ആശ്വാസ വില അകലെ; സ്വര്‍ണത്തിന് വെള്ളിയാഴ്ചയും വില കൂടി; ഇന്നത്തെ നിരക്കറിയാം

സ്വര്‍ണം വാങ്ങാനിരിക്കുന്നവര്‍ക്ക് ആശ്വസിക്കാന്‍ വകയില്ല. സര്‍വകാല ഉയരത്തില്‍ നിന്ന് താഴെ ഇറങ്ങിയെങ്കിലും സാധാരണക്കാരന് പിടിച്ചാല്‍ കിട്ടാത്ത നിലവാരത്തിലാണ് സ്വര്‍ണ വിലയുള്ളത്. മോഹിപ്പിച്ച് 45,000 രൂപ നിലവാരത്തിലേക്ക് താഴ്ന്ന ശേഷം സ്വര്‍ണ വില കുതിക്കുകയാണ്. രണ്ടാം ദിവസത്തിലും കേരള വിപണിയില്‍ സ്വര്‍ണ വില ഉയര്‍ന്നു. വെള്ളിയാഴ്ച 120 രൂപ വര്‍ധിച്ചതോടെ പവന് 46,160 രൂപയിലേക്ക് സ്വര്‍ണ വില എത്തി. 15 രൂപ വര്‍ധിച്ച് 5,770 രൂപയാണ് ഒരു ഗ്രാം സ്വര്‍ണത്തിന്റെ വില.

ഈ വാരത്തില്‍ സ്വര്‍ണ വില ആരംഭിച്ചത് സര്‍വകാല ഉയരത്തിലാണ്. ഡിസംബര്‍ നാലിന് തിങ്കളാഴ്ച 320 രൂപ വര്‍ധിച്ച് 47,080 രൂപയിലേക്ക് സ്വര്‍ണ വില എത്തി. ഉയരത്തിലെത്തിയ ശേഷം രണ്ട് ദിവസങ്ങളിലായി സ്വര്‍ണ വില കുറയുകയായിരുന്നു. ചൊവ്വാഴ്ച 800 രൂപ കുറഞ്ഞ് 46,280 രൂപയിലേക്കും ബുധനാഴ്ച 320 രൂപ കുറഞ്ഞ് 46960 രൂപയിലേക്കും സ്വര്‍ണ വില വീണിരുന്നു.

ഇവിടെ നിന്നാണ് രണ്ട് ദിവസമായുള്ള വര്‍ധനവ്. ഇന്നലെ 80 രൂപയാണ് കേരള വിപണിയില്‍ സ്വര്‍ണത്തിന് വര്‍ധിച്ചത്. 46040 രൂപയായിരുന്നു വ്യാഴാഴ്ച കേരള വിപണിയിലെ സ്വര്‍ണ വില. വെള്ളിയാഴ്ച 120രൂപയാണ് വര്‍ധിച്ചത്.

ആ​ഗോള വിപണിയിൽ

സ്വർണ വില ആ​ഗോള വിപണിയിൽ മന്ദതയിലാണ്. ഈ വാരം ആദ്യ ദിവസം സർവകാല ഉയരത്തിലെത്തിയതിന് പിന്നാലെയുള്ള ഇടിവ് നാല് ആഴ്ചയ്ക്ക് ശേഷമുള്ള ആദ്യ പ്രതിവാര നഷ്ടത്തിലേക്ക് സ്വർണം കടക്കുന്നത്. യുഎസ് പലിശ നിരക്ക് കുറയ്ക്കുന്നതിനുള്ള സാധ്യതകൾ വ്യക്തമാക്കുന്ന തൊഴിൽഡാറ്റയ്ക്കായി വെള്ളിയാഴ്ച നിക്ഷേപകർ കാത്തിരിക്കുന്നതിനാൽ സ്വർണ വില നേരിയ നേട്ടമുണ്ടാക്കി. സ്‌പോട്ട് ഗോൾഡ് 0.2 ശതമാനം ഉയർന്ന് ഔൺസിന് 2,031.42 ഡോളർ എന്ന നിലയിലാണ്. സ്വർണം ഈ ആഴ്ചയിൽ ഇതുവരെ 1.8 ശതമാനം ഇടിഞ്ഞു. തിങ്കളാഴ്ച സ്വ‌ർണ വില എക്കാലത്തെയും ഉയർന്ന നിരക്കായ 2,135.40 ഡോളറിലെത്തിയിരുന്നു. ഇവിടെ നിന്നാണ് 100 ഡോളറോളം ഇടിഞ്ഞത്.

ഡോളർ സൂചിക തുടർച്ചയായ മൂന്ന് ആഴ്‌ചകളിലെ നഷ്ടത്തിന്റെ പാതയിലാണ്. 10 വർഷത്തെ ട്രഷറി നോട്ടുകളുടെ ആദായം ഈ ആഴ്ച കുറഞ്ഞു.