ഇന്ന് സ്വർണ വിലയിൽ മാറ്റമില്ല; വിവാഹ സീസണിൽ സ്വർണത്തിന് വില കുറയുമോ? സാധ്യതകളിങ്ങനെ

ജൂൺ, ജൂലായ് മാസങ്ങളിലായി തുടരുന്ന ചാഞ്ചാട്ടം ഓ​ഗസ്റ്റിലും തുടർന്ന് സ്വർണ വില. ഓ​ഗസ്റ്റിൽ ആദ്യ ദിവസം വർധിച്ച സ്വർണ വില കുറഞ്ഞും കൂടിയും തൽസ്ഥിതി തുടരുകയുമാണ്. കേരള വിപണിയിലെ സ്വര്‍ണ വിലയില്‍ തിങ്കളാഴ്ച മാറ്റമില്ല. ശനിയാഴ്ച രേഖപ്പെടുത്തിയ 44,120 രൂപയാണ് തിങ്കളാഴ്ച കേരള വിപണിയില്‍ പവന്റെ വില. ഗ്രാമിന് 5,515 രൂപ നല്‍കണം. ഓഗസ്റ്റ് പിറന്നതിന് ശേഷം ചാഞ്ചാട്ടത്തിലാണ് സ്വര്‍ണ വില.

ആദ്യ ദിവസം വില ഉയര്‍ന്നെങ്കിലും തൊട്ടടുത്ത രണ്ട് ദിവസങ്ങളിലായി 360 രൂപ കുറഞ്ഞു. വീണ്ടും 160 രൂപ കൂടിയാത് ശനിയാഴ്ചയാണ് ഇതേ വിലയിലാണ് ഇന്നും സ്വര്‍ണം വ്യാപാരം നടക്കുന്നത്. ഓഗസ്റ്റ് ഒന്നിന് രേഖപ്പെടുത്തിയ 44,320 രൂപയാണ് ഈ മാസത്തിലെ ഉയര്‍ന്ന വില.

ഓഗസ്റ്റ് മൂന്ന്, നാല് തീയതികളിലായി 43,960 രൂപയാണ് സ്വര്‍ണ വിലയില്‍ രേഖപ്പെടുത്തിയത്. ഇതാണ് കുറഞ്ഞ വില. ആ​ഗോള വിപണിയിലെ സ്വർണ വില കേരളത്തിലെ വിലയെയും സ്വാധീനിക്കുന്നുണ്ട്. ആ​ഘോഷ സീസണുകൾ അടുക്കാനിരിക്കെ വില കുറയാനുള്ള സാധ്യത മുന്നിലുണ്ട്.

 

മറ്റു ന​ഗരങ്ങളിലെ സ്വർണ വില

മറ്റു ഇന്ത്യൻ ന​ഗരങ്ങളിലും സ്വർണ വിലയിൽ മാറ്റമില്ല. ചെന്നൈയിൽ പവന് 44,440 രൂപയാണ് വില. ഗ്രാമിന് 5,555 രൂപ നല്‍കണം. ഡല്‍ഹിയില്‍ പവന് 44,240 രൂപ മാത്രമാണ് നല്‍കേണ്ടത്. മുംബൈയില്‍ 44,120 രൂപയാണ് പവന്റെ വില. കൊല്‍ക്കത്ത, ബംഗളൂരു, ഹൈദരാബാദ്, പൂനെ എന്നിവിടങ്ങളിലും ഇതേ വിലയിലാണ് സ്വര്‍ണം.

ആ​ഗോള വിപണിയിലെ വില

ആ​ഗോള വിപണിയിൽ സ്വർണവില 6 ആഴ്‌ചയ്‌ക്കുള്ളിലെ പ്രതിവാര ഇടിവാണ് നേരിട്ടത്. പോസിറ്റീവ് യുഎസ് സാമ്പത്തിക ഡാറ്റ, ഫിച്ചിന്റെ റേറ്റിം​ഗ് ഇടിച്ച നടപടി എന്നിവ ആ​ഗോള വിപണിയിലെ സമ്മർദ്ദത്തിന് കാരണമായി. അതേസമയം, തിങ്കളാഴ്ചയും സ്വർണവില മന്ദ​ഗതിയിലാണ്.

ഫെഡറൽ റിസർവിന്റെ പലിശ നിരക്ക് തീരുമാനത്തെ സ്വാധീനിച്ചേക്കാവുന്ന പണപ്പെരുപ്പ ഡാറ്റ ഈ ആഴ്ച പുറത്തു വരുന്നതും, പ്രതീക്ഷിച്ചതിലും മന്ദഗതിയിലുള്ള യുഎസ് തൊഴിൽ വളർച്ചാ ഡാറ്റ ഡോളറിനെയും ബോണ്ട് യീൽഡിനെയും ശക്തിപ്പെടുത്തിയതും കാരണമാണ് സ്വർണ വില താഴേക്ക് പോകുന്നത്. 0.27 ശതമാനം ഇടിഞ്ഞ് ഔൺസിന് 1,938.23 ഡോളറിലാണ് സ്വർണ വില.

സ്വർണ വില ഇനി ഇടിയുമോ?

മുന്നോട്ട് നോക്കുമ്പോൾ ഈ ആഴ്‌ച പുറത്ത് വരുന്ന യു‌എസ് ഉപഭോക്തൃ വില സൂചിക (സി‌പി‌ഐ) ഡാറ്റ സ്വർണ വിലയെ സ്വാധീനിക്കുന്നതാണ്. പണപ്പെരുപ്പം നിയന്ത്രിക്കുമെന്ന പ്രതീക്ഷകളാണ് വിപണിയിലുള്ളത്. പണപ്പെരുപ്പം ജൂലായിൽ 4.8 ശതമാനമാകുമെന്നാണ് ബ്ലൂംബെർ​ഗ് റിപ്പോർട്ട് പറയുന്നത്. പണപ്പെരുപ്പം വർധിക്കുകയാണെങ്കിൽ സെപ്റ്റംബറിലെ ഫെഡ് യോ​ഗത്തിൽ നിരക്ക് വർധനവിനുള്ള സാധ്യതകൾ ശക്തമാകും. ഇത് ഡോളറിനെയും ബോണ്ട് യീൽഡും വർദ്ധിപ്പിക്കുകയും വരാനിരിക്കുന്ന ആഴ്ചയിൽ സ്വർണ വില കുറയുന്നതിനും കാരണമാകും.

ഡാറ്റ പുറത്ത് വന്നതിന് ശേഷമുള്ള ഫെഡറൽ ഉദ്യോഗസ്ഥരുടെ പ്രസംഗങ്ങളും വിപണിയിൽ സ്വർണ വിലയെ സ്വാധീനിക്കും. അതേസമയം വിനിമയ നിരക്ക് സ്വർണ വിലയെ ബാധിക്കും. ഡോളർ ശക്തമാകുന്നതും രൂപ ദുർബലമായതും ഇറക്കുമതി രാജ്യങ്ങൾക്ക് സ്വർണം ചെലവേറിയതാക്കും. രൂപ ഇടിവിൽ തുടരുന്നതാണ് ഇന്ത്യയ്ക്ക് ആ​ഗോള വിപണിയിലെ വില കുറവ് കാര്യമായി ലഭിക്കാതതിനുള്ള കാരണം.