പലിശയ്ക്ക് നികുതി വേണ്ട; ടിഡിഎസും നികുതിയും ബാധകമല്ലാത്ത പോസ്റ്റ് ഓഫീസ് നിക്ഷേപങ്ങളുണ്ടോ? വിശദമായി അറിയാം

സാധാരണക്കാർക്കിടയിൽ ജനപ്രീയമാണ് പോസ്റ്റ് ഓഫീസ് നിക്ഷേപ പദ്ധതികൾ. പോസ്റ്റ് ഓഫീസ് പദ്ധതികളിൽ പൊതുവെയുള്ള ആകർഷണം സർക്കാർ ​ഗ്യാരണ്ടി, മികച്ച പലിശ, നികുതി ആനുകൂല്യം എന്നിവയാണ്. ചില നിക്ഷേപങ്ങൾ പൂർണമായ നികുതി ഇളവ് ലഭിക്കുമ്പോൾ മറ്റു ചില നിക്ഷേപങ്ങൾക്ക് സെക്ഷൻ 80സി പ്രകാരമുള്ള നികുതി ഇളവ് ലഭിക്കും.

ചില നിക്ഷേപങ്ങൾക്ക് സ്രോതസിൽ നിന്നുള്ള നികുതി(ടിഡിഎസ്)യും ബാധകമല്ല. നിക്ഷേപത്തിൽനിന്നുള്ള പലിശ വരുമാനം നിശ്ചിത പരിധി കവിയാത്ത സാഹചര്യത്തിലാണ് സ്രോതസിൽ നിന്നുള്ള നികുതിയിൽ ഇളവ് ലഭിക്കുന്നത്. ഏതൊക്കെ നിക്ഷേപങ്ങൾക്ക് എന്തൊക്കെ ഇളവുകൾ ലഭിക്കുന്നു എന്ന് നോക്കാം.

എന്താണ് ടിഡിഎസ്

'ടാക്സ് ഡിഡക്ട് അറ്റ് സോഴ്സ്' അഥവാ സ്രോതസിൽ നിന്നുള്ള നികുതിയാണ് ടിഡിഎസ്. വരുമാനത്തിന്റെ ഉറവിടത്തിൽ നിന്ന് നേരിട്ട് നികുതി ഈടാക്കുന്നതാണ് ടിഡിഎസ്. നികുതിവെട്ടിപ്പ് കുറയ്ക്കുന്നതിനയാണ് സർക്കാർ ടിഡിഎസ് ഉപയോഗിക്കുന്നത്. പിടിച്ച ടിഡിഎസ് ആദായ നികുതി റിട്ടേൺ സമർപ്പിച്ച് റീഫണ്ട് വാങ്ങാൻ സാധിക്കും.

 

പലിശ വരുമാനം സാമ്പത്തിക വർഷത്തിൽ നിശ്ചിത പരിധി കടന്നാൽ ടിഡിഎസ് ഈടാക്കും. സാധാരണ പൗരന്മാർക്ക് 40,000യാണ് പരിധി. മുതിർന്ന പൗരന്മാർക്ക് 50,000 രൂപയാണ് പരിധി. നിക്ഷേപങ്ങളിൽ നിന്നുള്ള വരുമാനം ഈ തുകയ്ക്ക് താഴെയാണെങ്കിൽഒരു നികുതിയും ഈടാക്കില്ല. 

ടിഡിഎസ് ബാധകമല്ലാത്ത നിക്ഷേപങ്ങൾ

സ്രോതസിൽ നിന്നുള്ള നികുതി ബാധകമല്ലാത്തൊരു പോസ്റ്റ് ഓഫീസ് നിക്ഷേപമാണ് നാഷണൽ സേവിംഗ്‌സ് സർട്ടിഫിക്കറ്റ്. നിക്ഷേപിക്കുന്ന തുകയിൽ 1.50 ലക്ഷം രൂപ വരെ ആദായനികുതി നിയമത്തിലെ സെക്ഷൻ 80 സി പ്രകാരം നികുതി ആനുകൂല്യം ലഭിക്കും. അതേസമയം കാലാവധിയിൽ കയ്യിലെത്തുന്ന പലിശ വരുമാനം നിക്ഷേപകന്റെ സ്ലാബ് റേറ്റ് അനുസരിച്ച് നികുതി ബാധകമാകും. 

മറ്റൊരു നിക്ഷേപം കിസാൻ വികാസ് പത്രയാണ്. സെക്ഷൻ 80സി പ്രകാരമുള്ള നികുതി ഇളവുകളില്ലെങ്കിലും കിസാൻ വികാസ് പത്രയിൽ നിന്ന് കാലാവധിക്ക് ശേഷം നടത്തുന്ന പിൻവലിക്കലിന് സ്രോതസിൽ നിന്നുള്ള നികുതി കുറയ്ക്കില്ല. അതേസമയം, റിട്ടേണുകൾ പൂർണ്ണമായും നികുതി വിധേയമാണ്. 

മറ്റു നിക്ഷേപങ്ങളിൽ എങ്ങനെ ടിഡിഎസ് ഒഴിവാക്കാം

വർഷത്തിൽ പലിശ വരുമാനം 40,000 രൂപയിൽ കൂടുതലാണെങ്കിലാണ് സ്രോതസിൽ നിന്നുള്ള നികുതി ഈടാക്കുന്നത്. മുതിർന്ന പൗരന്മാർക്ക് ടിഡിഎസ് ബാധകമാകുന്ന പരിധി 50,000 രൂപയാണ്. പലിശ വരുമാനം പരിധി കടന്നാലും നിക്ഷേപകൻ ആദായ നികുതി അടയ്ക്കാൻ ബാധ്യസ്ഥനല്ലെങ്കിൽ (വരുമാനം അടിസ്ഥാന ഇളവ് പരിധിക്ക് താഴെയാണെങ്കിൽ) 15ജി, 15എച്ച് ഫോം സമർപ്പിക്കാം. സാധാരണ നിക്ഷേപകർക്കാണ് 15ജി ഫോം. മുതിർന്ന പൗരന്മാർക്ക് 15എച്ച് ഫോം ഉപയോ​ഗിക്കാം. നിക്ഷേപമുള്ള പോസ്റ്റ് ഓഫീസിലാണ് ഫോം സമർപ്പിക്കേണ്ടത്. 

നികുതി ബാധകമല്ലാത്ത നിക്ഷേപങ്ങൾ

പോസ്റ്റ് ഓഫീസ് നിക്ഷേപങ്ങളിൽ പബ്ലിക്ക് പ്രൊവിഡന്റ് ഫണ്ട്, സുകന്യ സമൃദ്ധി യോജന എന്നീ നിക്ഷേപങ്ങൾക്ക് യാതൊരു വിധ നികുതിയും ബാധകമാകുന്നില്ല. നിക്ഷേപിക്കുന്ന തുക 1.50 ലക്ഷം പരിധിയുണ്ട്. ഈ തുക സെക്ഷൻ 80സി പ്രകാരം നികുതി ഇളവ് ലഭിക്കും. പലിശ വരുമാനത്തിന് നികുതി ബാധകമല്ലാത്തതിനാൽ കാലാവധിയിൽ പിൻവലിക്കുമ്പോൾ നികുതി നൽകേണ്ടതില്ല.

80സി നിക്ഷേപങ്ങൾ

പബ്ലിക്ക് പ്രൊവിഡന്റ് ഫണ്ട്, സുകന്യ സമൃദ്ധി യോജന എന്നിവയ്ക്ക് പുറമെ 5 വർഷത്തെ സ്ഥിര നിക്ഷേപം, സീനിയർ സിറ്റിസൺ സേവിംഗ്‌സ് സ്‌കീം, നാഷണൽ സേവിംഗ്‌സ് സ്‌കീം എന്നി നിക്ഷേപങ്ങൾക്ക് 80സി ആനുകൂല്യം ലഭിക്കും. നിക്ഷേപിക്കുന്ന തുകയിൽ 1.50ലക്ഷം രൂപ വരെ നികുതി ഈടാക്കില്ല.