പിഎഫ് ഉള്ളവർക്ക് മാത്രം ലഭിക്കുന്ന ചില ആനുകൂല്യങ്ങൾ; തീർച്ചയായും അറിയണം ഇക്കാര്യങ്ങൾ

എല്ലാ മാസവും നിങ്ങളുടെ കമ്പനി നിങ്ങളുടെ ശമ്പളത്തിന്റെ ഒരു ഭാഗം എംപ്ലോയീസ് പ്രൊവിഡന്റ് ഫണ്ട് (ഇപിഎഫ്) അക്കൗണ്ടിലേക്ക് സംഭാവനയായി കുറയ്ക്കാറുണ്ട്. എംപ്ലോയീസ് പ്രൊവിഡന്റ് ഫണ്ട് അഥാവാ പിഎഫ് എന്നറിയപ്പെടുന്ന ഈ തുക നിങ്ങൾക്ക് വിരമിച്ച ശേഷമോ പെട്ടെന്നുള്ള സാമ്പത്തിക ആവശ്യങ്ങൾക്കോ ഉപയോഗപ്പെടുത്താം. എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ) ആണ് ഈ തുക ഓരോ മാസവും ശേഖരിക്കുന്നത്.

പിഎഫ് ആർക്കെല്ലാം?

ഇപിഎഫ് നിയമപ്രകാരം രജിസ്റ്റർ ചെയ്തിട്ടുള്ള കമ്പനികളുടെ ജീവനക്കാർക്ക് മാത്രമേ ഇപിഎഫ് അല്ലെങ്കിൽ പിഎഫിൽ നിക്ഷേപിക്കാൻ കഴിയൂ. കമ്പനിയും ജീവനക്കാരനും ഓരോ മാസവും ജീവനക്കാരുടെ അടിസ്ഥാന ശമ്പളത്തിന്റെയും ക്ഷാമബത്തയുടെയും 12 ശതമാനം വീതം സംഭാവനയാണ് നൽകുന്നത്. കമ്പനിയുടെ സംഭാവന പ്രത്യേകമായിട്ടുള്ള ഇപിഎഫ് അക്കൗണ്ടിലേയ്ക്കാണ് നിക്ഷേപിക്കുന്നത്.

അംഗത്തിന് മരണം സംഭവിച്ചാൽ

ഈ സേവിംഗ്സ് സ്കീം ആദായനികുതി നിയമത്തിലെ സെക്ഷൻ 80 സി പ്രകാരം നികുതി ഇളവ് വാഗ്ദാനം ചെയ്യുന്നു. ഇപി‌എഫ്‌ഒയിലെ ഒരു അംഗം പതിവായി ഫണ്ടിലേക്ക് സംഭാവന നൽകുന്നുണ്ടെങ്കിൽ ഈ അംഗത്തിന് മരണം സംഭവിച്ചാൽ അംഗത്തിന്റെ കുടുംബത്തിന് ഇൻഷുറൻസ് സ്കീം 1976 (ഇഡി‌എൽ‌ഐ) പ്രകാരം ആനുകൂല്യം ലഭിക്കും. ഈ സ്കീം അംഗത്തിന് അവസാനമായി ലഭിച്ച പ്രതിമാസ ശമ്പളത്തിന്റെ 20 ഇരട്ടിയാണ്. ഇത് പരമാവധി 6 ലക്ഷം രൂപ വരെയാകാം.

പലിശ നിരക്ക്

നിങ്ങളുടെ ഇപിഎഫ് അക്കൗണ്ടുകളിൽ നിക്ഷേപിക്കുന്ന പണം എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷനിൽ (ഇപിഎഫ്ഒ) അക്കൗണ്ടുള്ള അംഗങ്ങൾക്ക് ഉയർന്ന വരുമാനം നേടി തരും. എംപ്ലോയീസ് പ്രൊവിഡന്റ് ഫണ്ട് ആക്റ്റ്, 1956 പ്രകാരം ഇപിഎഫ് പലിശ നിരക്ക് എല്ലാ വർഷവും പ്രഖ്യാപിക്കും. ഈ സാമ്പത്തിക വർഷത്തിലെ പലിശ നിരക്ക് 8.5 ശതമാനമാണ്.

ആജീവനാന്ത പെൻഷൻ

ഈ പദ്ധതി പെൻഷൻ സ്കീം 1995 (ഇപിഎസ്) പ്രകാരം ആജീവനാന്ത പെൻഷൻ പദ്ധതി വാഗ്ദാനം ചെയ്യുന്നു. പകർച്ചവ്യാധി, തൊഴിലില്ലായ്മ എന്നിവയുടെ പശ്ചാത്തലത്തിൽ ഭാഗിക പിൻവലിക്കൽ സൗകര്യം സർക്കാർ അനുവദിച്ചിട്ടുണ്ട്.