വാടകക്കാരൻ ഒഴിയുന്നില്ലേ; ഈ സാഹചര്യങ്ങളിൽ ഉടമയ്ക്ക് മുൻതൂക്കം

വാടകയ്ക്ക് കെട്ടിടം നൽകിയാൽ പിന്നെ ഒഴിപ്പിക്കൽ ബുദ്ധിമുട്ടാണെന്നാണ് പലരുടെയും അനുഭവം. ഒഴിപ്പിക്കലുമായി ബന്ധപ്പെട്ട് ഉടമയും വാടക്കാരനും തമ്മിൽ തർക്കങ്ങളും നടക്കുന്നു. ഇത്തരം പ്രതിസന്ധികളെ മറികടക്കാനാണ് കേന്ദ്രസർക്കാർ മാതൃക കെട്ടിട നിയമം 2021 ൽ കൊണ്ടു വന്നത്. എന്നാൽ പല സംസ്ഥാനങ്ങളിലും ഇന്നും ഇത് നടപ്പിലാക്കിയിട്ടില്ല. കേരള ബില്‍ഡിംഗ് (ലീസ് ആന്‍ഡ് റെന്റ് കണ്‍ട്രോള്‍) നിയമം 1965 ആണ് കേരളത്തിൽ നടപ്പാക്കുന്നത്. 

കേരള ബില്‍ഡിംഗ് (ലീസ് ആന്‍ഡ് റെന്റ് കണ്‍ട്രോള്‍) നിയമം സെക്ഷന്‍ 11ലാണ് വാടകകാരനെ ഒഴിപ്പിക്കുന്നതുമായി ബന്ധപ്പെട്ട കാര്യങ്ങള്‍ പറയുന്നത്. വാടക കുടിശ്ശിക, കെട്ടിട ഉടമയുടെ സ്വന്തം ഉപയോഗത്തിന്, കെട്ടിടം വാടകയ്ക്കെടുക്കുന്നയാള്‍ മറ്റുള്ളവര്‍ക്ക് വാടകയ്ക്ക് കൊടുത്താൽ, കെട്ടിടം പൊളിച്ചുപണിയേണ്ട ആവശ്യത്തിന് തുടങ്ങിയ നിരവധി സാഹചര്യങ്ങളിൽ വാടകക്കാരനെ കെട്ടിട ഉടമയക്ക് നിലവിലെ നിയമപ്രകാരം ഒഴിപ്പിക്കാം. ഇത് ഏതൊക്കെയാണെന്ന് പരിശോധിക്കാം. 

വാടക കുടിശ്ശിക വരുത്തിയാൽ

കേരള ബില്‍ഡിംഗ് (ലീസ് ആന്‍ഡ് റെന്റ് കണ്‍ട്രോള്‍) നിയമം സെക്ഷന്‍ 11(2)(ബി) ലാണ് വാടക കുടിശ്ശിക വന്നാൽ വാടകക്കാരനെ ഒഴിപ്പിക്കുന്നതിനെ പറ്റി പറയുന്നത്. വാടക കരാര്‍ പ്രകാരം നിശ്ചയിച്ചി തീയതിയും സാവകാശമായ 15 ദിവസവും കഴിഞ്ഞ് വാടകക്കാരൻ വാടക നൽകിയില്ലെങ്കിൽ ഒഴിപ്പിക്കാം.

ഇതിന് സമ്മതിക്കാത്ത പക്ഷം കോടതിയെ സമീപിക്കാം. റവന്യു കോടതികളിലാണ് അപേക്ഷ നൽകേണ്ടത്. ഉത്തരവോടെ വാടകക്കാരനെ ഒഴിപ്പിക്കാം. വാടക കരാറില്ലാത്ത സാഹചര്യത്തില്‍ മാസ അവസാനമാണ് വാടക നല്‍കാനുള്ള സമയമായി കണക്കാക്കുക. 

കെട്ടിട ഉടമയ്ക്ക് കെട്ടിടം ആവശ്യമായി വന്നാൽ

കെട്ടിട ഉടമയ്ക്കോ കെട്ടിട ഉടമയുടെ ആശ്രിതർക്കോ സത്യസന്ധമായ ആവശ്യത്തിന് കെട്ടിടം ആവശ്യമായി വന്നാല്‍ വാടകക്കാരനെ ഒഴിപ്പിക്കാം. കെട്ടിട ഉടമയ്ക്ക് ഇതേ നഗരത്തിലോ വില്ലേജിലോ മറ്റൊരു വാടക കെട്ടിടം ഉണ്ടെന്നിരിക്കെ ഈ ആവശ്യത്തിന് ഒഴിപ്പിക്കല്‍ സാധിക്കില്ല. സെക്ഷൻ 11 (3) ലാണ് ഇക്കാര്യം പറയുന്നത്. 

മറിച്ചു നൽകൽ

കെട്ടിടം ഉടമയുടെ അനുമതിയില്ലാതെ വാടക്കക്കാരൻ മറ്റൊരാള്‍ക്ക് പൂർണമായോ ഭാ​ഗികമായോ വാടകയ്ക്ക് നൽകിയാൽ ഒഴിപ്പിക്കാൻ നിയമപരമായ അവകാശമുണ്ട്. കേരള ബില്‍ഡിംഗ് (ലീസ് ആന്‍ഡ് റെന്റ് കണ്‍ട്രോള്‍) നിയമം സെക്ഷന്‍ 11 (4) (1)ലാണ് ഇക്കാര്യം പറയുന്നത്. വാടകയ്ക്ക് കൊടുത്ത കെട്ടിടത്തിന്റെ ഉടമയക്ക് വ്യക്തിഗത ആവശ്യങ്ങള്‍ക്ക് ആവശ്യമായി വന്നാൽ വാടകകാരനെ ഒഴിവാക്കാം. 

കെട്ടിടം നശിപ്പിക്കുമ്പോൾ

വാടക കെട്ടിടം നശിപ്പിക്കുകയോ മൂല്യം കുറയുന്ന കാര്യങ്ങളോ ചെയ്താല്‍ കോടതിയെ സമീപിച്ച് ഒഴിപ്പിക്കാനുള്ള ഉത്തരവ് വാങ്ങാം. വാടകക്കാരൻ ഇതേ ആവശ്യത്തിന് ഇതേ ന​ഗരത്തിലോ വില്ലേജിലോ മറ്റൊരു കെട്ടിടം വാടകയ്ക്ക് എടുത്തിട്ടുണ്ടെങ്കിൽ ഒഴിപ്പിക്കാൻ കെട്ടിട ഉടമയ്ക്ക് അവകാശമുണ്ട്.

അറ്റകുറ്റപണി

സത്യസന്ധമായി സാഹചര്യത്തില്‍ കെട്ടിടം അറ്റകുറ്റപണി, പുതുക്കപ്പണി നടത്തുന്നതിന് വാടകക്കാരനെ ഒഴിപ്പിക്കാൻ സാധിക്കും. പുതുക്കി പണിത ശേഷം നേരത്തെ ഉണ്ടായിരുന്ന വാടകകാരന് ആദ്യ പരിഗണന നല്‍കണം. സമയപരിധിക്കുള്ളില്‍ കെട്ടിട ഉടമ മനപൂർവം പണി പൂര്‍ത്തിയാക്കിയില്ലെങ്കില്‍ 500 രൂപ പിഴ ഈടാക്കും. വാടകയ്ക്ക നൽകിയ കെട്ടിടം 6 മാസക്കാലമായി ഉപയോ​ഗിക്കാതെ ഇട്ടാൽ കെട്ടിട ഉടമയക്ക് ഒഴിപ്പിക്കാം.

മറ്റു ആവശ്യങ്ങൾക്ക്

കെട്ടിട ഉടമ എന്നത് വ്യക്തികൾ ആകണമെന്നില്ല. സംഘടനകളും സ്ഥാപനങ്ങളും കെട്ടിട ഉടമകളുടെ നിർവചനത്തിൽ വരും. ഇവരുടെ ഉടമസ്ഥതയിലുള്ള കെട്ടിടം മതപരമായ ആവശ്യം, ചാരിറ്റി, വിദ്യാഭ്യാസ ആവശ്യങ്ങള്‍ക്ക് ഉപയോ​ഗിക്കേണ്ട സമയത്ത് വാടകക്കാരനെ ഒഴിപ്പിക്കാം. ഉദാഹരണത്തിന് വിദ്യാഭ്യാസ സ്ഥാപനം വാടകയ്ക്ക് നൽകിയ കെട്ടിടം അവരുടെ വിദ്യാഭ്യാസ ആവശ്യത്തിന് ആവശ്യം വന്നാൽ ഒഴിപ്പിക്കാം. സെക്ഷൻ 11(7) ലാണ് ഇക്കാര്യം പറയുന്നത്.