സ്വർണ വില വീണ്ടും കുറയുന്നു; സർവകാല ഉയരത്തിൽ നിന്ന് 880 രൂപ താഴെ; തന്ത്രം മാറ്റി ആഭരണപ്രേമികൾ

ആഭരണ പ്രേമികളെ സന്തോഷ വാർത്ത. സർവകാല ഉയരത്തിലെത്തി പേടിപ്പിച്ച ശേഷം സ്വർണ വിലയിൽ കാര്യമായ ഇടിവ്. പുതുവർഷത്തിലെ ആദ്യ ആഴ്ചയിലെ വില ഇടിവ് രണ്ടാം വാരത്തിലും തുടരുന്നത് സ്വർണ വാങ്ങാനിരിക്കുന്നവർക്ക് ആശ്വാസം പകരുന്നതാണ്. കഴിഞ്ഞ ആഴ്ച 600 രൂപ ഇടിവിൽ വ്യാപാരം അവസാനിപ്പിച്ച സ്വർണ വില തിങ്കളാഴ്ച വ്യാപാരം തുടങ്ങിയതും മാന്യമായ കുറവോടെയാണ്.

കേരളത്തില്‍ തിങ്കളാഴ്ച 160 രൂപയാണ് സ്വര്‍ണ വിലയില്‍ കുറവുണ്ടായത്. ഒരു പവന് 46,240 രൂപയാണ് വില. ഗ്രാമിന് 20 രൂപ കുറഞ്ഞ് 5,780 രൂപയിലേക്ക് സ്വര്‍ണ വില താഴ്ന്നു. മാസത്തിലെ താഴ്ന്ന നിലവാരമാണിത്.

രണ്ടര ആഴ്ചയ്ക്കിടയിൽ കേരളത്തിൽ രേഖപ്പെടുത്തിയ കുറഞ്ഞ നിരക്കാണ് തിങ്കളാഴ്ചയിലെ വില. നേരത്തെ ഡിസംബര്‍ 21 നാണ് സമാന നിലവാരത്തിലേക്ക് സ്വര്‍ണ വില എത്തിയത്. സര്‍വകാല ഉയരമായ 47,120 രൂപയില്‍ നിന്നും 880 രൂപ ഇടിഞ്ഞാണ് തിങ്കളാഴ്ച സ്വര്‍ണം വ്യാപാരം നടക്കുന്നത്.

ഇടിവിന്റെ കാലം

കേരള വിപണിയിൽ കഴിഞ്ഞ വാരം 47,000 രൂപയുടെ ഉയർന്ന വിലയിൽ നിന്ന് 46,400 രൂപ വരെ സ്വർണ വില എത്തി. ആദ്യ ദിവസങ്ങളിൽ മുന്നേറ്റമുണ്ടായെങ്കിലും തുടർച്ചയായ മൂന്ന് ദിവസത്തെ ഇടിവാണ് സ്വർണ വില താഴേക്ക് എത്തിച്ചത്. 600 രൂപയാണ് മൂന്ന് ദിവസം കൊണ്ട് കുറവ് വന്നത്. ജനുവരി ഒന്നിന് മാറ്റമില്ലാതെ 46,840 രൂപയിലാണ് സ്വര്‍ണം വ്യാപാരം ആരംഭിച്ചത്.

രണ്ടാം ദിവസം 160 രൂപ വര്‍ധിച്ച് 47,000 രൂപയിലേക്ക് എത്തിയിരുന്നു. ഇതാണ് മാസത്തിലെ ഉയർന്ന നിലവാരം. ബുധനാഴ്ച മുതലാണ് സ്വര്‍ണ വില ഇടിയാന്‍ തുടങ്ങിയത്. 200 രൂപ കുറഞ്ഞ് 46,800 രൂപയിലേക്ക് എത്തിയ ശേഷമാണ് വ്യാഴാഴ്ച 320 രൂപ കുറഞ്ഞ് 46,480 രൂപയിലേക്ക് സ്വര്‍ണ വില എത്തുന്നത്. ഇവിടെ നിന്നാണ് 80 രൂപയുടെ ഇടിവ് വെള്ളിയാഴ്ച രേഖപ്പെടുത്തിയത്. 46,400 രൂപയിലെത്തിയ സ്വർണ വില ശനിയാഴ്ചയും ഇതേ നിലവാരം തുടർന്നു.

ആ​ഗോള വിപണിയിൽ

കഴിഞ്ഞ ആഴ്‌ചയിലെ സമ്മിശ്ര യു‌എസ് സാമ്പത്തിക ഡാറ്റയ്ക്ക് ശേഷം ഫെഡറൽ റിസർവ് പലിശനിരക്ക് കുറയ്ക്കുന്നതിനെ പറ്റി കൂടുതൽ സൂചനകൾക്കായി വിപണി പണപ്പെരുപ്പ ഡാറ്റയിലേക്ക് ശ്രദ്ധകേന്ദ്രീകരിച്ചതിനാൽ സ്വർണ വില ആ​ഗോള വിപണിയിൽ കാര്യമായ നേട്ടമുണ്ടാക്കുന്നില്ല. സ്പോട്ട് ​ഗോൾഡ് 0.45 ശതമാനം ഇടിഞ്ഞ് ഔൺസിന് 2,036.68 ഡോളറിലാണ് വ്യാപാരം നടക്കുന്നത്. പലിശ നിരക്ക് കുറയ്ക്കുന്നതിൽ വ്യക്തതയില്ലാത്തതിനാൽ ഡോളറും ബോണ്ട് യീൽഡും നേട്ടത്തിലാണ്.

2023 ജൂലായ് മുതലുള്ള ഏറ്റവും മികച്ച നേട്ടമാണ് കഴിഞ്ഞാഴ്ച ഡോളർ രേഖപ്പെടുത്തിയത്. മൂന്നാഴ്ചയ്ക്ക് ശേഷം സ്വർണം ഇടിവേക്കും പോയി. ഡോളർ സൂചിക നേട്ടത്തോടെ 102.49 നിലവാരത്തിലാണ്. 10 വർഷത്തെ യുഎസ് ട്രഷറി യീൽഡ് 4 ശതമാനത്തിന് മുകളിൽ തിരിച്ചെത്തി. ഇത് സ്വർണ വിലയെ താഴേക്ക് എത്തിക്കും.

തന്ത്രം മാറ്റി ആഭരണ പ്രേമികൾ

ആഭ്യന്തര വിപണിയിൽ റെക്കോർഡ് ഉയരത്തിലേക്ക് പോയ സമയം ശൂന്യമായ സ്വർണ വിപണിയിൽ ആഭരണ പ്രേമികൾ തിരികെ എത്തിയെന്നാണ് റിപ്പോർട്ട്. റെക്കോർഡ് ഉയരത്തിൽ നിന്ന് പിന്നോട്ട് പോയതിനാൽ ഭൗതിക സ്വർണത്തിന്റെ പ്രധാന ഉപഭോക്താവായ ഇന്ത്യയിൽ സ്വർണം വാങ്ങൽ കഴിഞ്ഞ ആഴ്ച ഉയർന്നിരുന്നു. ഇടിവിൽ വാങ്ങുക എന്ന നയത്തിലേക്ക് ആഭരണ പ്രേമികൾ തിരിഞ്ഞതാണ് ഈ മുന്നേറ്റത്തിന്റെ കാരണം.