8 ശതമാനത്തിന് മുകളിൽ പലിശ; ഒപ്പം നികുതി നൽകേണ്ടതില്ല; നികുതിഭാരം കുറയ്ക്കാൻ നിക്ഷേപങ്ങളിതാ

നിക്ഷേപങ്ങളിൽ നിന്ന് മാന്യമായ റിട്ടേൺ ലഭിക്കുന്നതിനൊപ്പം നികുതി ഇളവ് കൂടി ലഭിക്കുന്നത് നിക്ഷേപകരെ സംബന്ധിച്ച് ഇരട്ട നേട്ടം തന്നെയാണ്. നികുതിദായകരാണെങ്കിൽ നികുതി ഭാരം കുറയ്ക്കുക എന്നതാണ് മുൻഗണന വിഷയം. സമ്പാദിച്ച വരുമാനം നിലനിർത്താനുള്ള വഴികൾ തേടുന്നത് സ്വാഭാവികമാണ്. ഇതിൽ നിയമപരമായ മാർ​ഗങ്ങളിലൊന്നാണ് നിക്ഷേപിക്കുക എന്നത്. ആദായ നികുതി നിയമത്തിലെ സെക്ഷൻ 80സി ക്ക് കീഴിൽ വരുന്ന നിക്ഷേപങ്ങളെല്ലാം നികുതി ഇളവ് ലഭിക്കുന്നവയാണ്. ഇവയിൽ ചിലതിന് 8 ശതമാനത്തിന് മുകളിലാണ് പലിശ.

80സി ഇളവ് ലഭിക്കുന്ന നിക്ഷേപങ്ങളിതാ

പബ്ലിക് പ്രൊവിഡന്റ് ഫണ്ട്, ടാക്സ് സേവിംഗ് സ്ഥിര നിക്ഷേപങ്ങൾ, സുകന്യ സമൃദ്ധി യോജന, സീനിയർ സിറ്റിസൺ സേവിംഗ്സ് സ്കീം, നാഷണൽ സേവിംഗ്സ് സർട്ടിഫിക്കറ്റ് തുടങ്ങിയ സർക്കാർ നിയന്ത്രണത്തിലുള്ള സ്കീമുകൾ നികുതി ഇളവ് നൽകുന്നവയാണ്. പലിശ വഴിയുള്ള ഗ്യാരണ്ടീഡ് ആദായവും ആദായവും ഇവ നൽകുന്നു.നാഷണൽ പെൻഷൻ സ്കീം (എൻപിഎസ്), ഇക്വിറ്റി-ലിങ്ക്ഡ് സേവിംഗ്സ് സ്കീമുകൾ പോലുള്ള നിക്ഷേപങ്ങൾക്കും നികുതി ഇളവുണ്ട്. ഇവയിൽ പൂർണമായും നികുതി ഇളവുള്ള നിക്ഷേപങ്ങൾ ഏതെല്ലാമെന്ന് നോക്കാം.

പബ്ലിക് പ്രൊവിഡൻ്റ് ഫണ്ട്

പൂർണമായും നികുതി ഇളവുകൾ നൽകുന്ന ജനകീയമായൊരു നിക്ഷേപ മാർ​ഗമാണ് പബ്ലിക് പ്രൊവിഡൻ്റ് ഫണ്ട്. നിലവിൽ പ്രതിവർഷം 7.1 ശതമാനം പലിശയാണ് പബ്ലിക് പ്രൊവിഡൻ്റ് ഫണ്ട് നിക്ഷേപങ്ങൾക്ക് ലഭിക്കുന്നത്.

പബ്ലിക് പ്രൊവിഡൻ്റ് ഫണ്ടിലേക്ക് നൽകുന്ന നിക്ഷേപം ആദായനികുതി നിയമത്തിലെ സെക്ഷൻ 80സി പ്രകാരം നികുതി ഇളവുകൾക്ക് അർഹമാണ്. ഇതുവഴി നികുതി അടയ്‌ക്കേണ്ട വരുമാനം 1.50 ലക്ഷം രൂപ വരെ ഒഴിവാക്കാനാകും. പബ്ലിക് പ്രൊവിഡൻ്റ് ഫണ്ടിലെ പലിശ വരുമാനവും കാലാവധിയിൽ ലഭിക്കുന്ന മെച്യൂരിറ്റി തുകയും നികുതി രഹിതമാണ്.

സീനിയർ സിറ്റിസൺ സേവിംഗ്സ് സ്കീം

കേന്ദ്ര സർക്കാർ മുതിർന്ന പൗരന്മാർക്കായി ആരംഭിച്ച നിക്ഷേപമാണ് സീനിയർ സിറ്റിസൺ സേവിം​ഗ്സ് സ്കീം. 60 വയസോ അതിൽ കൂടുതലോ പ്രായമുള്ള ഇന്ത്യൻ താമസക്കാർക്ക് നിക്ഷേപിക്കാം. വിആർഎസ് പ്രകാരം വിരമിച്ചവർക്ക് 55 വയസിൽ നിക്ഷേപത്തിൽ ചേരാം. വ്യക്തി​ഗത അക്കൗണ്ടും പങ്കാളിയുമായി ചേർന്ന് ജോയിന്റ് അക്കൗണ്ടോ ആരംഭിക്കാം. ജനുവരി-മാർച്ച് പാദത്തിൽ സീനിയർ സിറ്റിസൺ സേവിം​ഗ്സ് സ്കീമിന് 8.2 ശതമാനം പലിശ നൽകുന്നു.

1,000 രൂപ മുതൽ 30 ലക്ഷം രൂപ വരെ സീനിയർ സീനിയർ സിറ്റിസൺ സേവിം​ഗ്സ് സ്കീമിൽ നിക്ഷേപിക്കാം. നിക്ഷേപങ്ങൾ 1,000 രൂപയുടെ ഗുണിതങ്ങളിൽ നടത്തണം. നിക്ഷേപിക്കുന്ന തുകയ്ക്ക് 1.50 ലക്ഷം രൂപ വരെ നികുതി ഇളവ് ലഭിക്കും. ലഭിക്കുന്ന പലിശ പൂർണമായും നികുതി വിധേയമാണ്. എന്നാൽ സാമ്പത്തിക വർഷത്തിൽ മുതിർന്ന പൗരന്മാർക്ക് ലഭിക്കുന്ന പലിശ 50,000 രൂപയിൽ കുറവാണെങ്കിൽ സ്രോതസിൽ നിന്നുള്ള നികുതി ഈടാക്കില്ല.

സുകന്യ സമൃദ്ധി യോജന

പെൺകുട്ടികളുടെ ഭാവി സുരക്ഷിതമാക്കാൻ കേന്ദ്ര സർക്കാർ ആരംഭിച്ച സമ്പാദ്യ പദ്ധതിയാണ് സുകന്യ സമൃദ്ധി യോജന. നിലവിൽ 8.1 ശതമാനം പലിശയാണ് സുകന്യ സമൃദ്ധി യോജനയ്ക്ക് ലഭിക്കുന്നത്. 10 വയസ് വരെയുള്ള പെൺമക്കളുടെ പേരിൽ നിക്ഷേപിക്കാം.

അക്കൗണ്ട് തുറക്കുന്ന തീയതി മുതൽ 21 വർഷം നിക്ഷേപം തുടരണം. ഇതിൽ 15 വർഷമാണ് നിക്ഷേപിക്കേണ്ടത്. പ്രതിമാസം കുറഞ്ഞത് 250 രൂപ മുതൽ വർഷത്തിൽ 1.5 ലക്ഷം രൂപ വരെ നിക്ഷേപിക്കാം. കാലാവധിയിൽ ലഭിക്കുന്ന തുക പൂർണമായും നികുതി രഹിതമാണ്.