വീണ്ടും ഇടിവ്; മാസത്തിലെ താഴ്ന്ന നിലവാരത്തിലെത്തി സ്വര്‍ണം; വാങ്ങാന്‍ പറ്റിയ അവസരമോ?

തുടര്‍ച്ചയായ രണ്ടാം ദിവസവും വില ഇടിവ് രേഖപ്പെടുത്തിയതോടെ മാസത്തിലെ താഴ്ന്ന നിലവാരത്തിലേക്ക് വീണ് സ്വര്‍ണ വില. ബുധനാഴ്ച 320 രൂപ കുറഞ്ഞതോടെ കേരള വിപണിയില്‍ സ്വര്‍ണ വില പവന് 45,960 രൂപയിലേക്ക് എത്തി. ഗ്രാമിന് 40 രൂപ കുറഞ്ഞ് 5,745 രൂപയിലാണ് ബുധനാഴ്ചയിലെ വ്യാപാരം. ചരിത്രത്തിലെ ഉയര്‍ന്ന നിലവാരത്തിലെത്തിയ ശേഷമാണ് തുടര്‍ച്ചയായ രണ്ടാം ദിവസം സ്വര്‍ണ വില ഇടിയുന്നത്.

ഈ ആഴ്ച കനത്ത ചാഞ്ചാട്ടമാണ് സ്വര്‍ണ വിലയിലുണ്ടായത്. തിങ്കളാഴ്ച 320 രൂപ വര്‍ധിച്ച് 47,080 രൂപയിലേക്ക് കുതിച്ച സ്വര്‍ണം ചരിത്രത്തിലെ പുതിയ ഉയരം കുറിച്ചു. ആദ്യമായാണ് കേരള വിപണിയില്‍ സ്വര്‍ണ വില 47,000 രൂപ നിലവാരത്തിന് മുകളിലെത്തുന്നത്. ഇവിടെ നിന്ന് ചൊവ്വാഴ്ച 800 രൂപയാണ് സ്വര്‍ണ വിലയില്‍ കുറഞ്ഞത്.

46,280 രൂപയായിരുന്നു ഇന്നലെ പവന് രേഖപ്പെടുത്തിയ വില. ഈ വിലയില്‍ നിന്നാണ് ഇന്നത്തെ 320 രൂപയുടെ കുറവ്. രണ്ട് ദിവസത്തിനിടെ 1120രൂപയാണ്‌സ്വര്‍ണ വിലയില്‍ കുറഞ്ഞത്. ഡിസംബറില്‍ കൂടിയതിനേക്കാള്‍ വലിയ ഇടിവുണ്ടായി. ആഗോള വിപണിയിലുണ്ടാകുന്ന ചാഞ്ചാട്ടമാണ് കേരള വിപണിയിലും പ്രതിഫലിക്കുന്നത്.

ആ​ഗോള വിപണിയിൽ

തിങ്കളാഴ്ച 2,135.40 ഡോളർ എന്ന സർവകാല ഉയരത്തിലായിരുന്നു സ്വർണം. ബുധനാഴ്ച രാവിലെയുള്ള വില നിലവാരം നോക്കിയാൽ സ്പോട്ട് ​ഗോൾഡ് 0.20 ശതമാനം നേട്ടത്തോടെ ഔൺസിന് 2,023.28 ഡോളറിലാണ് സ്വർണം വ്യാപാരം നടക്കുന്നത്.

തിങ്കളാഴ്ചയിലെ നിലവാരത്തിൽ നിന്ന് 100 ഡോളറിലേറെയാണ് രണ്ട് ദിവസം കൊണ്ട് കുറഞ്ഞത്. സെൻട്രൽ ബാങ്കിന്റെ പലിശ നിരക്ക് പാതയിൽ കൂടുതൽ വ്യക്തത ലഭിക്കുന്ന യു‌എസ് തൊഴിൽ ഡാറ്റ ഈ വെള്ളിയാഴ്ച പുറത്തു വരും. ഇതിന് മുന്നോടിയായി സ്വർണ വില സ്ഥിരത പുലർത്തുന്ന കാഴ്ചയാണ് ബുധനാഴ്ച കാണുന്നത്.

ഇടിവ് തുടരുമോ?

പലിശ നിരക്ക് സംബന്ധിച്ച് കഴിഞ്ഞയാഴ്ച ഫെഡ് ചെയർ ജെറോം പവൽ നടത്തിയ അഭിപ്രായ പ്രകടനത്തെ തുടർന്നാണ് സ്വർണം തിങ്കളാഴ്ച റെക്കോർഡ് ഉയർന്ന നിരക്കായ 2,135.40 ഡോളറിലേക്ക് ഉയർന്നത്. നിരക്ക് കുറയ്ക്കുന്നതിനുള്ള സാധ്യതയാണ് അദ്ദേഹത്തിന്റെ പ്രസം​ഗത്തിന്റെ കാതൽ. പണനയം ലഘൂകരിക്കുന്നതിന്റെ സമയത്തെക്കുറിച്ചുള്ള അനിശ്ചിതത്വം കാരണമാണ് ഒറ്റ ദിവസം കൊണ്ട് സ്വർണം 100 ഡോളറിലധികം ഇടിഞ്ഞത്.

നിക്ഷേപകർ വെള്ളിയാഴ്ച യുഎസ് നോൺ-ഫാം പേറോൾ ഡാറ്റയ്ക്കായി കാത്തിരിക്കുകയാണ്, ഇത് പലിശ നിരക്കിന്റെ ​ഗതി സംബന്ധിച്ച് കൂടുതൽ വീക്ഷണം നൽകാൻ സഹായിക്കും. ഡാറ്റ അനുകൂലമാണെങ്കിൽ സ്വർണ വില വീണ്ടും ഉയരാനാണ് സാധ്യത. അതോടൊപ്പം മധ്യേഷ്യയിൽ യുദ്ധം കടുക്കുന്നത് സ്വർണത്തെ സുരക്ഷിത സ്വഭാവമുള്ള നിക്ഷേപമാക്കി മാറ്റും. സാഹചര്യങ്ങൾ അനുകൂലമായതിനാൽ സ്വർണം മുന്നേറ്റത്തിനുള്ള സാധ്യതയാണ് വിദ​ഗ്ധർ ചൂണ്ടിക്കാട്ടുന്നത്.