നിക്ഷേപ പലിശ നിരക്കുയര്‍ത്തി എസ്ബിഐ; 400 ദിവസത്തേക്ക് ഉയര്‍ന്ന പലിശയില്‍ പുതിയ നിക്ഷേപം; നിരക്കുകളിങ്ങനെ

റിസർവ് ബാങ്ക് ഓഫ് ഇന്ത്യയുടെ റിപ്പോ നിരക്ക് വർധനവിന് പിന്നാലെ ബാങ്കുകൾ നിക്ഷേപ പലിശ നിരക്കും വായ്പ പലിശ നിരക്കും ഉയർത്തി തുടങ്ങിയിട്ടുണ്ട്. രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ കഴിഞ്ഞ ദിവസമാണ് 2 കോടിക്ക് താഴെയുള്ള നിക്ഷേപ പലിശ നിരക്കുയര്‍ത്തിയത്.

5 അടിസ്ഥാന നിരക്ക് മുതല്‍ 25 അടിസ്ഥാന നിരക്ക് വരെയാണ് വിവിധ കാലയളവിലുള്ള നിക്ഷേപങ്ങള്‍ക്ക് പലിശ നിരക്കുയര്‍ന്നത്. ഇതോടൊപ്പം 400 ദിവസത്തേക്കുള്ള പുതിയ നിക്ഷേപ പദ്ധതിയും ബാങ്ക് ആരംഭിച്ചിട്ടുണ്ട്. പുതുക്കിയ നിരക്കുകള്‍ ഫെബ്രുവരി 15 മുതല്‍ നിലവില്‍ വന്നു. പലിശ നിരക്കിൻെറ വിശദാംശങ്ങൾ നോക്കാം.

പലിശ നിരക്ക്

2 വര്‍ഷം മുതല്‍ 3 വര്‍ഷത്തില്‍ താഴെയുള്ള സ്ഥിര നിക്ഷേപങ്ങള്‍ക്ക് 25 അടിസ്ഥാന നിരക്കാണ് വര്‍ധിപ്പിച്ചത്. ഇനി മുതല്‍ 7 ശതമാനം പലിശ ലഭിക്കും. 3 വര്‍ഷം മുതല്‍ 10 വര്‍ഷത്തേക്ക് 25 അടിസ്ഥാന നിരക്കിന്റെ വര്‍ധനവ് വരുത്തിയിട്ടുണ്ട്. 6.50 ശതമാനം പലിശ നിക്ഷേപകര്‍ക്ക് ലഭിക്കും. 1 വര്‍ഷം മുതല്‍ 2 വര്‍ഷത്തില്‍ താഴെ കാലാവധിയുള്ള നിക്ഷേപങ്ങള്‍ക്ക് 5 അടിസ്ഥാന നിരക്കാണ് വര്‍ധിപ്പിച്ചത്. 6.80 ശതമാനം പലിശ ലഭിക്കും.

നിരക്കിൽ മാറ്റമില്ല

1 വര്‍ഷത്തില്‍ താഴെയുള്ള നിക്ഷേപങ്ങളുടെ പലിശ നിരക്കില്‍ മാറ്റമില്ല. 211 ദിവസം മുതല്‍ 1 വര്‍ഷത്തില്‍ താഴെയുള്ള നിക്ഷേപങ്ങള്‍ക്ക് 5.75 ശതമാനം പലിശ ലഭിക്കും. 180 ദിവസം മുതല്‍ 210 ദിവസത്തേക്ക് 5.25 ശതമാനം പലിശ നേടാം. 7-45 ദിവസത്തേക്ക് 3 ശതമാനവും 46-179 ദിവസത്തേക്ക് 4.50 ശതമാനവുമാണ് പലിശ നിരക്ക്. 

സീനിയര്‍ സിറ്റിസണ്‍ എഫ്ഡി

മുതിര്‍ന്ന പൗരന്മാര്‍ക്കാണ് എസ്ബിഐ പലിശ നിരക്കില്‍ വലിയ നേട്ടമുള്ളത്. 1 വര്‍ഷത്തിന് മുകളിലുള്ള എല്ലാ നിക്ഷേപങ്ങള്‍ക്കും പലിശ നിരക്കുയര്‍ന്നിട്ടുണ്ട്. 3 വര്‍ഷത്തില്‍ താഴെയുള്ള നിക്ഷേപങ്ങള്‍ക്ക് 7.50 ശതമാനം പലിശ ലഭിക്കും. 5 വര്‍ഷം മുതല്‍ 10 വര്‍ഷത്തേക്ക് 7.50 ശതമാനം പലിശയും ലഭിക്കും.

5 വര്‍ഷത്തിന് മുകളിലുള്ള സ്ഥിര നിക്ഷേപങ്ങള്‍ക്ക് അധിക നിരക്ക് ലഭിക്കുന്ന എസ്ബിഐ വീകെയര്‍ എഫ്ഡി മാര്‍ച്ച് 31 വരെ തുടരും. 5-10 വര്‍ഷത്തേക്ക് സാധാരണ .50 ശതമാനം അധിക നിരക്കിനൊപ്പം പ്രത്യേകമായി 0.50 ശതമാനം നിരക്കും ബാങ്ക് നല്‍കുന്നു. ആകെ 1 ശതമാനം അധിക നിരക്ക് നിക്ഷേപകര്‍ക്ക് ലഭിക്കും. 

പുതിയ നിക്ഷേപം

ഫെബ്രുവരി 15 മുതലാണ് പുതിയ സ്ഥിര നിക്ഷേപ പദ്ധതിയായ അമൃത് കലാഷ് ആരംഭിക്കുന്നത്. 400 ദിവസത്തെ പുതിയ സ്ഥിര നിക്ഷേപത്തിന് 7.10 ശതമാനം പലിശയാണ് ലഭിക്കുക. മുതിർന്ന പൗരന്മാർക്ക് 7.60 ശതമാനം പലിശ ലഭിക്കും. പദ്ധതിയിൽ ചേരാനുള്ള കാലാവധി 2023 മാർച്ച് 31 വരെയാണ്. 5 ലക്ഷം രൂപ നിക്ഷേപിക്കുന്ന സാധാരണക്കാരന് 400 ദിവസ കാലാവധിയിൽ 5,40,088 രൂപ നേടാനാകും. 

റിപ്പോ നിരക്കിന് അനുസൃതമായ നിരക്ക് വർധനവോ?

റിപ്പോ നിരക്കിന് പിന്നാലെ വായ്പ പലിശ നിരക്ക് വർധിപ്പിക്കുന്ന വേ​ഗത്തിൽ നിക്ഷേപ പലിശ നിരക്ക് വർധിക്കുന്നില്ല. റിസർവ് ബാങ്ക് ഓഫ് ഇന്ത്യയുടെ കണക്കനുസരിച്ച് 1 വർഷത്തിൽ കൂടുതൽ കാലാവധിയുള്ള സ്ഥിര നിക്ഷേപങ്ങളുടെ കൂടിയതും കുറഞ്ഞതുമായ പലിശ നിരക്ക് 2022 ഏപ്രിലിൽ യഥാക്രമം 5 ശതമാനം, 5.60 ശതമാനം എന്നിങ്ങനെയായിരുന്നു. 2023 ജനുവരി 27 ലെ കണക്ക് പ്രകാരം കുറഞ്ഞ പലിശ നിരക്ക് 6 ശതമാനമായി. 1 ശതമാനത്തിന്റെ വർധനവ്.

ഉയർന്ന നിരക്ക് 7.25 ശതമാനായി. ഇവിടെ 1.65 ശതമാനത്തിന്റെ വർധനവ്. ഇക്കാലയളവിൽ 2.25 ശതമാനം റിപ്പോ നിരക്കിൽ വർധനവ് വന്നെങ്കിലും നിക്ഷേപകർക്ക് കുറഞ്ഞ തോതിൽ മാത്രമാണ് ​ഗുണം ലഭിച്ചത്.