സ്വര്‍ണ വില താഴേക്ക്; ഇനി ഇടിവില്‍ വാങ്ങുക തന്നെ ബുദ്ധി; ഇന്നത്തെ സ്വർണ വില അറിയാം

പുതുവർഷത്തിലും മാറ്റമില്ലാത്തത് സ്വർണ വിലയിലാണ്. 2023 ലെ സമാന നിലവാരങ്ങളിൽ തന്നെയാണ് പുതുവർഷത്തിലും സ്വർണം വ്യാപാരം നടക്കുന്നത്. ആദ്യ ദിവസം മാറ്റമില്ലാതെ തുടർന്ന ശേഷം 160 രൂപ വർധനവോടെ ചൊവ്വാഴ്ച 47,000 നിലവാരത്തിലേക്ക് തിരിച്ചെത്തിയ സ്വർണം ബുധനാഴ്ച താഴേക്കാണ്. കേരള വിപണിയിൽ 200 രൂപ കുറഞ്ഞ് 46,800 രൂപയിലാണ് സ്വർണം വ്യാപാരം നടക്കുന്നത്. ​ഗ്രാമിന് 25 രൂപ കുറഞ്ഞ് 5,850 രൂപയിലാണ് ഇന്നത്തെ വ്യാപാരം. ഒരാഴ്ചയ്ക്കിടയിലെ കുറഞ്ഞ വിലയാണിത്.

വില ഉയരാൻ സാധ്യത; ഇടിവിൽ വാങ്ങാം

2023 ൽ 6,760 രൂപയുടെ വലിയ വർധനവാണ് സ്വർണ വിലയിലുണ്ടായത്. 40,360 രൂപയില്‍ നിന്ന് 47,120 രൂപയിലേക്ക് വില വർധിച്ചു. ഭൗമരാഷ്ട്ര പിരിമുറുക്കങ്ങളും അനുകൂലമായ സാമ്പത്തിക നയങ്ങളുടെയും പശ്ചാത്തലത്തിലാണ് സ്വര്‍ണ വില മുന്നേറിയത്.

ജനുവരി രണ്ടാം തീയതിയാണ് വര്‍ഷത്തിലെ താഴ്ന്ന നിലവാരമായ 40,360 രൂപ രേഖപ്പെടുത്തിയത്. ഡിസംബര്‍ 28 ന് രേഖപ്പെടുത്തിയ 47,120 രൂപയാണ് ഈ വര്‍ഷത്തെയും ഇതുവരെ രേഖപ്പെടുത്തയതുമായ ഉയര്‍ന്ന നിലവാരം. പലിശ നിരക്ക് കുറയാനുള്ള സാഹചര്യം മുന്നിലുള്ളതിനാൽ സ്വർണ വില മുന്നേറാനാണ് സാധ്യത.

സ്വർണ വില ഉയരാൻ സാധ്യതയുള്ളതിനാൽ നിക്ഷേപകർക്ക് 'ബൈ ഓൺ ഡിപ്സ്' തന്ത്രം സ്വീകരിക്കാമെന്നാണ് വിദ​ഗ്ധരുടെ നി​ഗമനം. യുഎസ് ഡോളർ ശക്തമാകുന്നത് സ്വർണ വിലയിലെ നേട്ടങ്ങളെ നിയന്ത്രിക്കും. ഭൗമരാഷ്ട്രീയ തടസങ്ങളും സ്വർണത്തെ സ്വാധീനിക്കും. ഉയർന്ന വില കാരണം പ്രധാന വിപണിയായ ഇന്ത്യയിലെ ഭൗതിക സ്വർണ ഡിമാൻഡ് ദുർബലമായി തുടരുകയാണ്. ഈ സാഹചര്യത്തിൽ ഇടിവുകളാണ് ഉപയോ​ഗപ്പെടുത്തേണ്ടത്.

ആ​ഗോള വിപണിയിൽ

പലിശ നിരക്ക് സംബന്ധിച്ച് കൂടുതൽ വ്യക്തത നൽകുന്ന ഡിസംബറിലെ ഫെഡറൽ റിസർവ് പോളിസി മീറ്റിം​ഗ് മിനിറ്റ്സിനായി നിക്ഷേപകർ കാത്തിരിക്കുന്നതിനാൽ ബുധനാഴ്ച സ്വർണ വില സ്ഥിരമായി തുടരുകയാണ്. 0.28 ശതമാനം നേട്ടത്തിൽ 2,064.85ഡോളറിലാണ് സ്പോട്ട് ​ഗോൾഡ് ഔൺസിന്റെ വില.

യുഎസ് സെൻട്രൽ ബാങ്കിന്റെ ഡിസംബറിലെ പോളിസി മീറ്റിംഗിന്റെ മിനിറ്റ്സ് ഇന്ന് പുറത്തു വരും. അതേസമയം മുൻ സെഷനുകളെ അപേക്ഷിച്ച് ഡോളർ സൂചിക നേട്ടമുണ്ടാക്കി. 102.08 നിലവാരത്തിലേക്ക് എത്തിയ ഡോളർ ഒരാഴ്‌ചത്തെ ഏറ്റവും ഉയർന്ന നിലവാരത്തിന് അടുത്താണ്. ഇത് ട്രഷറി യീൽഡിലും മുന്നേറ്റമുണ്ടാക്കി.

2020 ന് ശേഷമുള്ള ഏറ്റവും വലിയ വാർഷിക നേട്ടമാണ് സ്വർണം 2023 ൽ രേഖപ്പെടുത്തിയത്. അടുത്ത വർഷത്തിന്റെ തുടക്കത്തിൽ യുഎസ് പലിശനിരക്ക് വെട്ടിക്കുറയ്ക്കാനുള്ള സാധ്യതയും ഉക്രെയ്ൻ യുദ്ധവും മിഡിൽ ഈസ്റ്റിലെ സംഘർഷാവസ്ഥയുമാണ് സുരക്ഷിത നിക്ഷേപമായ സ്വർണത്തിന്റെ ഡിമാന്റ് വർധിപ്പിച്ചത്. ഈ സാധ്യതകൾ നിലനിൽക്കുന്നതിനാൽ സ്വർണ വില ഉയരാൻ തന്നെയാണ് സാധ്യത.