സ്വർണം വാങ്ങാനുള്ളവർക്ക് ആശ്വസിക്കാം; ട്വിസ്റ്റോടെ സ്വർണ വില താഴേക്ക്; ഇനിയും വില കുറയാൻ സാധ്യത

ആഗോള വിപണിയില്‍ സ്വര്‍ണത്തിന് അനുകൂലമായ വിപണി സാഹചര്യങ്ങള്‍ മാറിമറിഞ്ഞതോടെ ആഭ്യന്തര വിപണിയില്‍ സ്വര്‍ണ വിലയില്‍ ഇടിവ്. മാസങ്ങളായി ഇടിവില്‍ തുടരുന്ന ഡോളറും ബോണ്ട് യീല്‍ഡും നേട്ടമുണ്ടാക്കാന്‍തുടങ്ങിയതോടെ സ്വര്‍ണ വില താഴേക്കാണ്. കേരള വിപണിയില്‍ സ്വര്‍ണം വാങ്ങാനിരിക്കുന്നവര്‍ക്ക് ആശ്വാസമായി വെള്ളിയാഴ്ച സ്വര്‍ണ വില 80 രൂപ കുറഞ്ഞു.

പവന് 46,400 രൂപയിലാണ് വെള്ളിയാഴ്ച കേരള വിപണിയില്‍ സ്വര്‍ണം വ്യാപാരം നടക്കുന്നത്. ഗ്രാമിന് 10 രൂപ കുറഞ്ഞ് 5,800 രൂപയിലെത്തി. മാസത്തിലെ താഴ്ന്ന നിലവാരമാണിത്. സമീപകാല വില പരിശോധിക്കുമ്പോള്‍ രണ്ടാഴ്ചയ്ക്കിടയിലെ ഏറ്റവും താഴ്ന്ന വിലയാണിത്. ഡിസംബർ 22 നാണ് നേരത്തെ ഈ നിലവാരത്തിൽ സ്വർണ വില എത്തിയത്. തുടർച്ചയായ മൂന്നാം ദിവസമാണ് കേരള വിപണിയിൽ സ്വർണ വില ഇടിയുന്നത്.

ഇടിവിന്റെ ആഴ്ച

തുടര്‍ച്ചയായ മൂന്ന് ദിവസത്തെ ഇടിവോടെ കേരള വിപണിയിലെ സ്വര്‍ണ വിലയിൽ 600 രൂപയാണ് കുറവ് വന്നത്. ജനുവരി ഒന്നിന് 46,840 രൂപയിലാണ് സ്വര്‍ണം വ്യാപാരം ആരംഭിച്ചത്. രണ്ടാം ദിവസം 160 രൂപ വര്‍ധിച്ച് 47,000 രൂപയിലേക്ക് എത്തിയിരുന്നു. ഇതാണ് മാസത്തിലെ ഉയർന്ന നിലവാരം.

ബുധനാഴ്ച മുതലാണ് സ്വര്‍ണ വില ഇടിയാന്‍ തുടങ്ങിയത്. 200 രൂപ കുറഞ്ഞ് 46,800 രൂപയിലേക്ക് എത്തിയ ശേഷമാണ് വ്യാഴാഴ്ച 320 രൂപ കുറഞ്ഞ് 46,480 രൂപയിലേക്ക് സ്വര്‍ണ വില എത്തുന്നത്. ഇവിടെ നിന്നാണ് 80 രൂപയുടെ ഇടിവ് വെള്ളിയാഴ്ച രേഖപ്പെടുത്തിയത്. മൂന്ന് ദിവസത്തിനിടെ ഗ്രാമിന് 75 രൂപയാണ് കുറഞ്ഞത്.

ആ​ഗോള വിപണിൽ ഇടിവ്

യുഎസ് ഫെഡറൽ റിസർവിന്റെ മിനുറ്റ്സിന് ശേഷം പലിശ നിരക്ക് കുറയുന്നത് സംബന്ധിച്ച് നേരത്തെയുള്ള പ്രതീക്ഷകൾ മങ്ങുന്നത് സ്വർണ വിലയെ കാര്യമായി ബാധിക്കുകയാണ്. പ്രതീക്ഷകൾക്ക് മങ്ങലേറ്റതോടെ ഡോളർ ശക്തിപ്പെടുന്നത് സ്വർണ വിലയെ ഇടിവിലേക്ക് നയിക്കുകയാണ്. വെള്ളിയാഴ്ച സ്വർണവില നാല് ആഴ്ചയ്ക്കിടെയിലെ ആദ്യ ഇടിവ് രേഖപ്പെടുത്തുകയാണ് സ്വർണം. ഇതോടൊപ്പം നിരക്ക് സംബന്ധിച്ചുള്ള കൂടുതൽ സൂചനകൾക്കായി പ്രധാന തൊഴിൽ റിപ്പോർട്ടിൽ ശ്രദ്ധ കേന്ദ്രീകരിച്ചതും സ്വർണ വിലയെ ഇടിച്ചു.

സ്പോട്ട് ഗോൾഡ് 0.09 ശതമനം ഉയർന്ന് ഔൺസിന് 2,045.41 നിലവാരത്തിലാണ് വ്യാപാരം നടക്കുന്നത്. തുടർച്ചയായ മൂന്ന് പ്രതിവാര നേട്ടങ്ങൾക്ക് ശേഷം ഈ ആഴ്‌ചയിൽ ഇത് ഇതുവരെ ഏകദേശം 0.8 ശതമാനം കുറഞ്ഞു.

വില ഇടിയാൻ സാധ്യത?

നിലവിലെ ആ​ഗോള സൂചനകൾ പ്രകാരം സ്വർണ വില ഇനിയും കുറയാനുള്ള സാധ്യതയുണ്ടെന്നാണ് വിദ​ഗ്ധരുടെ അനുമാനം. കഴിഞ്ഞ ദിവസം പുറത്ത് വന്ന ഫെഡറൽ റിസർവ് ഡിസംബർ യോ​ഗ മിനുറ്റ്സ് പ്രകാരം പണപ്പെരുപ്പം നിയന്ത്രണവിധേയമാകുമെന്ന് ഫെഡറൽ റിസർവ് ഉദ്യോഗസ്ഥർക്ക് ബോധ്യപ്പെട്ടിരുന്നുവെങ്കിലും നിരക്ക് കുറയ്ക്കൽ വീക്ഷണത്തെക്കുറിച്ച് ഉയർന്ന തോതിലുള്ള അനിശ്ചിതത്വം നിലനിൽക്കുന്നുണ്ട്.

ഇത് പലിശ നിരക്ക് കുറയ്ക്കാനുള്ള ഉടനെയുള്ള സാധ്യതകളെ തള്ളികളഞ്ഞതിനാലാണ് സ്വർണ വില ഇടിയുന്നത്. പിന്നാലെ ഡോളർ സൂചിക ശക്തമാകുന്നത് കാണാം. 2023 ജൂലായ് മുതലുള്ള ഏറ്റവും മികച്ച ആഴ്ചയിലേക്കാണ് ഡോളർ നിങ്ങുന്നത്. ഇത് സ്വർണ വിലയിൽ ഇനിയുള്ള ഇടിവിന്റെ സാധ്യത കാണിക്കുന്നു.