പൊന്നു പോലൊരു വർഷം; പുതുവർഷത്തിൽ സ്വർണം പൊള്ളും; വില ഉയരാൻ തന്നെ സാധ്യത

ഡിസംബറിലെ തണുപ്പിനെ പോലും ചൂട് പിടിപ്പിക്കുന്ന വിലകയറ്റത്തിലേക്ക് കുതിക്കുയാണ് കേരളത്തിലെ സ്വര്‍ണ വില. ആഗോള വിപണിയിലെ കുതിപ്പും ഡോളറിനെതിരെ രൂപ ഇടിവ് തുടരുന്നതും ആഭ്യന്തര വിപണിയില്‍ സ്വര്‍ണ വില ഉയര്‍ത്തി. വ്യാഴാഴ്ച സ്വര്‍ണ വില സര്‍വകാല ഉയരത്തിലെത്തിയിരുന്നു.

47,120 രൂപയായിരുന്നു ഇന്നലെ കേരള വിപണിയില്‍ ഒരു പവന് രേഖപ്പെടുത്തിയ വില. വര്‍ഷാവസാനത്തില്‍ വിലയിൽ നേരിയ കുറവ് കാണാം. ഇന്ന് 46,840 രൂപയിലേക്കാണ് സ്വര്‍ണ വിലയെത്തിയത്. വെള്ളിയാഴ്ച പവന് 280 രൂപ കുറഞ്ഞാണ് സ്വര്‍ണ വില 46,840 രൂപയിലേക്ക് എത്തിയത്. ഗ്രാമിന് 35 രൂപ കുറഞ്ഞ് 5,855 രൂപയിലാണ് സ്വര്‍ണം വ്യാപാരം നടക്കുന്നത്.

ഡിസംബര്‍ 18 ന് ആരംഭിച്ച സ്വര്‍ണ വില വര്‍ധനവിന് ഡിസംബര്‍ 29 നാണ് ഇടിവ് വന്നത്. 10 ദിവസത്തെ തുടര്‍ച്ചയായ വില വര്‍ധനവിന് ശേഷം 47,120 രൂപ എന്ന സര്‍വകാല ഉയരത്തിലെത്തിയതിന് ശേഷമാണ് സ്വര്‍ണ വില തണുത്തത്.

ഡിസംബര്‍ മാസത്തില്‍ രണ്ടാം തവണയാണ് സ്വര്‍ണ വില സര്‍വകാല ഉയരം കുറിക്കുന്നത്. ഡിസംബര്‍ നാലിന് സ്വര്‍ണ വില 47,080 രൂപയിലേക്ക് എത്തി സര്‍വകാല റെക്കോര്‍ഡ് കുറിച്ചിരുന്നു. ഇതിന് ശേഷം വര്‍ഷാവസാനത്തില്‍ വീണ്ടും വര്‍ധനവ് രേഖപ്പെടുത്തിയത്. ഡിസംബർ 13 ന് രേഖപ്പെടുത്തിയ 45,320 രൂപയാണ് മാസത്തിലെ താഴ്ന്ന നിരക്ക്.

ആ​ഗോള വിപണിയിൽ സ്വർണ വില

പലിശ നിരക്ക് കുറയുമെന്ന സൂചനകൾക്കിടയിൽ സ്പോട്ട് ഗോൾഡ് 0.2 ശതമാനം ഉയർന്ന് ഔൺസിന് 2,069.10 ഡോളറിലെത്തി. ആ​ഗോള വിപണിയിലെ അവസാന വ്യാപാര ദിനത്തിലെ കണക്ക് പ്രകാരം വർഷത്തിൽ ഇതുവരെ 14 ശതമാനമാണ് സ്വർണത്തിന്റെ മുന്നേറ്റം. 2020 ന് ശേഷമുള്ള ഏറ്റവും വലിയ വാർഷിക നേട്ടത്തിലേക്ക് സ്വർണം വ്യാപാരം ചെയ്യുന്നത്.

അടുത്ത വർഷത്തിന്റെ തുടക്കത്തിൽ യുഎസ് പലിശനിരക്ക് വെട്ടിക്കുറയ്ക്കാനുള്ള സാധ്യതയും ഉക്രെയ്ൻ യുദ്ധവും മിഡിൽ ഈസ്റ്റിലെ സംഘർഷാവസ്ഥയുമാണ് സുരക്ഷിത നിക്ഷേപമായ സ്വർണത്തിന്റെ ഡിമാന്റ് വർധിപ്പിച്ചത്. മൂന്ന് വർഷത്തിനിടയിലെ ഏറ്റവും മികച്ച നേട്ടമാണ് സ്വർണവിലയിലുള്ളത്.

സ്വർണ വില ഉയരുന്നു

കുറഞ്ഞ പണപ്പെരുപ്പം 2024 ൽ യുഎസ്. ഫെഡറൽ റിസർവ് പലിശ നിരക്ക് കുറയ്ക്കുന്നതിനുള്ള സാധ്യത ഉയർത്തുകയാണ്. ഇതിന് ഡോളറിനെയും യുഎസ് ബോണ്ട് യീൽഡിനെയും താഴേക്ക് എത്തിക്കുകയാണ്. ഡോളർ സൂചിക വെള്ളിയാഴ്ച 0.1 ശതമാനം ഇടിഞ്ഞു.

മൂന്ന് വർഷത്തിനിടയിലെ ഏറ്റവും മോശം വാർഷിക പ്രകടനത്തിലേക്കാണ് ഡോളർ പോകുന്നത്. 10 വർഷ ട്രഷറി ബോണ്ട് യീൽഡ് ജൂലായ് മുതലുള്ള ഏറ്റവും താഴ്ന്ന നിലയായ 3.83 ശതമാനത്തിലേക്ക് എത്തി. സ്വർണ വില മുന്നേറ്റത്തിന് അനുകൂലമായ സാഹചര്യമാണ് ഇത്.

ഡിമാന്റ് ഉയരുന്നു

വ്യാഴാഴ്ചത്തെ കണക്ക് പ്രകാരം ഹോങ്കോംഗ് വഴിയുള്ള ചൈനയുടെ ​​സ്വർണ ഇറക്കുമതി ഉയരുകയാണ്. നവംബറിൽ മുൻ മാസത്തേക്കാൾ 37 ശതമാനം വർധിച്ചു, പുതുവർഷ ആവശ്യകത നിറവേറ്റുന്നതിനായി സ്വർണത്തിന്റെ ഇറക്കുമതി നിയന്ത്രണങ്ങൾ ലഘൂകരിച്ചതിനാലാണ് ഈ വർധനവ്. അതിനിടയിൽ, ഇസ്രായേൽ-ഹമാസ് യുദ്ധം ശക്തമാകുന്നതും സ്വർണ വില മുന്നോട്ട് നേട്ടമാകും.