വില വര്‍ധനവ് വേഗത്തില്‍; താഴ്ന്ന നിലവാരത്തില്‍ നിന്ന് തിരികെ കയറി സ്വര്‍ണ വില; ഇന്നത്തെ നിരക്കിങ്ങനെ

ചാഞ്ചാട്ടം തുടര്‍ന്ന് ആഭ്യന്തര വിപണിയിലെ സ്വര്‍ണ വില. വ്യാഴാഴ്ചയിലെ ഇടിവിന് ശേഷം സ്വര്‍ണ വില തിരികെ കയറി. പവന് 240 രൂപ വര്‍ധിച്ച് 46,160 രൂപയിലാണ് വെള്ളിയാഴ്ച സ്വര്‍ണ വിലയുള്ളത്. ഗ്രാമിന് 30 രൂപ വര്‍ധിച്ച് 5,770 രൂപയിലേക്ക് സ്വര്‍ണ വില എത്തി. വ്യാഴാഴ്ച കുറഞ്ഞത്രയും വെള്ളിയാഴ്ച വര്‍ധിച്ചതോടെ സ്വര്‍ണ വില ബുധനാഴ്ചയിലെ അതേ നിലവാരത്തിലാണുള്ളത്. ഒരാഴ്ചയ്ക്കിടെ ഇടിവും വില വർധനവുമായി ചാഞ്ചാട്ടത്തിലാണ് സ്വർണ വില.

ഒരാഴ്ചയിലെ വില

തിങ്കളാഴ്ച നേട്ടത്തോടെ വ്യാപാരം ആരംഭിച്ച സ്വര്‍ണം ബാക്കി മൂന്ന് ദിവസങ്ങളില്‍ ഇടിവ് രേഖപ്പെടുത്തി. ആദ്യ ദിവസം 120 രൂപ നേട്ടമുണ്ടാക്കി 46,520 രൂപയായിരുന്നു പവന് രേഖപ്പെടുത്തിയത്. തൊട്ടടുത്ത ദിവസം 80 രൂപ കുറഞ്ഞ് 46,440 രൂപയിലേക്കും ബുധനാഴ്ച 280 രൂപ കുറഞ്ഞ് 46,160 രൂപയിലേക്കും എത്തി.

ഇവിടെ നിന്നാണ് വ്യാഴാഴ്ച 240 രൂപ കുറഞ്ഞത്. തുടര്‍ച്ചയായ മൂന്ന് ദിവസത്തെ ഇടിവോടെ ഒരു മാസത്തിനിടയിലെ താഴ്ന്ന നിലവാരത്തിലേക്കും സ്വര്‍ണ വില എത്തിയിരുന്നു. വെള്ളിയാഴ്ച 240 രൂപ വർധനവ് രേഖപ്പെടുത്തിയതോടെ ബുധനാഴ്ചയിലെ നിലവാരത്തിലേക്ക് സ്വർണ വില തിരിച്ചെത്തി.

മാസത്തിലെ ഉയർന്ന നിലവാരം ജനുവരി രണ്ടിന് രേഖപ്പെടുത്തിയ 47,000 രൂപയാണ്. ഈ നിലവാരത്തിൽ നിന്ന് 840 രൂപ അകലെയാണ് വ്യാഴാഴ്ചയിലെ സ്വർണ വില. സർവകാല ഉയരമായ ഡിസംബർ 28 ന് രേഖപ്പെടുത്തിയ 47,120 രൂപയിൽ നിന്ന് 960 രൂപയുടെ വ്യത്യാസം ഇന്നത്തെ സ്വർണ വിലയിലുണ്ട്.

ആ​ഗോള വിപണിയിലെ വില

യുഎസ് ഫെഡറൽ റിസർവിന്റെ പലിശ നിരക്ക് വർധനവ് വൈകുമെന്ന സൂചനയ്ക്കിടെ സ്വർണ വില ഇടിവിൽ തുടരുകയാണ്. വ്യാഴാഴ്ച 2010 ഡോളറിലേക്ക് എത്തിയ ശേഷം 2,023.13 ഡോളറിൽ ക്ലോസ് ചെയ്ത സ്വർണം രാവിലെ വ്യാപാരത്തിനിടെ ഇടിവിലാണ്. സ്പോട്ട് ​ഗോൾഡ് 0.02 ശതമാനത്തിന്റെ നേരിയ ഇടിവോടെ ഔൺസിന് 2,022.71 ഡോളറിലാണ് വ്യാപാരം നടക്കുന്നത്.

ഡോളറും ട്രഷറി വരുമാനവും ശക്തിപ്രാപിച്ചതാണ് സ്വർണത്തിന് തിരിച്ചടിയായത്. ഒരു മാസത്തിലേറെയായുള്ള ഏറ്റവും മോശം ആഴ്ചയിലേക്കാണ് സ്വർണ വില നീങ്ങുന്നത്. യുഎസ് ഡോളർ സൂചിക 0.2ശതമാനം ഇടിവിലാണെങ്കിലും ഈ ആഴ്ച ഇതുവരെ ഏകദേശം 1 ശതമാനം ഉയർന്നു. യുഎസ് 10 വർഷത്തെ ട്രഷറി ബോണ്ട് യീൽഡും ശക്തിപ്രാപിക്കുകയാണ്. അഞ്ച് ആഴ്‌ചയിലെ ഏറ്റവും ഉയർന്ന നിരക്കായ 4.1632 ശതമാനത്തിലാണ് യീൽഡ്.