സ്വര്‍ണ വില താഴോട്ട്; ഇന്ന് കുറഞ്ഞത് പവന് 320 രൂപ; ഈ ആഴ്ച കുറഞ്ഞത് 800 രൂപ

ആ​ഗോള വിപണിയിലെ പലിശ നിരക്കുമായി ബന്ധപ്പെട്ട ചലനങ്ങൾ തുടർച്ചയായ നാലാം ദിവസവും സ്വർണ വിലയിൽ ഇടിവുണ്ടാക്കി. സ്വർണം വാങ്ങാൻ ആ​ഗ്രഹിക്കുന്നവർക്ക് ആശ്വാസം പകരുന്നതാണ് വെള്ളിയാഴ്ചത്തെ കേരള വിപണിയിലെ സ്വര്‍ണ വില. പവന് 320 രൂപ കുറഞ്ഞ് 43,280 രൂപയിലേക്ക് സ്വര്‍ണ വിലയെത്തി.

ഗ്രാമിന് 40 രൂപ കുറഞ്ഞ് 5410 രൂപയിലാണ് കേരള വിപണിയിലെ വില. ജൂണ്‍ മാസത്തിലെ ഏറ്റവും കുറഞ്ഞ നിരക്ക് കൂടിയാണിത്. ജൂണ്‍ രണ്ടിന് രേഖപ്പെടുത്തിയ 44,800 രൂപയാണ് ഈ മാസത്തെ ഏറ്റവും ഉയര്‍ന്ന വില. ഈ നിലവാരത്തില്‍ നിന്ന് 1,520 രൂപ ഇടിവിലാണ് ഇന്നത്തെ വില.

ഈ വാരം വില ഇടിവ്

ജൂൺ 19ന് ആരംഭിച്ച ഈ ആഴ്ച സ്വര്‍ണ വില കുത്തനെ താഴേക്കായിരുന്നു. തിങ്കളാഴ്ച മാറ്റമില്ലാതെ തുടര്‍ന്ന സ്വര്‍ണ വില പവന് 44,080 രൂപയിലായിരുന്നു. 80 രൂപ കുറഞ്ഞ് 44,000 രൂപയിലേക്ക് ചൊവ്വാഴ്ചത്തെ വിലയെത്തി. ബുധനാാഴ്ച 43,760 രൂപയായിരുന്നു പവന്റെ വില. വ്യാഴാഴ്ച പവന് 160 രൂപ കുറഞ്ഞ് 43,600 രൂപയിലെത്തി. ഈ ആഴ്ച 800 രൂപയാണ് ആകെ സ്വര്‍ണ വിലയിലുണ്ടായ കുറവ്.

മാര്‍ച്ച് മാസത്തിലെ നിലവാരത്തില്‍

വെള്ളിയാഴച രേഖപ്പെടുത്തിയ 43,280 രൂപ മാര്‍ച്ച് 18 ന് ശേഷമുള്ള കുറഞ്ഞ നിരക്കാണ്. 2023 ആരംഭിച്ച ശേഷം മാര്‍ച്ച് മാസത്തിലാണ് സ്വര്‍ണ വില ഈ നിലവാരത്തിലെത്തിയത്. തുടര്‍ന്ന് മാര്‍ച്ച് മാസത്തില്‍ 44,420 രൂപ എന്ന ഉയര്‍ന്ന നിലവാരത്തിലേക്ക് സ്വര്‍ണ വില എത്തി.

ഏപ്രില്‍ മാസത്തില്‍ 45,320 രൂപ വരെ സ്വര്‍ണ വില ഉയര്‍ന്നിരുന്നെങ്കിലും ഏപ്രില്‍ മൂന്നിന് 43,760 രൂപ എന്ന താഴ്ന്ന നിരക്കിലേക്കും സ്വര്‍ണ വില എത്തിയിരുന്നു. മേയ് മാസത്തില്‍ 45,760 രൂപ എന്ന സര്‍വ കാല റെക്കോര്‍ഡിലായിരുന്നു സ്വര്‍ണ വില. ഈ നിലയില്‍ നിന്ന് 2,480 രൂപയാണ് സ്വര്‍ണ വിലയില്‍ കുറവ് വന്നത്. 

സ്വർണ വില ഇടിയാൻ കാരണം

സ്വർണ വില നിലവിൽ മൂന്ന് മാസത്തെ ഏറ്റവും താഴ്ന്ന നിരക്കിലാണ് വ്യാപാരം നടക്കുന്നത്. ആ​ഗോള വിപണിയിൽ ഔൺസിന് 1,913 ഡോളറാണ് ഇന്നത്തെ വില. ഇടിവിനുള്ള പ്രധാന കാരണം ലോക രാജ്യങ്ങളിൽ നിന്നുള്ള പലിശ നിരക്കിന്റെ വാർത്തകളാണ്. ഈ വർഷം 50 അടിസ്ഥാന നിരക്ക് പലിശ നിരക്ക് വർധിപ്പിക്കുമെന്ന ഫെഡറൽ റിസർവ് ചെയർ ജെറോം പവലിന്റെ സൂചനയാണ് ഈ വാരത്തിൽ സ്വർണ വിലയിലെ സമ്മർദത്തിലാക്കിയത്.

പലിശ നിരക്ക് ഉയരുമെമ്പോൾ ഡോളർ ശക്തി നേടുന്നതിനാൽ ഇത് സ്വർണ വിലയിൽ പ്രതികൂലമായാണ് ബാധിക്കുന്നത്. അതോടൊപ്പം, അപ്രതീക്ഷിതമായി ബാങ്ക് ഓഫ് ഇംഗ്ലണ്ട് പലിശ നിരക്കിൽ 50 അടിസ്ഥാന നിരക്ക് വർധനവ് നടത്തിയതും സ്വർണ വിലയെ താഴോട്ടിടിപ്പിച്ചു. കൂടാതെ, സ്വിറ്റ്‌സർലൻഡ്, നോർവേ, തുർക്കി തുടങ്ങിയ രാജ്യങ്ങളിൽ നിന്നുള്ള നിരക്ക് വർധന സ്വർണ വിലയെ കൂടുതൽ ബാധിച്ചു എന്നാണ് വിപണിയിൽ നിന്നുള്ള വിലയിരുത്തൽ.

ഇന്ത്യൻ ബുള്ളിയൻ ആൻഡ് ജ്വല്ലേഴ്‌സ് അസോസിയേഷൻ (ഐബിജെഎ) അനുസരിച്ച് ഇന്ത്യയിൽ 24 കാരറ്റ് 10 ഗ്രാമം സ്വർണത്തിന് 58,654 രൂപയും 22 കാരറ്റ് 10 ​ഗ്രാം സ്വർണത്തിന് 53,727 രൂപയുമാണ് വില.