സേവിംഗ്‌സ് അക്കൗണ്ട് ഉടമകളുടെ ശ്രദ്ധയ്ക്ക്; ആദായ നികുതി റഡാറില്‍പെടാതെ പണമിടപാടുകള്‍ നടത്താം; പരിധികളറിയാം

ബാങ്കിം​ഗ് ഇടപാടുകൾ കാര്യക്ഷമമാക്കാൻ ഇന്നത്തെ കാലത്ത് സേവിം​ഗ്സ് അക്കൗണ്ടുകൾ പരമപ്രധാനമാണ്. കയ്യിലുള്ള പണം സൗകര്യപൂർണമായി കൈകാര്യം ചെയ്യുന്നതിന് പലരും ഒന്നിലധികം സേവിം​ഗ്സ് അക്കൗണ്ടുകൾ കൈകാര്യം ചെയ്യുന്നുണ്ട്. അക്കൗണ്ടെടുക്കുക എന്നത് സൗകര്യമായ കാര്യമായതോടെ സാലറി അക്കൗണ്ടിനൊപ്പം പ്രത്യേക ചെലവുകൾക്ക് വ്യത്യസ്ത അക്കൗണ്ടുകളെന്ന ശീലം ഇന്നത്തെ കാലത്തുണ്ട്. എന്നാൽ സേവിം​ഗ്സ് അക്കൗണ്ടുമായി ബന്ധപ്പെട്ട ആദായ നികുതി കാര്യങ്ങളെ പറ്റി പലരും കൃത്യമായ ധാരണയിലെന്നതാണ് സത്യം.

സേവിം​ഗ്സ് അക്കൗണ്ടുകൾ വഴി വലിയ തുകയുടെ സാമ്പത്തിക ഇടപാടുകൾ നടത്തുന്നവരാണെങ്കിൽ ആദായ നികുതി റഡാറിൽപെടാതെ എത്ര രൂപ പിൻവലിക്കൽ/ നിക്ഷേപിക്കാൻ സാധിക്കുമെന്ന് അറിയണം. പരിധി കഴിഞ്ഞുള്ള പിൻവലിക്കലാണെങ്കിൽ ആദായ നികുതി നിയമപ്രകാരം സ്രോതസിൽ നിന്നുള്ള നികുതി ഈടാക്കുന്നുണ്ട്. അതോടൊപ്പം സേവിം​ഗ്സ് അക്കൗണ്ടുകളിലെ പലിശ വരുമാനത്തിൽ നിന്ന് നികുതിദായകന് ഇളവ് തേടാം. ഇക്കാര്യങ്ങൾ വിശദമായി നോക്കാം.

സ്റ്റേറ്റ്മെന്റ് ഓഫ് ഫിനാൻഷ്യൽ റിപ്പോർട്ടിം​ഗ്

കള്ളപ്പണം തടയുന്നതിനും നികുതി വെട്ടിപ്പുകൾ പിടിക്കാനും സേവിം​ഗ്സ് അക്കൗണ്ടിൽ നിശ്ചിത പരിധി കഴിഞ്ഞുള്ള ഇടപാടുകൾ നടക്കുമ്പോൾ ബാങ്കുകൾ, കോർപ്പറേറ്റുകൾ, പോസ്റ്റ് ഓഫീസുകൾ, ബാങ്കിതര ധനകാര്യ സ്ഥാപനങ്ങൾ എന്നിവ സ്റ്റേറ്റ്‌മെന്റ് ഓഫ് ഫിനാൻഷ്യൽ റിപ്പോർട്ടിംഗ് (എസ്‌എഫ്‌ടി) തയ്യാറാക്കാൻ ആദായ നികുതി വകുപ്പ് നിർദ്ദേശിക്കുന്നുണ്ട്.

ക്യാഷ് ഡെപ്പോസിറ്റുകൾ, പിൻവലിക്കലുകൾ, ഓഹരി, കടപ്പത്രങ്ങൾ, മ്യൂച്വൽ ഫണ്ടുകൾ എന്നിവയിലെ നിക്ഷേപം, ക്രെഡിറ്റ് കാർഡ് ചെലവുകൾ, വിദേശ നാണയം വാങ്ങൽ, വസ്തു ഇടപാടുകൾ തുടങ്ങിയവയാണ് നിരീക്ഷണമുള്ള ഇടപാടുകൾ. സ്റ്റേറ്റ്മെന്റ് ഓഫ് ഫിനാൻഷ്യൽ റിപ്പോർട്ടിം​ഗ് വഴി അതാത് സ്ഥാപനങ്ങൾ ആദായ നികുതി വകുപ്പിനെ വിവരമറിയിക്കും.

സേവിം​ഗ്സ് അക്കൗണ്ട് നിക്ഷേപം

നിലവിലെ സാമ്പത്തിക വർഷം 2,000 രൂപ നോട്ടുകൾ പിൻവലിച്ചതും മറ്റു സാമ്പത്തിക ഇടപാടുകളുടെയും ഭാ​ഗമായി സേവിം​ഗ്സ് അക്കൗണ്ടുകളിൽ വലിയ തുക നിക്ഷേപിച്ചവരാണോ? എങ്കിൽ ഇതു സംബന്ധിച്ച ആദായ നികുതി നിയമം അറിയേണ്ടതുണ്ട്. നിയമപ്രകാരം ചില ഇടപാടുകള്‍ ധനകാര്യ സ്ഥാപനങ്ങള്‍ ആദായ നികുതി വകുപ്പിന് റിപ്പോര്‍ട്ട് ചെയ്യേണ്ടതായിട്ടുണ്ട്.

സാമ്പത്തിക വര്‍ഷത്തില്‍ സേവിം​ഗ്സ് അക്കൗണ്ടില്‍ 10 ലക്ഷത്തിന് മുകളില്‍ തുക നിക്ഷേപിക്കുന്ന വ്യക്തികളുടെ വിവരങ്ങള്‍ ബാങ്കുകള്‍ ആദായ നികുതി വകുപ്പിനെ അറിയിക്കും. ഒന്നോ ഒന്നിലധികമോ അക്കൗണ്ടുകളിൽ നിന്ന് സാമ്പത്തിക വർഷത്തിൽ 10 ലക്ഷം രൂപയോ അതിൽ കൂടുതലോ ഉള്ള ക്യാഷ് ഡെപ്പോസിറ്റുകളെ പരിധിയായി കാണക്കാക്കും. കറന്റ് അക്കൗണ്ട് ഉടമകള്‍ക്ക് 50 ലക്ഷമാണ് പരിധി.

പിൻവലിക്കുമ്പോൾ ടിഡിഎസ്

അതോടൊപ്പം പണം പിന്‍വലിക്കലിനും ചില നിയന്ത്രണങ്ങളുണ്ട്. സാമ്പത്തിക വര്‍ഷത്തില്‍ നിശ്ചിത പരിധി കവിഞ്ഞുള്ള പിന്‍വലിക്കലുകള്‍ക്ക് ആദായ നികുതി നിയമത്തിലെ സെക്ഷന്‍ 194എന്‍ പ്രകാരം സ്രോതസില്‍ നിന്നുള്ള നികുതി ഈടാക്കും. തുടര്‍ച്ചയായ മൂന്ന് വര്‍ഷം ആദായ നികുതി റിട്ടേണ്‍ സമര്‍പ്പിച്ച വ്യക്തിയാണെങ്കില്‍ സാമ്പത്തിക വര്‍ഷത്തില്‍ 1 കോടിയില്‍ കൂടുതല്‍ തുക പിന്‍വലിക്കുമ്പോള്‍ 2 ശതമാനം ടിഡിഎസ് ഈടാക്കും.

ആദായ നികുതി റിട്ടേണ്‍ സമര്‍പ്പിക്കാത്ത വ്യക്തിയാണെങ്കില്‍ സാമ്പത്തിക വര്‍ഷത്തില്‍ 20 ലക്ഷത്തിന് മുകളില്‍ തുക പിന്‍വലിക്കുമ്പോള്‍ 2 ശതമാനമാണ് ടിഡിഎസ് ഈടാക്കുന്നത്. ഇത്തരക്കാര്‍ 1 കോടിക്ക് മുകതളില്‍ പിന്‍വലിച്ചാല്‍ 5 ശതമാനം ടിഡിഎസ് ബാധകമാകും.

നികുതി ഇളവ്

വ്യക്തിഗത നികുതിദായകര്‍ക്ക് സേവിംഗ്‌സ് ബാങ്ക് അക്കൗണ്ടിലെ പലിശയ്ക്ക് നികുതി ഇളവ് ലഭിക്കും. ആദായ നികുതി നിയമത്തിലെ സെക്ഷന്‍ 80ടിടിഎ പ്രകാരം സേവിംഗ്‌സ് അക്കൗണ്ടിലെ 10,000 രൂപ വരെയുള്ള പലിശയ്ക്ക് നികുതിയിളവ് നേടാം. 60 വയസ് കഴിഞ്ഞവര്‍ക്ക് സെക്ഷന്‍ 80ടിടിബി പ്രകാരം 50,000 രൂപ വരെ നികുതിയിളവ് ലഭിക്കും.