എടിഎമ്മിൽ നിന്ന് കാശ് കിട്ടിയതുമില്ല, അക്കൗണ്ടിൽ നിന്ന് കാശ് പോകുകയും ചെയ്തു; ഉടൻ ചെയ്യേണ്ടതെന്ത്?

പരാതിപ്പെടേണ്ടത് എവിടെ?

നിങ്ങളുടെ എടിഎം കാർഡ് ഉപയോ​ഗിച്ച് ഏത് എടിഎമ്മിൽ നിന്ന് ഇടപാട് നടത്തി പരാജയപ്പെടുകയോ പണം അക്കൗണ്ടിൽ നിന്ന് നഷ്ട്ടപ്പെടുകയോ ചെയ്താൽ ആദ്യം ചെയ്യേണ്ടത് ബാങ്കിൽ പരാതിപ്പെടുക എന്നതാണ്. കാർഡ് ഏത് ബാങ്കിന്റേത് ആണോ ആ ബാങ്കിലാണ് പരാതി സമർപ്പിക്കേണ്ടത്.

പരാതിപ്പെടേണ്ടത് എപ്പോൾ?

എല്ലാ എടിഎം കൗണ്ടറുകളിലും ഉപഭോക്താക്കൾക്ക് പരാതി അയയ്ക്കാൻ ബന്ധപ്പെട്ട ഓഫീസർമാരുടെ ടോൾ ഫ്രീ നമ്പറുകളും ഹെൽപ് ഡസ്ക് നമ്പരുകളും രേഖപ്പെടുത്തിയിരിക്കണം. ഈ നമ്പറുകളിൽ വിളിച്ച് അപ്പോൾ തന്നെ പരാതി രേഖപ്പെടുത്താവുന്നതാണ്. പണം നഷ്ട്ടപ്പെട്ട് 30 ദിവസത്തിനുള്ളിൽ ഉപഭോക്താവ് പരാതി ഫയൽ ചെയ്തിരിക്കണം.

ബാങ്കിം​ഗ് ഓംബുഡ്സ്മാന് പരാതി നൽകാം

പരാതി നൽകിയതിന് ശേഷമുള്ള 7 പ്രവർത്തി ദിവസത്തിനുള്ളിൽ നിങ്ങളുടെ അക്കൗണ്ടിൽ പണം ക്രെഡിറ്റ് ചെയ്യപ്പെടുകയും പരാതി പരിഹരിക്കപ്പെടുകയും ചെയ്യണമെന്നാണ് റിസർവ് ബാങ്കിന്റെ നിയമം. നിശ്ചിത സമയത്തിനുള്ളിൽ നിങ്ങളുടെ പരാതിയ്ക്ക് പരിഹാരമുണ്ടായില്ലെങ്കിൽ നിങ്ങൾക്ക് ബാങ്കിം​ഗ് ഓംബുഡ്സ്മാന് പരാതി നൽകാവുന്നതാണ്. 2018ൽ എടിഎം ഇടപാട് സംബന്ധിച്ചി ബാങ്കിം​ഗ് ഓംബുഡ്സ്മാൻ ഓഫീസിലെത്തിയത് 16,000 പരാതികളാണ്.

സർവ്വീസ് ചാർജ്

റിസർവ് ബാങ്ക് ഓഫ് ഇന്ത്യയുടെ (ആർബിഐ) നിർദ്ദേശ പ്രകാരം, എല്ലാ ബാങ്കുകളും എടിഎമ്മുകളിൽ മിനിമം സൗജന്യ ട്രാൻസാക്ഷൻ അനുവദിക്കുന്നുണ്ട്. ഈ പരിധി കഴിഞ്ഞാൽ സേവിംഗ് ബാങ്ക് അക്കൗണ്ട് ഉടമകൾ കൂടുതൽ സർവ്വീസ് ചാർജ് നൽകേണ്ടി വരും. ഒരു മാസത്തിൽ കുറഞ്ഞത് അഞ്ചു ഫ്രീ ഇടപാടുകൾ മാത്രമാണ് ബാങ്കുകൾ അനുവദിക്കുന്നത്. പണം പിൻവലിക്കലും ബാലൻസ് പരിശോധനയും ഒക്കെ ഉൾപ്പെടുന്നതാണ് അഞ്ച് ഇടപാടുകൾ.