സ്വർണ വില താഴ്ന്ന നിലവാരത്തിൽ; വിവാഹ ആവശ്യത്തിന് സ്വർണം വാങ്ങണമോ? വില ഇടിയുമ്പോൾ ഏത് തന്ത്രം പ്രയോ​ഗിക്കണം

ആഭരണം വാങ്ങാൻ ആ​ഗ്രഹിക്കുന്നവർക്ക് ആശ്വാസമാകുന്ന വിലയിലേക്ക് പുതുവർഷത്തിൽ സ്വർണം നീങ്ങുന്നത്. പലിശ നിരക്ക് കുറയുന്നതിനുള്ള സാ​ഹചര്യമൊരുങ്ങുന്നതിനാൽ 2024 സ്വർണത്തെ സംബന്ധിച്ച് തിളക്കമുള്ള വർഷമാകുമെന്നായിരുന്നു വിശകലന വിദ​ഗ്ധരുടെ അനുമാനം. എന്നാൽ പലിശ നിരക്ക് കുറയ്ക്കുന്നത് സംബന്ധിച്ച് ഫെഡറൽ റിസർവിൽ നിന്നും പുറത്തു വന്ന അനിശ്ചിതത്വം നിറഞ്ഞ വാർത്തകളാണ് വർഷാരംഭത്തിൽ സ്വർണ വില ഇടിക്കുന്നത്.

ശനിയാഴ്ച കേരള വിപണിയിൽ സ്വർണ വിലയിൽ മാറ്റമില്ല. പവന് 46,400 രൂപയും ​ഗ്രാമിന് 5,800 രൂപയുമാണ് സ്വർണ വില. വെള്ളിയാഴ്ച യഥാക്രമം 80 രൂപയും 10 രൂപ നിരക്കിലുമാണ് കേരളത്തിൽ സ്വർണ വില ഇടിഞ്ഞത്. മാസത്തിലെ താഴ്ന്ന നിലവാരം രേഖപ്പെടുത്തിയ സ്വർണ വില രണ്ടാഴ്ചയ്ക്കിടയിലെ ഏറ്റവും താഴ്ന്ന നിലവാരത്തിലാണ്.

ഡിസംബർ 22 നാണ് നേരത്തെ ഈ നിലവാരത്തിൽ സ്വർണ വില എത്തിയത്. നിലവിലെ സ്വർണ വില കേരള വിപണിയിലെ സർവകാല ഉയരത്തിൽ നിന്നും 640 രൂപ താഴെയാണ്.

മൂന്ന് ദിവസം ഇടിഞ്ഞു

ആദ്യ ദിവസങ്ങളിൽ മുന്നേറ്റമുണ്ടായെങ്കിലും ഈ വാരം തുടർച്ചയായ മൂന്ന് ദിവസമാണ് സ്വർണ വില ഇടിഞ്ഞത്. 600 രൂപയാണ് മൂന്ന് ദിവസം കൊണ്ട് കുറവ് വന്നത്. ജനുവരി ഒന്നിന് മാറ്റമില്ലാതെ 46,840 രൂപയിലാണ് സ്വര്‍ണം വ്യാപാരം ആരംഭിച്ചത്. രണ്ടാം ദിവസം 160 രൂപ വര്‍ധിച്ച് 47,000 രൂപയിലേക്ക് എത്തിയിരുന്നു. ഇതാണ് മാസത്തിലെ ഉയർന്ന നിലവാരം.

ബുധനാഴ്ച മുതലാണ് സ്വര്‍ണ വില ഇടിയാന്‍ തുടങ്ങിയത്. 200 രൂപ കുറഞ്ഞ് 46,800 രൂപയിലേക്ക് എത്തിയ ശേഷമാണ് വ്യാഴാഴ്ച 320 രൂപ കുറഞ്ഞ് 46,480 രൂപയിലേക്ക് സ്വര്‍ണ വില എത്തുന്നത്. ഇവിടെ നിന്നാണ് 80 രൂപയുടെ ഇടിവ് വെള്ളിയാഴ്ച രേഖപ്പെടുത്തിയത്. മൂന്ന് ദിവസത്തിനിടെ ഗ്രാമിന് 75 രൂപയാണ് കുറഞ്ഞത്.

സ്വർണം വാങ്ങാൻ പ്ലാനെന്ത്?

വരാനിരിക്കുന്ന ആവശ്യങ്ങൾക്ക് സ്വർണം വാങ്ങാൻ പ്ലാനുണ്ടെങ്കിൽ വില കുറഞ്ഞിരിക്കുമ്പോൾ പരമാവധി പ്രയോജനപ്പെടുത്താൻ ശ്രമിക്കണം. 2024 വില വർധനവിന്റെ കാലമാണെന്ന വിദ​ഗ്ധരുടെ അഭിപ്രായം കണക്കിലെടുത്താൽ നിലവിൽ സ്വർണ വില ഒരടി പിന്നോട്ടേക്കാണ്. ഈ നിലവാരത്തിൽ സ്വർണം വാങ്ങിവെയ്ക്കാവുന്നതാണ്.

10 വർഷം കൊണ്ട് 120 ​ഗ്രാം (15 പവൻ) സ്വർണം സമാഹരിക്കാൻ ഭൗതിക സ്വർണ വാങ്ങിവെയ്ക്കാൻ ശ്രമിച്ചാൽ 120 മാസത്തിന്റെ സാവകാശം ലഭിക്കും. മാസത്തിൽ 1 ഗ്രാം സ്വർണം വാങ്ങിയാൽ ലക്ഷ്യത്തിലെത്താം.

അല്ലെങ്കിൽ 5-6 ഗ്രാം സ്വർണം അർധ വാർഷികമായോ വർഷത്തിൽ ഏകദേശം 12 ഗ്രാം സ്വർണമോ വാങ്ങണം. മാസത്തിൽ ഒരു ​ഗ്രാം എന്നത് സുഖകരമായി സ്വർണം സമാഹരിക്കാനുള്ള മാർ​ഗമാണ്. നിലവിലെ വില പ്രകാരം 6,000- 6,200 രൂപ നിലവാരത്തിൽ ഒരു ​ഗ്രാം സ്വർണം പണിക്കൂലി സഹിതം വാങ്ങാവുന്നതാണ്.