ആ​ഗോള വിപണിയിൽ കളി മാറി;പക്ഷേ മലയാളിക്ക് ആശ്വസിക്കാൻ വകയുണ്ട്; സ്വര്‍ണ വില വീണ്ടും താഴേക്ക്

ആ​ഗോള വിപണിയിൽ സാഹചര്യം മാറിയതോടെ സ്വര്‍ണ വില കേരള വിപണിയില്‍ ബുധനാഴ്ചയും ഇടിവ് രേഖപ്പെടുത്തി. പവന് 280 രൂപ കുറഞ്ഞതോടെ സ്വര്‍ണം വില 46,160 രൂപയിലെത്തി. ഗ്രാമിന് 35 രൂപ കുറഞ്ഞ് 5,770 രൂപയിലാണ് സ്വര്‍ണം വ്യാപാരം നടക്കുന്നത്. ആദ്യ ദിവസത്തെ വില വര്‍ധനവിന് ശേഷം സ്വര്‍ണ വില കേരള വിപണിയില്‍ ഇടിയുകയാണ്.

ഇന്നത്തെ വില ഇടിവോടെ മാസത്തിലെ താഴ്ന്ന നിലവാരവുമായി 80 രൂപ വ്യത്യാസമാണ് സ്വര്‍ണ വിലയിലുള്ളത്. ജനുവരി 15 ന് തിങ്കളാഴ്ച 120 രൂപ വര്‍ധിച്ചാണ് സ്വര്‍ണ വില 46,520 രൂപയിലേക്ക് എത്തിയത്. ചൊവ്വാഴ്ച 80 രൂപ ഇടിഞ്ഞ് 46,440 രൂപയിലേക്ക് സ്വര്‍ണ വില എത്തി. ഇവിടെ നിന്നാണ് ബുധനാഴ്ച 120 രൂപ വീണ്ടും ഇടിഞ്ഞത്.

ആ​ഗോള വിപണിയിൽ ഇടിവ്

ആ​ഗോള വിപണിയിൽ സാഹചര്യങ്ങളിൽ പൊടുന്നനെയുണ്ടായ മാറ്റത്തിൽ സ്വർണം വലിയ ഇടിവാണ് നേരിട്ടത്. ചൊവ്വാഴ്ച 2,050 ഡോളർ നിലവാരത്തിൽ വ്യാപാരം നടത്തികൊണ്ടിരുന്ന സ്വർണം ഇടിഞ്ഞ് 2,028.52 ഡോളർ നിലവാരത്തിലാണ് ക്ലോസ് ചെയ്തത്. പലിശ നിരക്ക് സംബന്ധിച്ച് ഫെഡറൽ ഗവർണർ ക്രിസ്റ്റഫർ വാലറുടെ പ്രസ്താവനയാണ് ബുധനാഴ്ച സ്വർണ വിലയെ ഇടിച്ചത്.

പണപ്പെരുപ്പം ഫെഡറൽ റിസർവിന്റെ 2 ശതമാനം എന്ന ലക്ഷ്യത്തിൽ നിന്ന് അകലെയാണെന്നും കുറഞ്ഞ പണപ്പെരുപ്പം നിലനിൽക്കുമെന്ന് വ്യക്തമാകുന്നതുവരെ സെൻട്രൽ ബാങ്ക് പലിശ നിരക്ക് കുറയ്ക്കുന്നതിന് തിരക്കുകൂട്ടരുതെന്നുമായിരുന്നു അദ്ദേഹത്തിന്റെ പ്രസ്താവന.

ഇതോടെ ആരോ​ഗ്യം വീണ്ടെടുത്ത ഡോളർ 103 നിലവാരത്തിലേക്ക് തിരികെ കയറി. ഡോളർ സൂചിക 0.06 ശതമാനം നേട്ടത്തിൽ 103.42 നിലവാരത്തിലാണ് വ്യാപാരം നടക്കുന്നത്. യുഎസ് ട്രഷറി ബോണ്ട് യീൽഡ് 4.07 ശതമാനമായി. ഒരു മാസത്തിനിടയിലെ ഏറ്റവും ഉയർന്ന നിലവാരമാണിത്. ഇതോടെ സ്വർണ വില നഷ്ടത്തിലാണ് വ്യാപാരം തുടങ്ങിയത്. സ്പോട്ട്​ ​ഗോൾഡ് 0.22 ശതമാനം ഇടിവിൽ 2,023.96 ഡോളറിലാണ് നിലവിൽ വ്യാപാരം നടക്കുന്നത്.

ഇടിവോ കയറ്റമോ?

ജനുവരിയിലെ ഇടിവിന്റെ ആദ്യ വാരത്തിന് ശേഷം വില വർധനവിന്റെ കാഴ്ചയാണ് രണ്ടാമത്തെ ആഴ്ചയിൽ കണ്ടത്. 2024 ലെ ആദ്യ ദിവസം 46,840 രൂപയിൽ മാറ്റമില്ലാതെ തുടരുകയായിരുന്നു സ്വർണ വില. ജനുവരി രണ്ടിന് 160 രൂപ വര്‍ധിച്ച് 47,000 രൂപയിലേക്ക് സ്വർണ വില എത്തിയിരുന്നു. ഇതാണ് മാസത്തിലെ ഉയര്‍ന്ന നിലവാരം.

ജനുവരി മൂന്നിന് 200 രൂപ കുറഞ്ഞതിന് ശേഷം താഴേക്കായിരുന്നു സ്വര്‍ണ വിലയുടെ പോക്ക്. നാലാം തീയതി 320 രൂപ കുറഞ്ഞ് 46,480 രൂപയിലേക്ക് സ്വര്‍ണ വില പോയി. അഞ്ചാം തീയതി 80 രൂപ കുറഞ്ഞ് 46,400 രൂപയായിരുന്നു സ്വര്‍ണ വില. തൊട്ടടുത്ത രണ്ട് ദിവസങ്ങളിലും ഇതേ നിലവാരത്തിലായിരുന്നു സ്വര്‍ണ വില.

ജനുവരി എട്ടിന് തിങ്കളാഴ്ച 160 രൂപ കുറഞ്ഞാണ് സ്വര്‍ണ വില 46,240 രൂപയിലേക്ക് വീണത്. ചൊവ്വാഴ്ച 80 രൂപ കുറഞ്ഞ് 46,160 രൂപയിലേക്ക് സ്വര്‍ണം വില എത്തി. ബുധനാഴ്ച സ്വര്‍ണ വില മാറ്റമില്ലാതെ തുടര്‍ന്ന ശേഷം വ്യാഴാഴ്ച വീണ്ടും 80 രൂപയാണ് സ്വര്‍ണ വിലയില്‍ കുറഞ്ഞത്.

ഇവിടെ നിന്നാണ് വെള്ളിയാഴ്ച 80 രൂപ വർധിച്ച് സ്വർണ വില 46,160 രൂപയിലേക്ക് തിരികെ എത്തിയയത്. ശനിയാഴ്ച 240 രൂപ വർധിച്ചതോടെ 46,400 രൂപയായി സ്വർണ വില.