ആ​ഗസ്റ്റ് 15 മുതൽ ഐഎംപിഎസ് ചാർജുകൾ വർദ്ധിപ്പിക്കുമെന്ന് എസ്ബിഐ: എല്ലാവരെയും ഇത് ബാധിക്കുമോ?

ആ​ഗസ്റ്റ് 15 മുതൽ സ്റ്റേറ്റ് ബാങ്ക് ഓഫ് ഇന്ത്യയിൽ പുതിയ മാറ്റങ്ങൾ വരുന്നു. റീട്ടെയിൽ ക്ലയന്റുകൾക്കുള്ള ഇമ്മീഡിയറ്റ് പേയ്‌മെന്റ് സർവീസ് (IMPS) ഇടപാടുകളുമായി ബന്ധപ്പെട്ട ചാർജുകൾ എസ്ബിഐ പരിഷ്കരിക്കാനൊരുങ്ങുന്നു. ഇത് വിവിധ ഇടപാടുകളെ ബാധിക്കും. അതായത് ചെറിയ മൂല്യമുള്ള ഇടപാടുകൾ ഇപ്പോഴും സൗജന്യമായിരിക്കും. എന്നാൽ ഇനി മുതൽ ചില ഉയർന്ന മൂല്യമുള്ള ഓൺലൈൻ ട്രാൻസ്ഫറുകൾക്ക് ചെറിയ ചാർജുകൾ മാത്രമേ ഈടാക്കുള്ളൂ.

എന്താണ് ഐ‌എം‌പി‌എസ്?

നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ (NPCI) വാ​ഗ്ദാനം ചെയ്യുന്ന 24 മണിക്കൂറും ലഭ്യമായ ഒരു റിയൽ ടൈം പേയ്‌മെന്റ് സേവനമാണ് ഐഎംപിഎസ്. എസ്എംഎസ്, ഐവിആർ എന്നിവ ഒഴികെയുള്ള മിക്ക ചാനലുകൾക്കും ഓരോ ഇടപാടിനും 5 ലക്ഷം രൂപ പരിധിയുള്ള റിയൽ ടൈം പണമിടപാടുകൾ അനുവദിക്കുന്നു.

മൊബൈൽ ബാങ്കിംഗ്, ഇന്റർനെറ്റ് ബാങ്കിംഗ് എന്നിവയുൾപ്പെടെ ഓൺലൈൻ ചാനലുകൾ വഴി നടത്തുന്ന ഉയർന്ന മൂല്യമുള്ള IMPS ഇടപാടുകൾക്ക് ചെറിയ നിരക്കുകളാണ് ഇനി മുതൽ ഈടാക്കുന്നത്. 25,000 രൂപ വരെയുള്ള ചെറിയ മൂല്യമുള്ള ഇടപാടുകൾ പൂർണ്ണമായും സൗജന്യമായിരിക്കും.

ഓൺലൈൻ ട്രാൻസ്ഫറുകൾക്കുള്ള പുതിയ ഐ‌എം‌പി‌എസ് നിരക്കുകൾ

• 25,000 രൂപ വരെയുള്ള ഐഎംപിഎസ് ഇടപാടുകൾ സൗജന്യമായി തുടരും.
• 25,001 രൂപ മുതൽ 1,00,000 രൂപ വരെയുള്ള ഇടപാടുകൾക്ക് 2 രൂപ + ജിഎസ്ടി ഫീസ് ബാധകമായിരിക്കും.
• 1,00,001 രൂപ മുതൽ 2,00,000 രൂപ വരെയുള്ള ഇടുപാടുകൾക്ക് 6 രൂപ + ജിഎസ്ടി ഫീസ് ഈടാക്കും.
• 2,00,001 രൂപ മുതൽ 5,00,000 രൂപ വരെയുള്ള ഇടപാടുകൾക്ക് 10 രൂപ + ജിഎസ്ടി ഫീസ ഈടാക്കും.

എല്ലാവർക്കും ഈ നിരക്കുകൾ ബാധകമാണോ?

ചില ശമ്പള, പെൻഷൻ പാക്കേജുകൾക്ക് കീഴിലുള്ള ഉപഭോക്താക്കൾക്ക് പുതുതായി അവതരിപ്പിച്ച ഐഎംപിഎസ് നിരക്കുകൾ ബാധകമായിരിക്കില്ലെന്ന് എസ്ബിഐ വ്യക്തമാക്കുന്നു. ഏതെല്ലാം അക്കൗണ്ട് കൈകാര്യം ചെയ്യുന്നവർക്ക് ഈ ഇളവുകൾ ലഭിക്കുമെന്ന് നോക്കാം;

• എസ്‌ബി‌ഐയുടെ പ്രതിരോധ ശമ്പള പാക്കേജ്
• പാരാ മിലിട്ടറി ശമ്പള പാക്കേജ്
• ഇന്ത്യൻ കോസ്റ്റ് ഗാർഡ് ശമ്പള പാക്കേജ്
• കേന്ദ്ര സർക്കാർ ശമ്പള പാക്കേജ്
• പോലീസ് ശമ്പള പാക്കേജ്
• റെയിൽവേ ശമ്പള പാക്കേജ്
• ശൗര്യ കുടുംബ പെൻഷൻ അക്കൗണ്ടുകൾ
• കോർപ്പറേറ്റ് ശമ്പള പാക്കേജ്
• സംസ്ഥാന സർക്കാർ ശമ്പള പാക്കേജ്
• സ്റ്റാർട്ടപ്പ് ശമ്പള പാക്കേജ്
• ഫാമിലി സേവിംഗ്സ് അക്കൗണ്ട് - എസ്‌ബി‌ഐ റിഷ്‌തെ ഉടമകൾ

സാലറി അക്കൗണ്ടിന് ഇത്രയും ആനുകൂല്യങ്ങളുണ്ടോ? സൗജന്യ ക്രെഡിറ്റ് കാർഡ് മുതൽ വമ്പൻ നേട്ടങ്ങൾ

മറ്റ് ബാങ്കുകൾ എത്ര നിരക്ക് ഈടാക്കുന്നു?

കാനറ ബാങ്കിൽ 1,000 രൂപയിൽ താഴെയുള്ള ഐഎംപിഎസ് ഇടപാടുകൾ സൗജന്യമാണ്. എന്നാൽ 1,000 രൂപ മുതൽ 10,000 രൂപ വരെയുള്ള ഇടപാടുകൾക്ക് 3 രൂപ + ജിഎസ്ടി എന്ന നിരക്കിൽ ഫീസ് ഈടാക്കും. 2 ലക്ഷം മുതൽ 5 ലക്ഷം രൂപ വരെയുള്ള ഇടപാടുകൾക്ക് 20 രൂപ + ജിഎസ്ടി ഫീസ് ബാധകമാണ്.

പഞ്ചാബ് നാഷണൽ ബാങ്കിൽ 1,000 രൂപ വരെയുള്ള ഐഎംപിഎസ് ഇടപാടുകൾ സൗജന്യമാണ്. 1,001 രൂപ മുതൽ 1 ലക്ഷം രൂപ വരെയുള്ള ഇടപാടുകൾക്ക് 6 രൂപ + ജിഎസ് ബ്രാഞ്ച് വഴിയും, 5 രൂപ + ജിഎസ്ടി ഓൺലൈൻ വഴിയും ബാധകമാണ്. വലിയ സ്ലാബുകളിൽ 12 രൂപ + ജിഎസ്ടി ബ്രാഞ്ച് വഴിയും, 10 രൂപ + ജിഎസ്ടി ഓൺലൈൻ വഴിയും ഈടാക്കും.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.