വാങ്ങാനിരിക്കുന്നവര്‍ക്ക് പിടികൊടുക്കാതെ സ്വര്‍ണ വില; ഇടിവിന് ശേഷം തിരികെ കയറി; ഇന്നത്തെ നിരക്കിങ്ങനെ

ഓണത്തിന് ശേഷം കേരളത്തിൽ വിവാഹ സീസൺ കൂടുതൽ സജീവമാകാൻ ഇരിക്കുകയാണ്. സീസണയാതിനാൽ തന്നെ സ്വർണത്തിന് ആവശ്യക്കാരേറുമെന്നതിൽ സംശയവുമില്ല. വിവാഹ സീസണിൽ സ്വർണം വാങ്ങാനിരിക്കുന്നവർക്ക് യാതൊരു ആശ്വാസവും നൽകാതെയാണ് സ്വർണ വില കയറുന്നത്. ശനിയാഴ്ചയും കേരള വിപണിയിൽ സ്വര്‍ണ വില വര്‍ധിച്ചു.

പവന് 120 രൂപയും ഗ്രാമിന് 15 രൂപയുമാണ് വര്‍ധിച്ചത്. പവന് 44,160 രൂപയും ഗ്രാമിന് 5,515 രൂപയുമാണ് കേരളത്തില്‍ ശനിയാഴ്ച സ്വര്‍ണത്തിന് ഈടാക്കുന്ന വില. തിങ്കളാഴ്ച സ്വര്‍ണ വിലയില്‍ നേരിയ കുറവുണ്ടായിരുന്നു. പവന് 80 രൂപ കുറഞ്ഞ് 44,040 രൂപയിലായിരുന്നു സ്വര്‍ണ വില.

കേരള വിപണിയില്‍ 24 കാരറ്റ് സ്വര്‍ണത്തിനും വില വര്‍ധിച്ചു. ഗ്രാമിന് 17 രൂപ വര്‍ധിച്ച് 6,022 രൂപയിലാണ് സ്വര്‍ണ വില. പവന് 136 രൂപ വര്‍ധിച്ചതിനാല്‍ 48,176 രൂപ നല്‍കണം.

ഓ​ഗസ്റ്റിലെ ചാഞ്ചാട്ടം

ഓ​ഗസ്റ്റ് മാസത്തിൽ 1,040 രൂപ വരെ താഴേക്ക് ഇറങ്ങി ആശ്വാസ നിരക്കിലെത്തിയ സ്വർണം വെറും 200 രൂപയുടെ ഇളവാണ് മാസാവസാനം നൽകിയത്. ഓഗസ്റ്റ് മാസത്തിൽ ആദ്യ ദിവസം 44,320 രൂപയിലാണ് സ്വർണ വിലയെങ്കിൽ മാസത്തിലെ അവസാന ​ദിവസം സ്വര്‍ണ വില 44,120 രൂപയിലേക്ക് എത്തി. ഇതിന് മുന്നോടിയായി കനത്ത തിരിച്ചു വരവ് സ്വർണ വിലിയിലുണ്ടായിരുന്നു.

ഈ ആഴ്ച സ്വർണ വില മാറ്റമില്ലാതെ 43,600 രൂപയിലാണ് വ്യാപാരം തുടങ്ങിയത്. ചൊവ്വാഴ്ച 160 രൂപ വര്‍ധിച്ച് സ്വര്‍ണ വില 43,760 രൂപയിലെത്തി. ബുധനാഴ്ച 240 രൂപ വര്‍ധിച്ച് 44,000 രൂപയിലും വ്യാഴാഴ്ചയിലെ 120 രൂപയുടെ വര്‍ധിച്ച് 44,120 രൂപയിലുമായിരുന്നു സ്വർണ വില. വെള്ളിയാഴ്ച നേരിയ ആശ്വാസം എന്ന കണക്കെ 80 രൂപയും കുറഞ്ഞു. ഈ ആഴ്ച മാത്രം 520 രൂപ സ്വർണ വിലയിൽ വർധനവുണ്ടായി.

സെപ്റ്റംബറിൽ എങ്ങോട്ട്

ആ​ഗോള വിപണിയിൽ നാലാഴ്ചയിലെ ഉയർന്ന നിലവാരത്തിലാണ് സ്വർണ വില. വരാനിരിക്കുന്ന സെപ്റ്റംബർ യോ​ഗത്തിൽ യുഎസ് ഫെഡറൽ റിസർവ് പലിശ നിരക്ക് വർധിപ്പിക്കില്ലെന്ന സൂചനയാണ് കഴിഞ്ഞ ആഴ്ചയുടെ അവസാനത്തോടെ സ്വർണ വിലയിൽ കുത്തനെയുള്ള മുന്നേറ്റത്തിന് കാരണമായത്.

രാജ്യാന്തര വിപണിയിൽ സ്‌പോട്ട് സ്വർണ വില ഔൺസിന് 1,939 ഡോളറിലാണ് വെള്ളിയാഴ്ച വ്യാപാരം അവസാനിച്ചത്. നിലവിലെ സാഹചര്യത്തിൽ ദുർബലമായ യുഎസ് സാമ്പത്തിക സൂചകങ്ങൾ സ്വർണ വില ഉയർത്തുമെന്നും അന്താരാഷ്ട്ര വിപണിയിൽ സ്‌പോട്ട് ​ഗോൾഡ് ഔൺസിന് 1,980 ഡോളറിലും ഉയരുമെന്നും വിദ​ഗ്ധർ അഭിപ്രായപ്പെടുന്നു.

മറ്റു ന​ഗരങ്ങളിലെ സ്വർണ വില

ചെന്നൈയില്‍ 22 കാരറ്റ് സ്വര്‍ണത്തിന് പവന് 160 രൂപയാണ് വര്‍ധിച്ചത്. 44,400 രൂപ നല്‍കണം. ഡല്‍ഹിയില്‍ പവന് 120 രൂപ വര്‍ധിച്ച് 44,280 രൂപയിലെത്തി. മുംബൈ, കൊല്‍ക്കത്ത, ബംഗളൂരു, ഹൈദരാബാദ്, പൂനെ നഗരങ്ങളിലും 120 രൂപ വര്‍ധിച്ച് 44,160 രൂപയിലാണ് സ്വര്‍ണ വില. വഡോദര, അഹമ്മദാബാദ് എന്നിവിടങ്ങളിൽ 120 രൂപ വർധിച്ച് 44,200 രൂപയാണ് സ്വർണ വില.