മുതിർന്ന പൗരന്മാർക്ക് 8.10% പലിശ നൽകുന്ന പൊതുമേഖലാ ബാങ്കുകൾ; 5 ബാങ്കുകളിലെ പലിശ നിരക്കിങ്ങനെ

റിസർവ് ബാങ്കിന്റെ റിപ്പോ നിരക്ക് കണക്കിലെടുത്ത് ബാങ്കുകൾ സ്ഥിര നിക്ഷേപ പലിശ നിരക്ക് ഉയർത്തിയിട്ടുണ്ട്. ഇതിൽ മുതിർന്ന പൗരന്മാർക്കാണ് ഉയർന്ന പലിശ ലഭിക്കുന്നത്. സ്മോൾ ഫിനാൻസ് ബാങ്കുകൾ 9 ശതമാനത്തിനടുത്ത് വരെ പലിശ മുതിർന്ന പൗരന്മാർക്ക് നൽകുന്നുണ്ട്. എന്നാൽ പൊതുമേഖലാ ബാങ്കുകളിൽ 8 ശതമാനം വരെ പലിശ നേടാനുള്ള വഴിയുമുണ്ട്.

സുരക്ഷിതത്വം കണക്കിലെടുത്ത് മുതിർന്ന പൗരന്മാർ പൊതുമേഖലാ ബാങ്കുകളിലാണ് നിക്ഷേപം നടത്താൻ ആ​ഗ്രഹിക്കുന്നത്. ഈ സാഹചര്യത്തിൽ പ്രമുഖ പൊതുമേഖലാ ബാങ്കുകളായ സ്റ്റേറ്റ് ബാങ്ക് ഓഫ് ഇന്ത്യ, പഞ്ചാബ് നാഷണൽ ബാങ്ക്, ബാങ്ക് ഓഫ് ബറോഡ, ബാങ്ക് ഓഫ് ഇന്ത്യ, സെൻട്രൽ ബാങ്ക് ഓഫ് എന്നി മുതിർന്ന പൗരന്മാർക്ക് നൽകുന്ന പലിശ നിരക്ക് നോക്കാം.

എസ്ബിഐ

രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യയിൽ 2 കോടിയിൽ താഴെയുള്ള സ്ഥിര നിക്ഷേപത്തിന് മുതിർന്ന പൗരന്മാർക്ക് 7.60 ശതമാനം വരെ പലിശ ലഭിക്കും. 2 വർഷം മുതൽ 10 വർഷത്തേക്ക് മുതിർന്ന പൗരന്മാർക്ക് 7.50 ശതമാനം പലിശയാണ് ബാങ്ക് നൽകുന്നത്.

5 വർഷത്തിന് മുകളിൽ എസ്ബിഐ കെയർ പദ്ധതിയുടെ ഭാ​ഗമായാണ് ഉയർന്ന നിരക്ക്. ഇതോടൊപ്പം സ്റ്റേറ്റ് ബാങ്ക് ഓഫ് ഇന്ത്യ അടുത്തിടെ അവതരിപ്പിച്ച അമൃത് കലാശ് നിക്ഷേപ പദ്ധതി പ്രകാരം മുതിർന്ന പൗരന്മാർക്ക് 7.60 ശതമാനം പലിശ ലഭിക്കും.

പഞ്ചാബ് നാഷണൽ ബാങ്ക്

പഞ്ചാബ് നാഷണൽ ബാങ്ക് മുതിർന്ന പൗരന്മാർക്ക് 666 ദിവസത്തെ നിക്ഷേപത്തിന് 7.75% പലിശ വാഗ്ദാനം ചെയ്യുന്നു. സൂപ്പർ സീനിയർ പൗരന്മാർക്ക് 8.05 ശതമാനം പലിശയാണ് ലഭിക്കുക. പഞ്ചാബ് നാഷണൽ ബാങ്കിൽ 2 വർഷം മുതൽ 3 വർഷം വരെയുള്ള നിക്ഷേപങ്ങൾക്ക് മുതിർന്ന പൗരന്മാർക്ക് 7.5 ശതമാനം പലിശ ലഭിക്കുന്നുണ്ട്. 

ബാങ്ക് ഓഫ് ബറോഡ

ബാങ്ക് ഓഫ് ബറോഡയുടെ പ്രത്യേക സ്ഥിര നിക്ഷേപ പദ്ധതിയായ ബറോഡ തിരംഗ പ്ലസ് ഡെപ്പോസിറ്റ് സ്കീമിന് കീഴിലാണ് മുതിർന്ന പൗരന്മാർക്ക് അധിക നിരക്ക് ലഭിക്കുന്നത്. 399 ദിവസത്തെ ടേം ഡെപ്പോസിറ്റുകൾക്ക് 7.55 ശതമാനം പലിശ ലഭിക്കുന്നു.

1 വർഷം, 1 വർഷം മുതൽ 400 ദിവസം വരെയുള്ള നിക്ഷേപങ്ങൾ, 400 ദിവസം മുതൽ 2 വർഷം വരെയുള്ള നിക്ഷേപം, 2 വർഷം മുതൽ 3 വർഷം, 5 വർഷം മുതൽ 10 വർഷം, 444 ദിവസം എന്നിങ്ങനെ വിവിധ കാലയളവുകളുടെ നിക്ഷേപങ്ങൾക്ക് 7.25 ശതമാനം പലിശ ലഭിക്കും.

സെൻട്രൽ ബാങ്ക് ഓഫ് ഇന്ത്യ

സെൻട്രൽ ബാങ്ക് ഓഫ് ഇന്ത്യയുടെ 444 ദിവസത്തേക്കുള്ള കോളബിൽ സ്ഥിര നിക്ഷേപങ്ങളിൽ മുതിർന്ന പൗരന്മാർക്ക് 7.85 ശതമാനം പലിശ ലഭിക്കുന്നുണ്ട്. 555 ദിവസത്തെ കോളബിൽ സ്ഥിര നിക്ഷേപത്തിന് ബാങ്ക് 7.5 ശതമാനം പലിശയാണ് നൽകുന്നത്.

444 ദിവസത്തെ നോൺ കോളബിൾ സ്ഥിര നിക്ഷേപങ്ങൾക്ക് സെൻട്രൽ ബാങ്ക് ഓഫ് ഇന്ത്യ മുതിർന്ന പൗരന്മാർക്ക് 8.1 ശതമാനം പലിശ നൽകും. 555 ദിവസത്തെ വിളിക്കാൻ കഴിയാത്ത നിക്ഷേപങ്ങൾക്ക് 7.75 ശതമാനം പലിശ ലഭിക്കും. 

ബാങ്ക് ഓഫ് ഇന്ത്യ

444 ദിവസത്തെ നിക്ഷേപത്തിന് മുതിർന്ന പൗരന്മാർക്ക് ബാങ്ക് ഓഫ് ഇന്ത്യ 7.55 ശതമാനം പലിശ നൽകുന്നുണ്ട്. 2 മുതൽ 5 വർഷത്തേക്കുള്ള ടേം ഡെപ്പോസിറ്റുകൾക്ക് ബാങ്ക് 7.25 ശതമാനം പലിശ നൽകുന്നു.