങ്ങുന്നത്.

ഫെബ്രുവരി 1ന് രാവിലെ 11 മണിക്ക് പാർലമെന്റിലാണ് ബജറ്റ് അവതരണം ആരംഭിക്കുക. സർക്കാരിന്റെ കാലാവധി അവസാനിക്കാൻ ഇനിയും സമയമുള്ളതിനാൽ ഇതൊരു പൂർണ്ണ ബജറ്റായിരിക്കും.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.